Read chopi 1 Makronika 28 Bible Online

1 Makronika 28 - chopi bible

1 Makronika 28

¹Sekoko Dhavhidha a to ramba kona Jerusalema votshe vathangeli va ka Israyeli, ni vathangeli va tihunzu, ni vathangeli va mitxawa, vale va nga ti thumela mfumeli, ni vathangeli va magumi a mazana, ni vathangeli va mazana, ni vathangeli va totshe tithomba ni makhalo a mfumeli, ni va vanana vakwe, kumweko ni mithenwa, ni vavamna, ni votshe vavamna va mtamo.

² Se mfumeli Dhavhidha a to khukha a txi ema, a txi khene: Ni engiseni vanathu, anu vathu vangu: Ni ti ni makungo mbiluni kwangu o aka nyumba yo humula ka yona dibhokiso da txitumelelano txa MKOMA, ni ya txikhigetelo txa mikondo ya Txizimu txathu, se ani ni ti ti lulamisete kuaka.

³Kambe Txizimu txi to kha txona kwangu: Khu na mbi akela nyumba ditina dangu, nguko u m'thu wa yimbi, ni ku u theketile mnoha wawungi.

⁴Se MKOMA, Txizimu txa Israyeli, a ni sawute hagari ka yotshe nyumba ya tate wangu, kuva ni fumela kala kupinduka txitimwi ka va ka Israyeli; nguko a sawute Judha kuva mthangeli, ni nyumba ya tate wangu, ka nyumba ya ka Judha; hagari ka vanana va tate wangu a tsakisilwe ngu ngani, kasi ku e ni maha mfumeli txitimwi ka votshe va ka Israyeli.

⁵Se ka votshe vanana vangu (nguko MKOMA a ni ningile vanana votala), ene a sawute mwanana wangu Solomoni, kuva e khalahatsha ka txikhalo txa mfumo wa MKOMA, txitimwi ka va ka Israyeli.

⁶Se a to khene kwangu: Mwanana wako Solomoni, ngene a no aka nyumba yangu ni siluvelo sangu, nguko ni msawute kuva mwanana wangu, ani ni na va tate wakwe.

⁷ Se ni na tsanisa mfumo wakwe kala kupinduka, ngako a txi xayisa ni kulondeta milayo yangu, ni sileleto sangu, nga ti a nga mahisa tona kala ka ditshiku da nyamsi.

⁸Konkuwa koko, masoni ka votshe va ka Israyeli, ka msengeletano wa MKOMA, ni masoni ka tinzeve ta Txizimu txathu, xayisani ni kulava yotshe milayo ya MKOMA, Txizimu txathu, kasi ku mi na zumba ka ditiko diya da dinene, ni ku di maha thomba ya vanana vanu, kala kupinduka.

⁹Se awe mwanangu Solomoni, ziva Txizimu txa tate wako, u txi thumela ngu mbilu ya yinene, ni mhefemulo wo txhatxheka; nguko MKOMA wa xola totshe timbilu, ni kupfisisa totshe timhaka ta mialakanyo; se ngako u txo mlava, u na mmana; kambe ngako u txi mleka, a na kulamba kala kupinduka.

¹⁰Wona koko konkuwa, MKOMA a kusawute kuva u aka nyumba yo sawuleka; tsana u maha mthumo.

¹¹Se Dhavhidha a to ninga mwanakwe Solomoni, txikombiso txa m'hube ni txa tinyumba timwani ta dona, ni txa tinyumba ta tithomba, ni txa nyumba yo khongela ka yona, ni sibhiya sa kona sa nyumbani, ni txa wukhalo wo sawuleka ngutu.

¹²A to ninga kambe txikombiso txa sotshe si a nga ti si txhatxhametile, i ku siya: Txa m'hubhe wa Nyumba ya MKOMA, ni txa sotshe sibhiya sa madhawani, ni txa tithomba ta Nyumbani ka Txizimu, ni txa tithomba txa siya so sawuleka;

¹³ni txa mitxawa ya vaphaxeli, txa Valevhi, ni txa wotshe mthumo wa Nyumbani ka MKOMA, ni txa sotshe siya sa mthumo wa Nyumbani ka MKOMA.

¹⁴A to mninga ni nzalama, madingano ni kunemela ka nzalama, kasi kumaha sotshe siya sa mthumo wumwani ni wumwani; ni silivhela, ngu mpimo wa yona kasi kumaha sotshe siya sa silivhela, sa yotshe mixowo ya mthumo;

¹⁵ni kunemela ka tiphande ta nzalama, ni malambu a kona a nzalama, madingano ni kunemela ka phande yimwani ni yimwani, ni malambu a kona; ni tiphande ta silivhela, madingano ni kunemela ka tiphande, ni malambu a kona; ni madingano ni mathumiselo a phande ni phande;

¹⁶a to mninga kambe kunemela ka nzalama kasi kumaha timeza ta mapawu a mphaxo, ni silivhela, ka timeza ta silivhela;

¹⁷ni nzalama yo hehuka yo maha ngu yona tifokolo, ni mikamba, ni timbiya, ni magombe a nzalama, digombe ni digombe ni mpimo wa dona, ni ka magombe a silivhela, digombe ni digombe ni mpimo wa dona;

¹⁸ni ka txiluvelo txa dibaselo, nzalama yo basiswa ngu mpimo wa yona, a to mninga kambe nzalama ya txikombiso txa txikotxikani, txa makerubhima awa ma nga nawulutwa mabhapi a ona me fenengeta dibhokiso da txitumelelano txa MKOMA.

¹⁹Totshe tiya, Dhavhidha a to khene: Va to ni ninga ngu mibhalo, ngu kuruma ka MKOMA, i ku tiya, yotshe mithumo ya txikombiso txiya.

²⁰Se Dhavhidha a to khene ka mwanakwe Solomoni: Tsana, u nga kanakane, maha mthumo; u nga thave, hambi kudhudhumela, nguko MKOMA Txizimu, Txizimu txangu, a na va ni nawe; kha na mbi ku leka, hambi ku ku divala, kala kuza u heta wotshe mthumo wo aka Nyumba ya MKOMA.

²¹Se wona, taku u ni mitxawa ya vaphaxeli ni ya Valevhi, kuva ve maha wotshe mthumo wa Nyumba ya Txizimu; kambe u ni vathu vo ti ningetetela, va zivako kumaha yotshe mithumo ya tixaka totshe, votshe vathangeli ni votshe vathu vaho, kasi kumaha totshe ti u no va ruma.