Read chopi 2 Makronika 11 Bible Online

2 Makronika 11 - chopi bible

2 Makronika 11

¹Ngako Robhowamu a di hokile Jerusalema, a to sengeleta va nyumba ya ka Judha ni ya ka Bhenjamini, ni 180.000 wa vale va nga sawulwa, kasi ku yalwa ni va ka Israyeli, ni kutshumeta mfumo ka Robhowamu.

²Kambe dipswi da MKOMA di to ta ka Semaya, m'thu wa Txizimu, di txi kha dona:

³Gela Robhowamu, mwana Solomoni, mfumeli wa ka Judha, ni votshe va ka Israyeli, va va ku kona Judha ni Bhenjamini, u txi khawe:

⁴MKOMA a womba tiya: Mi nga kweleleni hambi ku yalwa ni vananu; mmwani ni mmwani a na tshumelele nyumbani kwakwe, nguko ngani ni nga maha eto. Se va to engisa dipswi da MKOMA ve tshumela, ve leka kuya wukela Jerobhowamu.

⁵Se Robhowamu a to zumba Jerusalema, e aka madhoropa a mikhokhola kona Judha.

⁶A to aka koko, Bhetlehema, ni Etami, ni Tekowa,

⁷ni Bheti-Zuri, ni Soko, ni Adhulami,

⁸ni Gati, ni Maresa, ni Zifi,

⁹ni Adhorayimi, ni Lakisi, ni Azeka,

¹⁰ni Zora, ni Ayijaloni, ni Hebroni, a ma ku Judha ni Bhenjamini; madhoropa a mtamo.

¹¹Se a to tsanisa mikhokhola, e veka vathangeli ka ona, ni sizenda sa sakudya, ni mafura, ni vhinya.

¹²Se a to veka ka didhoropa dimwani ni dimwani sivhikelo ni matxhari; e ma tsanisa ngutu; kambe Judha ni Bhenjamini va to mlumba.

¹³Vaphaxeli ni Valevhi va va nga ti ka dotshe ditiko da Israyeli, va to leka ditiko dawe ve ta ti pata nayo.

¹⁴Nguko Valevhi va lekile makhalo awe o dyisela ka ona ni tithembwe tawe, veya ditikoni ka Judha ni Jerusalema, (nguko Jerobhowamu ni vanana vakwe va ti va vhalela kumaha mthumo wa MKOMA).

¹⁵ Se Robhowamu a to ti sawulela vaphaxeli vakwe e va veka mimangoni, ni va madhimoni, ni marole ale a nga ma wumba.

¹⁶Msana kwawe, totshe tihunzu ta va ka Israyeli, avale va nga lava MKOMA Txizimu txa Israyeli, ngu timbilu tawe, va toya Jerusalema kuya ningela mhamba ka MKOMA Txizimu txa vatate vawe.

¹⁷Ngu kumaha keto, va to tsanisa mfumo wa ka Judha, ve kuzetela Robhowamu, mwana Solomoni, malembe mararu, nguko va hetile malembe mararu va txi londeta nzila ya Dhavhidha ni Solomoni.

¹⁸Robhowamu a to teka Mahalati, mwana Jerimoti, mwana Dhavhidha, ni Abhiyayeli, mwana Eliyabhe, mwana Jese.

¹⁹Mahalati a to m'velekela vanana: Jewusi, ni Samariya, ni Zahami.

²⁰Msana keto, Robhowamu a to teka Mahaka, mwana Abhisalome; se Mahaka a to veleka: Abhiya, ni Atayi, ni Ziza, ni Selomite.

²¹Se Robhowamu a to randa ngutu Mahaka, mwana Abhisalome, kupinda votshe vasikati va hombe ni va vasikati vavadotho a va a nga ti navo; nguko a ti tekile digumi da vavasikati ni mtxhanu ni vararu, ni mtxhanu wa magumi ni dimwedo a sigango; kambe a to veleka magumi mambidi a vanana va majaha ni mtxhanu ni mararu, ni mtxhanu wa magumi ni dimwedo a vanana vamahorana.

²²Robhowamu a to veka Abhiya, mwana Mahaka kasiku va mthangeli hagari ka vanawe, nguko a ti lava ku mmaha mfumeli.

²³Se a to thumisa wutxhari, ka votshe vanana vakwe, vamwani a to va hangalasa ngu otshe matiko a ka Judha ni Bhenjamini, ka otshe madhoropa a hombe. A to va ninga sisangala sa sakudya sasingi ngutu, e va lavela ni dibutho da vavasikati.