Read chopi 1 Makronika 23 Bible Online

1 Makronika 23 - chopi bible

1 Makronika 23

¹ Mbimo yi koko, Dhavhidha a nga kumba, a di ni masiku o tala, a to veka Solomoni, mwanakwe, kuva mfumeli txitimwi ka va ka Israyeli.

²Se a to sengeleta votshe vathangeli va ka Israyeli, kumweko ni vaphaxeli ni Valevhi.

³Se ku to balwa Valevhi va magumi mararu a malembe ni kuya masoni; mtengo wawe madingano ni vathangeli va kona, i ti 38.000 wa vavamna.

⁴Hagari kwawe ku ti ni 24.000 va nga sawulwa ka mthumo wo aka Nyumba ya MKOMA, ni 6.000 wa vathangeli ni valamuli va timhaka,

⁵ni 4.000 wa vawoneleli va sike, ni 4.000 wa vo dhumisa MKOMA ngu sivetaveta, sile ani ni nga si maha kasi kudhumisa ngu sona, kuwomba Dhavhidha.

⁶Se Dhavhidha a to va abanisela ngu mitxawa, madingano ni vanana va ka Levhi: Gerisoni, Kowati ni Merari.

⁷Va ka Gerisoni: Ladhani ni Simeyi.

⁸Vanana va Ladhani; Jeyeli, i mthangeli, ni Zetani, ni Joyeli, mbararu.

⁹Vanana va Simeyi: i Selomite, ni Haziyeli, ni Harani, mbararu; avava ngu vona vathangeli va vatate va Ladhani.

¹⁰Se vanana va Simeyi i Jayati, ni Ziza, ni Jewusi, ni Bheriya; i ti ti mune wa vanana va Simeyi.

¹¹Se Jayati i ti ti mthangeli, Ziza i ti ti wa wumbidi; aniko Jewusi ni Bheriya va si nga ni vanana votala; ngu mhaka yeto, va to ya balwa kumweko ni tinyumba ta vatate vawe, ve maha mwaya wumwewo.

¹²Vanana va Kowati ngu vava: Aniramu, ni Isari, ni Hebroni, ni Uziyeli, i mune.

¹³ Vanana va Aniramu ngu vava: Aroni, ni Mosi; se Aroni a to sawulwa kasi kusawulekisa Wusawuleki wa Kusawuleka, ene ni vanana vakwe, ngu ha ku si gwitiko, kasi kuhisa dibaselo masoni ka MKOMA, ni ku mthumela, ni kuninga makatekwa ngu ditina dakwe, ngu ha ku si gwitiko.

¹⁴Aniko ngu ka Mosi, m'thu wa Txizimu, vanana vakwe va batwe hagari ka lihunzu la ka Levhi.

¹⁵Sekoko vanana va Mosi i Gerisoni ni Eliyezeri.

¹⁶Mwanana wa Gerisoni i Sebhuweli, mthangeli.

¹⁷Se mwanana wa Eliyezeri i ti mthangeli Reyabhiya; aniko Eliyezeri kha veleka vamwani vanana; kambe vanana va Reyabhiya va to handa ngutu.

¹⁸Mwanana wa Isari i Selomite, mthangeli.

¹⁹Se vanana va Hebroni i Jeriya, mthangeli, ni Amariya, wa wumbidi, ni Jahaziyeli, wa wuraru, ni Jakameyamu, wa wumune.

²⁰Ka vanana va Uziyeli i Mika, mthangeli, ni Isiya, wa wumbidi.

²¹Vanana va Merari ngu vava: Mali ni Musi; vanana va Mali Eleyazari ni Kisi.

²²Se Eleyazari a to fa asi nga ni vanana va vafana, kambe a ti ni vanana vamahorana; se vanana va Kisi, mwanawe, va to va teka va txi maha vasikati vawe.

²³Vanana va Musi ngu vava: Mali, Edheri ni Jerimoti, mbararu.

²⁴Avava ngu vona vanana va ka Levhi, madingano ni nyumba ya vatate vawe, vathangeli va vatate vawe, madingano ni ti va nga baliswa tona ngu mtengo wa matina, madingano ni vathangeli, vale va nga ti maha mthumo wa Nyumbani ka MKOMA, va tanga ya magumi mambidi a malembe ni mtxhanu ni kuya masoni.

²⁵Nguko Dhavhidha a ti khene: MKOMA Txizimu txa Israyeli, a ningile kuhumula ka vathu, aniko a na zumba Jerusalema ngu ha ku si gwitiko.

²⁶ Ni ku va ka Levhi kha va na mbiswa ve rwala Ditenda da MKOMA, hambi txiya ni txa tximwetxo txo lumba mthumo wakwe.

²⁷Nguko madingano ni mapswi o gwitisa a Dhavhidha, ku to balwa vanana va ka Levhi va magumi mambidi a malembe ni kuya masoni.

²⁸Nguko mthumo wawe i ti ti wa kurumwa ngu vanana va ka Aroni, ka mthumo wa Nyumba ya MKOMA, ve hiyela mitendela, ni tinyumbani, ni kusawulekisa sotshe siya so sawuleka, ni kumaha mthumo wa Nyumbani ka Txizimu,

²⁹i ku wuwa: Kuxayisa mapawu a miphaxo, ni mpupu wo tshura, ni mningelo wa sakudya, ni tximbwanda txa kwa mbi tshumbelwa, ni so katingwa, ni so yokwa, ni yotshe mipimo yo pima kutala ni wuhombe;

³⁰ni ku va fanela kuema kasi kubonga, ni kudhumisa MKOMA otshe masiku, mixo ni mitshikari;

³¹va txi ningela mningelo wa kuhiswa, ka MKOMA, ngu migivhela ni kumeka ka mtxima, ni ka mipipi, ngu mtengo wa kona, madingano ni sihena sawe, masiku otshe masoni ka MKOMA;

³² ni kuxayisa kha kwati ditenda da msengeletano, ni wukhalo wo sawuleka, ni kuvhuna vanana va ka Aroni, vanawe, ka mthumo wa Nyumbani ka MKOMA.