Read chopi 2 Makronika 23 Bible Online

2 Makronika 23 - chopi bible

2 Makronika 23

¹Aniko ka dilembe da wutxhanu ni mambidi, Joyadha a to tsana, e maha txitumelelano ni vathangeli va mazana: Azariya, mwana Jerowami, ni Isumayeli mwana Jowanani, ni Azariya mwana Obhedhi, ni Mahaseya mwana Adhaya, ni Elisafati mwana Zikiri.

²Va to randela ditiko da ka Judha, ve sengeleta Valevhi va otshe madhoropa a Judha, ni vathangeli va vatate va ka Israyeli, veta Jerusalema.

³ Se wotshe msengeletano wule wu to maha txitumelelano ni mfumeli Nyumbani ka Txizimu; se Joyadha a to khene kwawe: Wonani, mwanana wa mfumeli a na fuma, nga ha MKOMA a nga womba madingano ni vanana va Dhavhidha.

⁴Atiya ngu ti mi fanelako timaha: Mpimo wanu wa wuraru, vaphaxeli ni Valevhi ava va wulelako mthumoni ngu mgivela va na wonelela sike;

⁵se mpimo wumwani wa wuraru wu na va nyumbani ka mfumeli, se mpimo wumwani wa wuraru wu na va ka txike txa makhato; se votshe vathu va na va mtendelani ka Nyumba ya MKOMA.

⁶Aniko kha ku na wu a no wulela Nyumbani ka MKOMA, hahanze ka vaphaxeli ni Valevhi vale va thumako; evo va na wulela nguko va sawulekile, kambe votshe vathu va na vekisa txileleto txa MKOMA.

⁷Se Valevhi va na randela mfumeli, mmweyo ni mmweyo ni matxhari akwe manzani, kambe ni wuhi wu a no wulela nyumbani a na dawa; aniko anu mi na va ni mfumeli mbimo yo wulela ni yo huma.

⁸Se Valevhi ni votshe va ka Judha va to maha madingano ni totshe ti a nga leletisa tona mphaxeli Joyadha; mmweyo ni mmweyo a to teka vathu vakwe, avale va nga txi wulela kumweko ni vale va nga txi huma ngu Sabbata; nguko mphaxeli Joyadha a sa tshumeta mitxawa.

⁹Mphaxeli Joyadha a to ninga vathangeli va mazana matxhari ni sivhikelo si i nga ti sa mfumeli Dhavhidha, sile si nga ti Nyumbani ka Txizimu.

¹⁰Se vathu votshe va to emeka, mmweyo ni mmweyo ni matxhari manzani, kukhukhela ka didhawa da txinene kala ka didhawa da txibhabha ka nyumba, ngu didhawa da txiluveloni ni da nyumba, ve randela mfumeli.

¹¹Sekoko va to humisa mwanana wa mfumeli hahanze, ve msanzeka m'bhoti, ve mninga ni dibhuku da mlayo, ve mmaha mfumeli; se Joyadha ni vanana vakwe va to mtota mafura, va txi kha vona: A na hanye mfumeli!

¹²Se mbimo yi koko Ataliya a nga pfa diguwa da vathu vale va nga txi tutuma va txi dhumisa mfumeli, a to ta wulela Nyumbani ka MKOMA.

¹³Se a to wona mfumeli a di emile hafuhi ni phande, ha txikeni, vathangeli ni mipundu va di hafuhi ni mfumeli; vathu votshe va ditiko va ti tsakile, va txi veta mipundu, vaembeleli ni vona va txi veta timbila, na va txi embelela tindando ta kubonga; sekoko Ataliya a to vharula syambalo sakwe e dila, a txi khene: Kuxengwoo! Kuxengwoo!

¹⁴Kambe mphaxeli Joyadha a to gela vathangeli tile ti nga txi thangela mabutho, a txi khene: M'humiseni hagri ka vathu, kambe wule a no mlondeta a na dawe ngu ditxhari; nguko mphaxeli a ti khene: Mi nga m'dayeleni Nyumbani ka MKOMA.

¹⁵Se va to mñola, ve tsula nayo nyumbani ka mfumeli ngu didhawa da txike txa Ditimba da Mahantxhi, veya m'dayela kona.

¹⁶Se Joyadha a to maha txitumelelano hagari kwakwe ni vathu ni mfumeli, ti to vona va na va vathu va MKOMA.

¹⁷Msana keto, votshe vathu va to wulela nyumbani ka Bhahali, ve yi khundumusa, va to fayetela siluvelo sakwe ni sithombe sakwe, se Matani mphaxeli wa Bhahali va to m'dayela masoni ka siluvelo.

¹⁸Se Joyadha a to veka vaxayisi Nyumbani ka MKOMA, ve va hahatshi ka vaphaxeli, Valevhi vale Dhavhidha a nga va veka Nyumbani ka MKOMA, kasi kuningela mphaxo wo hiswa ka MKOMA, madingano ni tile ti nga bhalwa amu ka Mlayo wa Mosi, ngu kutsaka ni kuembelela, madingano ni kuleleta ka Dhavhidha.

¹⁹Se a to veka vawoneleli va sike sa Nyumba ya MKOMA, kasi ku ku si wuleli awule a nga nyenyeziswa ngu mhaka yokari.

²⁰A to teka vathangeli ta mazana ni tindena, ni vafumeli va vathu, ni votshe vathu va ditiko, va to relelisa mfumeli e huma Nyumbani ka MKOMA, veya wulela nyumbani ka mfumeli ngu txike txa hombe, veya mu veka ha txituluni kwakwe ka wukoma.

²¹Se votshe vathu va ditiko va to tsaka, ni didhoropa di to mana kudikha, msana ka kuva va di date Ataliya ngu ditxhari.