Read chopi 2 Makronika 1 Bible Online

2 Makronika 1 - chopi bible

2 Makronika 1

¹Se Solomoni, mwana Dhavhidha, a to tsana amu ka mfumo wakwe; aniko MKOMA, Txizimu txakwe, a ti ni nene, atxi mkulisa ngutu.

²Se Solomoni a to womba ka votshe va ka Israyeli, ka vathangeli va yimbi va magumi a mazana, ni va mazana, ni ka valamuli, ni ka votshe vathangeli va dotshe ditiko da Israyeli, vathangeli va tinyumba ta vatate va kona.

³Se Solomoni ni wotshe msengeletano wule a nga ti nawo va to tsula mmangoni ka Gibheyoni, nguko di ti ti koneyo ditenda da msengeletano wa Txizimu, dile Mosi, txithumi txa MKOMA a nga ti di gwimbile txiwulani.

⁴ Aniko Dhavhidha a ti thavisile dibhokiso da Txizimu kona Kiriyate-Jeyarimi e di yisa ka wukhalo wule Dhavhidha a nga ti wu longisile; nguko a ti gwimbile ditenda kona Jerusalema.

⁵Txiluvelo txa koporo txile txi nga ti mahilwe ngu Bhezaleli, mwana Uri, mwana Huri, ni txona txi ti koneyo masoni ka Ditenda da MKOMA; aniko Solomoni ni wotshe msengeletano va to txi endela.

⁶Se Solomoni a to maha mphaxo wo hiswa masoni ka MKOMA, txitimwi ka txiluvelo txa koporo txile txi nga ti ti ditendani ka msengeletano, e ningela txitimwi ka txona 1.000 wa miningelo yo hiswa.

⁷Ka wona wusiku wule, Txizimu txi to woneka ka Solomoni, txi m'gela tiya: Kombela txi u txi lavako ku ni txi kuninga.

⁸Se Solomoni a to khene ka Txizimu: Awe u thumisile Dhavhidha, tate wangu, ngu kukateka ka hombe, kambe ani u ni mahile mfumeli, ka wukhalo wakwe.

⁹ Konkuwa koko, awe MKOMA Txizimu, tsanisisa dipswi dako, dile u nga ninga Dhavhidha, tate wangu; nguko awe u ni mahile mfumeli txitimwi ka vathu votala ngutu nga lithulu la mafu.

¹⁰Ni ninge koko, wuzivi ni wutxhari, kasiku ni sikota kuthangela masoni ka vathu vava; nguko i mani a ndi no lamula vathu vako vo talisa tiya kani?

¹¹Sekoko Txizimu txi to kha txona ka Solomoni: A ku mbilu yako yi nga kombela tiya, u nga mbi ti kombelela tithomba, mikhokhola ni nduma, hambi kufa ka vale va ku karatako, mwendo kukombela kuhanya masiku o tala, aniko u ti kombelete wuzivi ni wutxhari, kasiku u na ziva kulamula timhaka ta vathu vangu, ava ni nga kuveka kuva mfumeli txitimwi kwawe,

¹²Wuzivi ni wutxhari ni na kuninga, se kambe na kuninga tithomba, ni mikhokhola, ni nduma, asile si nga mbi manwa ngu mfumeli wo khata, kha si na mbi manwa ngu m'thu ka vale vatako msana kwako.

¹³Ngu toneto, Solomoni a to khukha ka mmango wule wu ku Gibheyoni, masoni ka ditenda da msengeletano, e tshumelela Jerusalema; se a to fuma txitimwi ka Israyeli.

¹⁴Se Solomoni a to sengeleta sikotxikani ni vagadhi va mahantxhi; e mana 1.400 wa sikotxikani, ni 12.000 wa vagadhi va mahantxhi; sikotxikani a to siyisa ka madhoropa a sikotxikani, se simwani si to sala hafuhi ni mfumeli, kona Jerusalema.

¹⁵Se mfumeli a to maha tito, Jerusalema kumaneka silivhela ni nzalama, si txi nga marigwi, ni mikedhari yo tala ngutu yi txi nga miphayi yo mila mapuloni.

¹⁶Se mahantxhi ale a nga ti nawo Solomoni ma ti ti ta ngu Egipta; kambe majoke a linyu ma ti xawa ngu vanyamakwewu va mfumeli, ngu mtengo wokari.

¹⁷Se txikotxikani tximwani ni tximwani txota ngu Egipta, txi ti xawa ngu mtengo wa 600 wa maxekele a silivhela, se dihantxhi ngu 150; ngu kumaha keto, vaxavi va ti xavela votshe vafumeli va Vaheti ni vafumeli va Siriya.