Read chopi 1 Makronika 26 Bible Online

1 Makronika 26 - chopi bible

1 Makronika 26

¹Vathangeli va sike va ti ti abanisetwe ngu mitxawa. Ka va ka Kora i ti ti Meselemiya, mwana Kora, wa vanana va ka Asafe.

²Se vanana va Meselemiya ngu vava: Zakariya, wa matiwula, wa wumbidi i Jedhiyayeli, wa wuraru i Zebhadhiya, ni Jatiniyeli wa wumune,

³wa wutxhanu i Elame, wa wutxhanu ni mmweyo i Jowanani, wa wutxhanu ni vambidi i Eliyoyenayi.

⁴ Se vanana va Obhedhi-Edhomi ngu vava: Semaya wa matiwula, wa wumbidi i Jeyozabhadhi, wa wuraru Jowa, wa wumune i Sakari, wa wutxhanu i Nathaniyele,

⁵ wa wutxhanu ni mmweyo i Amiyeli, wa wutxhanu ni vambidi i Isakari, wa wutxhanu ni vararu i Pewuletayi; nguko Txizimu txi ti va katekisile.

⁶Nene mwanana wa Semaya a ti velekile vanana, vale va nga fuma txitimwi ka nyumba ya tate wawe; nguko i ti vavamna va mtamo.

⁷Vanana va Semaya ngu vava: Otini, ni Rafayeli, ni Obhedhi, ni Elizabhadhi, ni vanawe, hi nga ti vavamna va mtamo, Eliwu ni Semakiya.

⁸Votshe vava i ti ti vanana va ka Obhedhi-Edhomi; vona, ni vanana vawe, ni vanawe, i ti vavamna va mtamo, va mtamo amu ka kuthuma, votshe i ti mtxhanu wa magumi ni dimwedo, ni vathu vambidi.

⁹Se vanana ni vanawe va Meselemiya, vavamna va mtamo i ti ti digumi ni mtxhanu ni vararu.

¹⁰Se ka Hosa, wa vanana va Merari, vanana vakwe ngu vava: Siniri, mthangeli (hambi ku i nga ti si nga matiwula, tate wakwe a ti msawute kuva mthangeli),

¹¹wa wumbidi i Hilikiya, wa wuraru i Tebhaliya, wa wumune i Zakariya; votshe vanana ni vanawe va Hosa, i ti digumi ni vararu.

¹²Ngu ka vava ku to mahwa mitxawa ya vawoneleli va sike, hagari ka vathangeli va vavamna vale vo wonelela, kumweko ni vanawe, kasi kuthuma Nyumbani ka MKOMA.

¹³Se va to xaxuva tixolo, madingano ni tinyumba ta vatate vawe, vavadotho ni vahombe ngu txike tximwetxo ni tximwani.

¹⁴Se xolo ya wutxani yi to sawula Selemiya; ku to xaxuvwa tixolo ngu mwanana wakwe Zakariya, didhota do lulama, xolo yi mkomba didhawa da wuphemba.

¹⁵Se Obhedhi-Edhomi yi to mkomba didhawa da wulambwe; se vanana vakwe va to ningwa kuwonelela nyumba ya tithomba.

¹⁶Supimi ni Hosa va to sawulwa kuva didhawa da mswa-ditambo, ni ka txike txa Saleketi, hafuhi ni nzila ya mmangoni; muwoneleli masoni ka mmwani muwoneleli.

¹⁷Ngu didhawa da wutxani, ku ti ti ni mtxhanu wa Valevhi ni mmweyo; ngu didhawa da wuphemba mune wa vona ngu ditshiku; wulambwe mune wa vona ngu ditshiku; kambe nyumbani ka tithomba ku ti ti ni vambidi-vambidi.

¹⁸Ngu Txibhiyani didhawa da mswa-ditambo ku ti ni mune hafuhi ni nzila, ni vambidi hafuhi ni txibhiya.

¹⁹Ayiya mitxawa ya vawoneleli va sike, va vanana va ka Kora ni vanana va ka Merari.

²⁰Se ngu ka va ka Levhi, Ayiya i ti ti mxayisi wa tithomba ta Nyumbani ka Txizimu, ni ka tithomba ta siya so sawuleka.

²¹Ka vanana va Ladhani, mugersoni, mthangeli wa vatate i ti ti Jeyeli,

²²ka vanana va Jeyeli, Zetani, ni Joweli, mwanawe; avava va ti ni mthumo wo xayisa tithomba ta Nyumbani ka MKOMA;

²³ka va ka Anirami, va ka Izari, va ka Hebroni, va ka Oziyeli,

²⁴Sebhuweli, mwana Gerisoni, mwana Mosi, i ti ti mthangeli wa vaxayisi va tithomba;

²⁵se vanawe ngu didhawa da Eliyezeri ngu vava: Reyabhiya mwanakwe, ni Isaya mwanakwe, ni Joramu mwanakwe, ni Zikiri mwanakwe, ni Selomite mwanakwe.

²⁶Se Selomite ni vanawe va ti ti ni mthumo wo xayisa totshe tithomba ta siya so sawuleka sile mfumeli Dhavhidha, ni vathangeli va vatate, vathangeli va magumi a mazana, ni va mazana, ni vathangeli va mabutho a yimbi, va nga ti si sawulekisile;

²⁷ka sile si nga handwa yimbini, va to si sawulekisa, kasi kululamisa ngu sona Nyumba ya MKOMA,

²⁸ni sotshe sile si nga sawulekiswa ngu Samuwele, m'huti, ni Sawule, mwana Kisi, ni Abhineri, mwana Neri, ni Jowabhi, mwana Zeruiya; sotshe sile si ti ti maneka manzani ka Selomite ni vanawe.

²⁹Ka va ka Izari, Kenaniya ni vanana vakwe, va ti ti vekilwe txitimwi ka va ka Israyeli, kasi kumaha mithumo hahanze, kuva vathangeli ni valamuli;

³⁰ka va ka Hebroni, i ti ti Hasabhiya ni vanawe, va 1.700 wa vavamna va mtamo, va nga ti ni mthumo wa wuthangeli kona Israyeli, ngu mtxhatuko ka Jordhani, ngu didhawa da mswa-ditambo, ni wotshe mthumo wa MKOMA, ni ka mthumo wa mfumeli;

³¹ka va ka Hebroni mthangeli wa va ka Hebroni, i ti ti Jeriya, wa tiveleko tawe hagari ka vatate; ka dilembe da mune wa magumi da kufuma ka Dhavhidha, ku to lawa kumaneka hagari kwawe vavamna va mtamo, kona Jazeri ka Gileyadhi.

³²Se vanawe, vavamna va mtamo, i ti ti 2.700 wa vathangeli va vatate; se mfumeli Dhavhidha a to va veka txitimwi ka va ka Rubheni, ni va ka Gadhi, ni ka hafu ya lihunzu la ka Manasi, ka totshe timhaka ta Txizimu, ni ka totshe timhaka ta mfumeli.