Read chopi 2 Makronika 2 Bible Online

2 Makronika 2 - chopi bible

2 Makronika 2

¹Se Solomoni a to ti lulamisela kuakela nyumba ditina da MKOMA, ni nyumba ya mfumo wakwe.

²Se Solomoni a to bala 70.000 wa vavamna vo rwala siya, 80.000 vo wilela marigwi mmangoni, ni 3.600 wa vawoneleli va mthumo.

³Solomoni a to rumela dipswi ka Hiramu, mfumeli wa Tiro, a txi khene: Ngako u nga rumela tate wangu mikedhari yo aka ngu yona nyumba yo e zumba ka yona, ni mahele toneto nani.

⁴Wonani ku ni lava kuakela nyumba ditina da MKOMA, Txizimu txangu, kasi ku ni na mu dhumisa, ni ku m'hisela dibaselo do bhumula, ni kuveka dipawu da masiku otshe, ni mningelo wo hiswa wa mixo ni wa mitshikari, ni wa Masabhata, ni wa mitxima ya yiphya, ni mibuso ya MKOMA Txizimu txathu; i ku fanelo ya va ka Israyeli ya mbimo yotshe.

⁵Se nyumba yi ni ku na yi aka yi na va ya hombe, nguko Txizimu txathu nja hombe kupinda sizimu sotshe.

⁶ Kambe i mani a nga vako ni mtamo waku muakela nyumba, nguko hambi nzuma kala ka nzuma ya tinzuma kha eneli ka tona kani? Niku ni mani ani, wo ni nga muakela nyumba, yo hisela ka yona dibaselo masoni kwakwe kani?

⁷Ni rumele koko konkuwa m'thu wa wuzivi kuva a txi na thuma ngu nzalama, ni silivhela, ni msuku, ni tisimbi, ni purpura ni karmezimi, ni ya lixaka la nzumani, ni m'thu wo ziva kuvata marigwi, va ku na thuma kumweko ni sizivi si si ku ni nani ani Judha ni Jerusalema, asi si nga vekiswa ngu Dhavhidha tate wangu.

⁸Ni rumele kambe mapulango a mikedhari, mafaya, ni algumini a Libhanoni; nguko na tiziva ta ku sithumi sako sa tiziva kuwila mapulango ani Libhanoni; se sithumi sangu si na va ni sithumi sako,

⁹eto kasiku ve longisela mapulango; nguko nyumba yi ni lavako ku yi aka yi na va ya hombe yi na va yo tshura.

¹⁰Se sithumi sako si si ku na wila mapulango, na si ninga 20.000 wa mimovha yo tala ngu fulaho yo hulwa, ni 20.000 wa mimovha yo tala ngu sevhadha, ni 20.000 wa mapipa a vhinyo, ni 20.000 wa mapipa o tala ngu mtona.

¹¹Se Hiramu, mfumeli wa Tiro, a xamute ngu kubhala e rumela ka mfumeli Solomoni a txi khene: MKOMA a ngadi a txi randa vathu vakwe, a kuvekile kuva mfumeli wawe.

¹²Hiramu a to womba kambe a txi khene: Kukateka ku nave ka MKOMA Txizimu txa Israyeli, txi nga maha nzuma ni mafu, txi nga ninga Dhavhidha, mwanana wa wuzivi, wa wutxhari wa hombe ni kupfisisa, a na ake Nyumba ya MKOMA ni ya mfumo wakwe.

¹³Konkuwa se ni kurumela m'thu wa wuzivi, ni kupfisisa ngutu ta tinene, i ku Hirawu-Abhi,

¹⁴mwanana wa wamsikati mmweyo wa vanana va Dhani, awu tate wakwe i nga ti ti wa Tiro; awuwa wa sikota kukela nzalama, ni silivhela, ni msuku, ni tisimbi, ni mapulango, ni ngu kuluka linyu ngu purpura, ni nguwo wa mxaka wa nzumani, ni ngu linyu yo songa, ni ngu karmezimi, futhi wa txarihisela ka mthumo wo vata marigwi, ni sotshe sa kumahwa ngu wutxhari, tximaha txihi ni txihi a gelwako ku tximaha, kumweko ni sizivi sako ni sizivi sa Dhavhidha, nyamne wangu ni tate wako.

¹⁵Konkuwa, nyamne wangu rumela fulaho ka sithumi sako, ni sevhadha, ni mafura ni vinya asi a nga womba-womba ngu sona.

¹⁶Se athu hi na wila mapulango amangi ani Libhanoni, hi ma wuyisa ngu mambale, ngu linene ani Jope, se awe u na ma teka u ma yisa Jerusalema.

¹⁷Se Solomoni a to bala votshe vavamna va kuta ngu ka matiko mamwani va nga ti ti ho ka ditiko da Israyeli, madingano ni mtengo wu u nga ti ti batwe ngu Dhavhidha, tate wakwe, se ku manekile 153.600.

¹⁸A to teka 700.000 e va ninga mthumo wo rwalela so aka ngu sona, 8.000 wa vo wilela marigwi mmangoni, ni 3.600 wa va woneteli va mimthumo ya vathu.