Read chopi 2 Makronika 21 Bible Online

2 Makronika 21 - chopi bible

2 Makronika 21

¹Msana keto, Josafati a to otela ni vatate vakwe, e tshotshwa ka wukhalo wumwewo ni vatate vakwe, Didhoropani ka Dhavhidha; se mwanana wakwe Jehoramu a to fuma ka wukhalo wakwe.

²Se a ti ti ni vanawe, i ku vanana va Josafati: Azariya, Jeyelini, Zakariya, Azariyawu, Mikayeli ni Sefatiya; votshe va va i ti ti vanana va Josafati mfumeli wa ka Israyeli.

³Kambe tate wawe a va ningile tithomba tatingi, ta silivhela, ni ta nzalama, ni simwani simaha sa lisima, ni madhoropa a mikhokhola ya va ka Judha, se wukoma a to ninga Jehoramu, nguko ngene matiwula.

⁴Se ngako Jehoramu a di khalahatshile ka wukoma wa tate wakwe ni ngako a di tsani, a to daya voshe vanawe ngu ditxhari e daya ni vathangeli vamwani va ka Israyeli.

⁵Jehoramu a khatile kufuma a ti ni tanga ya magumi mararu a malembe ni malembe mambidi, a to fuma Jerusalema mtxhanu wa malembe ni mararu.

⁶Se a to tsimbila ngu tinzila ta vafumeli va ka Israyeli, nga tile va nga mahisa tona va nyumba ya ka Akabe; nguko msikati wakwe i ti ti mwanana wa Akabe, a to maha wubihi masoni ka MKOMA.

⁷ Hambi keto, MKOMA kha ti lava kukhundumusa nyumba ya ka Dhavhidha, ngu mhaka ya txitumelelano a txi a nga ti tximahile ni Dhavhidha, nga ha a nga ti m'gete ku khene a na mninga liwoningo la masiku otshe ene ni vanana vakwe.

⁸Ka masiku a Jehoramu, va ka Edhomi va to lwisa mfumo wa ka Judha, se ve ti vekela mfumeli txitimwi kwawe.

⁹Sekoko Jehoramu a to pinda ni vathangeli vakwe, ni sotshe sikotxikani sakwe; se ene a to wuka ni wusiku e lwisa va ka Edhomi ni vathangeli va sikotxikani va nga ti ti mrandete.

¹⁰Ngu maha yeto, va ka Edhomi va to wukela mfumo wa ka Judha kala ka ditshiku da nyamsi; ka yoneyo mbimo Libhina nene a to vhutuka, nguko Jehoramu a ti ti lekile MKOMA Txizimu txa vatate vakwe.

¹¹A to maha makhalo o guleka amu mimangoni ka va ka Judha, a kujetela vathu va Jerusalema kuva txi onha ni va ka Judha e va yisa ka toneto.

¹²Sekoko mprofeti Eliya a to bhalela Jehoramu, a txi khene: MKOMA, Txizimu txa tate wako Dhavhidha a khene: U lekile kutsimbila ngu tinzila ta Josafati tate wako ni ta Asa mfumeli wa Judha,

¹³kambe u tsimbila ngu tinzila ta vafumeli va Israyeli, u mahile ti to va ka Judha ni vahanyi va Jerusalema va txi onha, ve londeta wubihi kufana ni va nyumba ya ka Akabe; kambe u date ni vananu, va nyumba ya tate wako, ava i nga ti ti vavanene kupinda awe.

¹⁴Ngu toneto, MKOMA a na ku wuyisela wulwati wa hombe ngutu, hagari ka vathu vako, ni ka vanana vako, ni ka vasikati vako ni ka sotshe asi u ku naso.

¹⁵Na nawe, u na lwala ngu wulwati wa hombe wa mndani, awu wu no kula kala kuza masembe ako me huma.

¹⁶MKOMA a to maha ti to Vafilista ni Vaarabhi, va va hanyako hafuhi ni Vaetiyopiya, ve wukela Jehoramu.

¹⁷Va to kwelela veya ditikoni da Judha, veya lwisa Jehoramu, va to teka yotshe thomba ya nyumbani ka mfumeli, ve ñola vasikati vakwe ni vanana vakwe; ve siya dwe Jehohakazi, mwanana wakwe wo gwita.

¹⁸Se msana ka totshe tiya, MKOMA a to peka Jehoramu ngu wulwati wo thisa wo mbi thumwa.

¹⁹Se ku to maheka tito, ku di pindile masiku o tala, kugumani ka dilembe da wumbidi, a to huma masembe ngu kukula ka malwati, se efa a txi lwala ngutu; kambe vathu vakwe kha va muhiselo dibaselo, kufana ni kule va nga hisela vatate vakwe.

²⁰A khatile kufuma a ti ni tanga ya magumi mararu a malembe ni malembe mambidi, a to fuma Jerusalema mtxhanu wa malembe ni mararu; a to fa, asi dilwi ngu m'thu, ve mtshotsha Didhoropani ka Dhavhidha, hambi keto, kha ya tshotshwa ka mathitha a vafumeli.