Read chopi 2 Makronika 14 Bible Online

2 Makronika 14 - chopi bible

2 Makronika 14

¹Se Abhiya a to otela ni vatate vakwe, ve mtshotsha Didhoropani ka Dhavhidha; se mwanana wa kona Asa a to fuma ka wukhalo wakwe; ka masiku akwe, ditiko di to dikha digumi da malembe.

²Se Asa a to maha tile i ngadi tinene ni to lulama masoni ka MKOMA Txizimu txakwe,

³Nguko a thavisile siluvelo sa sizimu sa walo, e fayetela marigwi awe a wukhongeli, a txi wilela tiphande tawe.

⁴Se a to ruma va ka Judha kuve lava MKOMA Txizimu txa vatate vawe, ni kuwonisisa sirumo ni sileleto sa txona.

⁵Kambe a to thavisa siluvelo ni sifananiso sa ditambo, ka otshe madhoropa a ka Judha; se mfumo wa kona wu to mana kuthutha.

⁶Se a to aka madhoropa o tsana ditikoni ka Judha, nguko ditiko di ti ti thuthile, ku si na tiyimbi ka malembe ale, nguko MKOMA amu ningile kuhumula.

⁷Se Asa koko a to khene ka va ka Judha: A hi akeni madhoropa hi ma bhiya ngu maguma, ni sitezi ni matimba ma ku ni sikhweketo, na ditiko di di ngadi thuthile, hi lava MKOMA Txizimu txathu; hi mlavile se Ene a hi ningile kuhumula ngu madhawa otshe. Va to aka ve fuma.

⁸Asa ati ni dibutho da tiyimbi da 300.000 wa vathu va ka Judha, va ku ni sivhikelo ni matxhari, ni 280.000 wa va ka Bhenjamini va ku ni sivhikelo ni wulaho; votshe i di tindena ta vavamna.

⁹Zera Muetiyopiya a to huma ni dibutho da yimbi da 1.000.000 wa vavamna, kuya wukela Asa, ni 300 wa sikotxikani ve hoka Maresa.

¹⁰Sekoko Asa nene a to huma ni yimbi yakwe, ku yalwa libalani ka Zefata hafuhi ni Maresa.

¹¹Asa a to dila ka MKOMA, Txizimu txakwe, a txi khene: MKOMA, kha ngaho awu a kotako kuvhuna vathu va vo pwata mtamo, hi vhune MKOMA Txizimu txathu, nguko hi thembile awe, hi xomile yimbi ngu ditina dako ku yalwa ni vathu vava, MKOMA Txizimu txathu, kha ku na m'thu awu a kuxulako.

¹²MKOMA a to dayela va Etiyopiya masoni ka Asa, ni masoni ka va ka Judha, se va Etiyopiya ve tutuma.

¹³Se Asa ni vathu vakwe, va to va tutumisa kala Gerara, ku wetetela Vaetiyopiya vavangi, ku si sale ni wammweyo, nguko va to dayelwa masoni ka MKOMA ni masoni ka dibutho dakwe, va to handa simaha sasingi ngutu.

¹⁴Va to xasela madhoropa otshe ale ma nga ti ti hafuhi ni Gerara, nguko va ti ti thavile MKOMA, va tekile otshe madhoropa, nguko ma ti ti ni thomba yayingi.

¹⁵Va to haxulela matenda, ve handa sifuyo, ve teka ni tinvuta ni makamelu ve tshumela ve tsula Jerusalema.