Read chopi 2 Makronika 10 Bible Online

2 Makronika 10 - chopi bible

2 Makronika 10

¹Se Robhowamu a toya Sikemi, nguko votshe va ka Israyeli va ti tile Sikemi, ku ta mmaha mfumeli.

²Se ku to maheka koko taku, ngako Jerobhowamu, mwana Nebhate, a di tipfite (awule a nga ti Egipta kuya barama kona ngu kuthava mfumeli Solomoni), a to wuya ngu Egipta.

³Va to rumisa kuya mdhana; sekoko Jerobhowamu a to ta ni votshe va ka Israyeli, ve ta womba-womba ni Robhowamu, va txi kha vona:

⁴Tate wako a nemetisile dikange dathu; awe koko, konkuwa, hehukisa mthumo wo karata wa tate wako, ni mrwalo wo nemela wule a nga hi khoneka, se athu hi na kuthumela.

⁵Se ene a to vagela ku khene: Wuyani kwangu ngu ditshiku da wuraru. Sekoko vathu va to tsula.

⁶Se Robhowamu a toya kombela wudhota ka madhota ale ma nga thuma ni tate wakwe Solomoni, a txi nga txi hanya, a txi khene: Mi ni ninga wudhota muni anu, waku ni xamula vathu vava kani?

⁷Se vona va to m'gela ku kha vona: Ngako u txo thumela vathu vava ngu wunene ni wumbilu, u womba-womba navo mapswi amanene, va na va tikhumbi tako masiku otshe.

⁸Kambe ene a to leka wudhota wule a nga gelwa ngu madhota, se a to engisa to gelwa ngu vafana vale a nga kula kumweko nawo, avale va nga ti mthumela.

⁹A txi khene kwawe: Mi ni gela txani anu, taku ni xamula vathu vava, va nga womba kwangu, va txi kha vona: Ina u na hehukisa mrwalo wule tate wako a nga hi khoneka, kani?

¹⁰Se vafana vale ene a nga kula navo, va to m'gela, ku kha vona: U na wombisa tiya ka vathu vale va nga womba-womba ni nawe, va txi kha vona: Tate wako a nemetisile ngutu mrwalo wawe, aniko awe hi hehukisele. Se awe koko u na va xamula, u txi khawe: Litiho langu la lidotho li dhimbile kupinda txiwunu txa tate wangu!

¹¹Ngako tate wangu a nga mi rweka mrwalo wo nemela, ani na engetela kunemela txitimwi ka mrwalo wanu; tate wangu a mi tsayisile ngu sisephu, kambe ani na mi tsayisa ngu tihume.

¹²Sekoko Jerobhowamu ni votshe vathu va to ta ka Robhowamu, ngu ditshiku da wuraru, madingano ni tile mfumeli a nga wombisa tona, a txi khene: Wuyani kwangu ngu ditshiku da wuraru.

¹³Se mfumeli a to va xamula ngu kukarata ngutu, nguko mfumeli Rebhowamu a leka wudhota wa madhota.

¹⁴Se a to va xamula mandingano ni mapswi a vafana kuloni, a txi khene: Tate wangu a nemetisile mrwalo wanu, aniko ani na engetela ku wunemeta kambe; tate wangu a mi tsayisile ngu sisephu, kambe ni na mi tsayisa ngu tihume.

¹⁵Ngu toneto, mfumeli kha engisa vathu, nguko kutxitxa kuwa ku ti ta ngu ka Txizimu, kasi ku MKOMA e tsanisa dipswi dakwe, dile a ngadi womba ka Jerobhowamu, mwana Nabhate, ngu mprofeti Ayasi, wa Silo.

¹⁶ Ngako koko, va ka Israyeli votshe va di woni taku, mfumeli kha va engisa, vathu va to xamula mfumeli, va txi kha vona: Njiavelo muni hi ku natxo athu ka Dhavhidha kani? Kha yi nga ngadi ni thomba ka mwana Jese; Israyeli, mmwani ni mmwani a na tshumelele ditendani kwakwe! Konkuwa awe Dhavhidha wonetela ta nyumba yako. Aniko votshe va ka Israyeli va to tsula matendani kwawe.

¹⁷Kambe Rebhowamu a to sala e fuma txitimwi ka vanana va ka Israyeli vale va nga ti zumba madhoropani ka Judha.

¹⁸Sekoko mfumeli Robhowamu a to rumela Adhorami, i nga ti msengisi wa mbasani; aniko vanana va ka Israyeli va to mkoyolela ngu marigwi, a txi fa; sekoko mfumeli Robhowamu a to kuluveta e kwela ka txikotxikani txakwe e tutuma eya Jerusalema.

¹⁹Ngu toneto, va ka Israyeli va to wukela nyumba ya ka Dhavhidha, kala ditshiku da nyamsi.