Read chopi 1 Makronika 25 Bible Online

1 Makronika 25 - chopi bible

1 Makronika 25

¹Se Dhavhidha kumweko ni vathangeli va dibutho da tiyimbi, va to sawula vanana va Asafe ka mthumo wa wukhozeli, ni vanana va Hemani, ni va Jedhutumi, kasi kuva txi embelela ngu tiharipa, ni timbila, ni tingoma; awuwa mtengo wa vathu vale va nga vekwa ka mthumo wa wukhozeli:

²ka vanana va Asafe, i Zakuri, ni Josefa, ni Netaniya, ni Asarela, vanana va Asafe, va ti thangelwa ngu Asafe wule a nga ti profeta ngu kuleletela ka mfumeli Dhavhidha;

³ka vanana va Jedhutumi, i Gedhaliya, ni Zeri, ni Jesaya, ni Simeyi, ni Hasabhiya, ni Matitiya, mtxhanu ni mmweyo, va ti thangelwa ngu tate wawe, Judhutumi, wule a nga ti profeta e dhumisa ni kubonga MKOMA, ngu kuveta txitende;

⁴ka vanana va Hemani, i Bhukiya, ni Mataniya, ni Uziyeli, ni Sebhuweli, ni Jerimoti, ni Hananiya, ni Hanani, ni Eliyata, ni Gidhalita, ni Romaniti-Ezeri, ni Josibhekasa, ni Maloti, ni Hotiri, ni Mahaziyoti.

⁵Votshe vava i ti ti vanana va Hemani, m'huti wa mfumeli, ka mapswi a Txizimu, kasi ku a txi guleta mpundu. Txizimu txi to ninga Hemani digumi da vanana ni mune va vafana, ni vanana vararu vamahorana.

⁶Votshe vava, va ti ti didhawa ka tate, kasi kuva txi embelela, Nyumbani ka MKOMA, ngu tingoma, ni timbila, ni tiharipa, ka mthumo wa kukhozela Nyumbani ka Txizimu; se Asafe ni Jedhutumi, ni Hemani va ti didhawa ka mfumeli.

⁷Se mtengo wawe, kumweko ni vanawe, vale va nga gondiswa tindando ta MKOMA, votshe vaembeleli, i ti ti 288 wa vona.

⁸Se va to xaxuva tixolo madingano ni vawoneleli, ngu kufana, ka vadotho ni vahombe, vo ziva mthumo, ni vagondiswa.

⁹Se xolo yo khata yi to ñola va ka Asafe, i ku Josefa; ya wumbidi yi to ñola Gedhaliya; i ti ti ene, ni vanawe, ni vanana vakwe, votshe digumi ni vambidi;

¹⁰ya wuraru yi to ñola Zakuri, ni vanana vakwe, ni vanawe, i ti ti digumi ni vambidi;

¹¹ya wumune yi to ñola Iziri ni vanana vakwe, ni vanawe, i ti ti digumi ni vambidi;

¹²ya wutxhanu yi to ñola Netaniya ni vanana vakwe, ni vanawe, i ti ti digumi ni vambidi;

¹³ya wutxhanu ni yimweyo yi to ñola Bhukiya ni vanana vakwe, ni vanawe, i ti ti digumi ni vambidi;

¹⁴ya wutxhanu ni timbidi yi to ñola Jezarela, ni vanana vakwe, ni vanawe, i ti ti digumi ni vambidi;

¹⁵ya wutxhanu ni tiraru yi to ñola Jesaya, ni vanana vakwe, ni vanawe, i ti ti digumi ni vambidi;

¹⁶ya wutxhanu ni mune yi to ñola Mataniya, ni vanana vakwe, ni vanawe, i ti ti digumi ni vambidi;

¹⁷ya wugumi yi to ñola Simeyi, ni vanana vakwe, ni vanawe, i ti ti digumi ni vambidi;

¹⁸ya wugumi ni yimweyo yi to ñola Azareli, ni vanana vakwe, ni vanawe, i ti ti digumi ni vambidi;

¹⁹ya wugumi ni timbidi yi to ñola Hasabhiya, ni vanana vakwe, ni vanawe, i ti ti digumi ni vambidi;

²⁰ya wugumi ni tiraru yi to ñola Subhayeli, ni vanana vakwe, ni vanawe, i ti ti digumi ni vambidi;

²¹ya wugumi ni mune yi to ñola Matitiya, ni vanana vakwe ni vanawe, i ti ti digumi ni vambidi;

²²ya wugumi ni mtxhanu yi to ñola Jerimoti, ni vanana vakwe, ni vanawe, i ti ti digumi ni vambidi;

²³ya wugumi ni mtxhanu ni yimweyo yi to ñola Hananiya, ni vanana vakwe, ni vanawe, i ti ti digumi ni vambidi;

²⁴ya wugumi ni mtxhanu ni timbidi yi to ñola Josibhekasa, ni vanana vakwe, ni vanawe, i ti ti digumi ni vambidi;

²⁵ya wugumi ni mtxhanu ni tiraru yi to ñola Hanani, ni vanana vakwe, ni vanawe, i ti ti digumi ni vambidi;

²⁶ya wugumi ni mtxhanu ni mune yi to ñola Maloti, ni vanana vakwe, ni vanawe, i ti ti digumi ni vambidi;

²⁷ya wu magumi mambidi yi to ñola Eliyata, ni vanana vakwe, ni vanawe, i ti ti digumi ni vambidi;

²⁸ya wu magumi mambidi ni yimweyo yi to ñola Hotiri, vanana vakwe, ni vanawe, i ti ti digumi ni vambidi;

²⁹ya wu magumi mambidi ni timbidi yi to ñola Gidhaliti, ni vanana vakwe, ni vanawe, i ti ti digumi ni vambidi;

³⁰ya wu magumi mambidi ni tiraru yi to ñola Mahaziyoti, ni vanana vakwe, ni vanawe, i ti ti digumi ni vambidi;

³¹ya wu magumi mambidi ni mune yi to ñola Romaniti-Ezeri, ni vanana vakwe, ni vanawe, i ti ti digumi ni vambidi.