Read chopi 2 Makronika 24 Bible Online

2 Makronika 24 - chopi bible

2 Makronika 24

¹Jowasi a ti ti ni mtxhanu wa malembe ni mambidi mbimo yile a nga khata kufuma. A to fuma mune wa magumi a malembe kona Jerusalema; Ditina da mame wakwe i ti ti Zibhiya, wa Bherisebha.

²Se Jowasi a to maha kululama masoni ka MKOMA, otshe masiku a mphaxeli Joyadha.

³Se Joyadha a to mu lowolela vasikati vambidi; e veleka vanana va majaha ni vamahorana.

⁴Kumaheka tito, msana keto, Joyadha a to pimisa kuaketa Nyumba ya MKOMA.

⁵A to dhana vaphaxeli ni Valevhi, a txi va gela ku khene: Hangalakani ngu madhoropa a va ka Judha, mi sengisa male ka votshe va ka Israyeli, kasi ku hi txi longiseta Nyumba ya Txizimu txanu, dilembe ni dilembe, kuluvetani ni mhaka yiya. Kambe Valevhi kha va kuluveta.

⁶Se mfumeli a to dhana mthangeli Joyadha, a txi khene kwakwe: Ngu kutxani u nga mbi gela Valevhi kuneha siningo si si nga leletelwa ngu Mosi, txithumi txa MKOMA, msengeletanoni ka va ka Israyeli, si humako ditikoni ka Judha ni Jerusalema, kasi ku si maha sa Ditenda da Wufakazi kani?

⁷Nguko Ataliya awule wamsikati wo biha, kumweko ni vanana vakwe va onhetete Nyumba ya Txizimu, va to teka siya so sawuleka sa Nyumbani ka MKOMA veya sithumisa ka va ka Bhahali.

⁸Se mfumeli a leleta ti to kuvatwa dibhokiso, ve di veka hahanze ka txike txa Nyumba ya MKOMA.

⁹Se va to gela va ka Judha ni va Jerusalema, ti to ve yisa mningelo ka MKOMA, awule Mosi txithumi txa Txizimu a nga leleta va ka Israyeli va di txiwulani.

¹⁰Sekoko vathangeli kumweko ni vathu votshe va to tala ngu kutsaka, va to tisa mningelo wawe va ta wu veka amu ka dibhokiso, kala kuza mthumo wu txi guma.

¹¹Mbimo yile va nga wona taku ku ni male yayingi amule ka dibhokiso, mabhalani wa mfumeli a ti ti kwelela kumweko ni mphaxeli wa hombe, va txi ya balela male yile yi nga txi maneka Nyumbani ka MKOMA, ve theletela mu ka masaka.

¹²Se mfumeli Jowasi kumweko ni mphaxeli Joyadha va to ningela male mazani ka vathangeli va kuakwa ka Nyumba ya MKOMA, se vona va txi hakela vaaki ni vavati, ni vatshuli va tisimbi kasi kuva txi longiseta Nyumba ya MKOMA.

¹³Vathangeli va mthumo va to yisa masoni mthumo wa kuaketa Nyumba ya MKOMA.

¹⁴Se msana ka kuheta mthumo wawe, va to wuyisa male yi yi nga sala masoni ka mfumeli Jowasi, ni ka mphaxeli Joyadha. Va to ya xava ngu yona siya sa Nyumbani ka MKOMA, i ku siponi ni siya so mahwa ngu silivhela ni sa nzalama. Se ve hamba ve humisa mningelo wo hiswa Nyumbani ka MKOMA.

¹⁵Se Joyadha a to hanya malembe amangi ngutu, a to fa, a di ni tanga ya 130 wa malembe.

¹⁶Se va to mtshotsha Didhoropani ka Dhavhidha, kumweko ni vafumeli vamwani, nguko a ti ti mahile to lulama masoni ka va ka Israyeli, ni ka Txizimu, ni ka nyumba ya txona.

¹⁷Sekoko msana ka kufa ka mphaxeli Joyadha, vathangeli va ka Judha va to ta ti veka hahatshi masoni ka mfumeli, ene a to va engisa ngu kutsaka.

¹⁸Va to leka Nyumba ya MKOMA, Txizimu txa vatate vawe, veya khozela sithombe so vatwa ni sizimu simwani sawe. Se ngu mhakeyo MKOMA a to henyela va ka Judha ni va Jerusalema.

¹⁹A to rumela vaprofeti hagari kwawe, kasi ku e va wuyisa kambe ka MKOMA, kambe vona kha va lava ku mu engisa.

²⁰Se Moya wa Txizimu wu to ta ka Azariya, mwana mphaxeli Joyadha, awule a nga ema masoni ka vathu, a txi khene kwawe: Txizimu txi kha txona: Ngu kutxani mi hambuka ka milayo ya MKOMA kani? Ngu konaho MKOMA nene a na mi leka.

²¹Va to sunga txikungo txo m'daya, ve m'balisela ngu marigwi, ka mtendela wa Nyumba ya MKOMA, madingano ni kuruma ka mfumeli.

²²Mfumeli Jowasi kha khumbula wunene awule mphaxeli Joyadha, tate wa Zakariya a nga mmahela wona. A to m'dayela mwanana wakwe, awule mbimo yile a nga ti lava kufa a nga khene: MKOMA, wona a ti va ti mahako, wu va tshumetela!

²³Sekoko kugumani ka dilembe, dibutho da yimbi da Siriya di to kwela ku yalwa nayo, ve dhumela ditiko da Judha ni da Jerusalema, va to dayela votshe vathangeli va ditiko, ve teka sotshe siya asile va nga honyola ve si rumela ka mfumeli wa Dhamasku.

²⁴Hambi ku va Siriya va ngata ni dibutho da vathu vavadotho, MKOMA a to ningela manzani kwawe, dibutho da vathu vavangi, nguko va lekile MKOMA Txizimu txa vatate vawe. Jowasi a to pekwa ngu Txizimu ngu diwoko da Vasiriya.

²⁵Se va to khukha va mu siya atxi lwala ngutu, tikhumbi takwe ti to sunga txikungo txo m'daya, ngu mhaka yaku a nga daya mwanana wa mphaxeli Joyadha, se va m'daya ha m'bhedhuni kwakwe. A to tshotshwa didhoropani ka Dhavhidha kambe va ka mtshotsha ka mathitha a vafumeli.

²⁶Ava va nga sunga txikungo txa kona ngu vava: Zabhadhi mwana Simeyate, wa ka Amoni, ni Jozabhadhi, mwana Sinirite, wa va ka Mowabhi.

²⁷Timhaka ta vanana vakwe ni wuhombe wa mthumo wakwe ni kuaketwa ka Nyumba ya Txizimu, ti bhatwe amu ka dibhuku da matimu a vafumeli. Se mwanana wakwe Amaziya, a to fuma ka wukhalo wakwe.