Read chopi 2 Makronika 19 Bible Online

2 Makronika 19 - chopi bible

2 Makronika 19

¹Se Josafati, mfumeli wa Judha, a to tshumela ngu kuthutha eya nyumbani kwakwe Jerusalema.

²Se Jewu mwana Hanani, m'huti, a to mu hingeta a txi khene ka mfumeli Josafati: Ngu kutxani u vhuna vabihi, u randa ava va nyenyako MKOMA kani? Ngu mhaka yeto, kuhenya ka MKOMA ku nata txitimwi kwako.

³Hambi keto, ku ni timhaka ta tinene a ti u nga ti maha, nguko u thavisile sipopo amu ditikoni, u lava MKOMA ngu mbilu yako yotshe.

⁴Josafati koko a to zumba Jerusalema, a txi tolovela kuya dingula vathu vakwe, kukhukhela Bherisebha kala mimangoni ka Efrayime, a txi va kombelela kuva txi tshumelela ka MKOMA, Txizimu txa vatate vawe.

⁵Se a to veka valamuli ditikoni ka madhoropa otshe a hombe, ka didhoropa ni didhoropa.

⁶A txi gela valamuli a txi khene: Ti woneleni ka ti mi no ti maha, nguko kha mi lamuli ngu kurumwa ngu vathu kambe mi rumwa ngu MKOMA, ene ani nanu ka mthumo wo lamula.

⁷Konkuwa koko, thavani MKOMA, mi vekisa ni kuxayisa sileleto sakwe nguko kha ku na kukanganyisa ka MKOMA Txizimu txathu, hambi kuya ngu khohe ya m'thu, hambi kuamukela simaha.

⁸Se Josafati a to veka kambe Valevhi vokari, ni vaphaxeli, ni vathangeli va vatate va ka Israyeli, e va veka ka mthumo wo lamula timhaka ta MKOMA ni ta vathu, kona Jerusalema.

⁹Atxi va ninga mthetho, a txi khene: Sekoko mahani eto ngu kuthava MKOMA ni ngu kuthembeka ni wumbilu.

¹⁰Vananu ava va zumbako madhoropani kwanu va na mi tisela timhaka ti ti humelela timwayani kwawe,

¹¹Tiziveni ti to Amariya, mphaxeli wa hombe a na va i di mthangeli wanu ka toshe timhaka ti ti lumbako MKOMA; se ka timhaka ta mfumo, mi na thangelwa ngu Zebhadhiya, mwana Ismayeli, mthangeli wa nyumba ya va ka Judha. Valevhi va na vhunetela ka mithumo ya dibhazani. Thumani mi di tsani, MKOMA a na va ni vale va kululama.