Read chopi 2 Makronika 26 Bible Online

2 Makronika 26 - chopi bible

2 Makronika 26

¹Se votshe vathu va ka Judha va to teka Uziya, a nga ti ti ni digumi da malembe ni mtxhanu ni dimwedo, va to mfumisa wukhaloni ka tate wakwe Amaziya.

²Uziya a to aka didhoropa da Elate e di tshumetela Judha, msana ka kuva mfumeli a di otete ka vatate vakwe.

³Uziya a to khata kufuma ni digumi da malembe ni mtxhanu ni dimwedo, a to fuma mtxhanu wa magumi a malembe ni mtxhanu Jerusalema. Ditina da mwamwakwe i ti ti Jekoliya wa Jerusalema.

⁴A to maha tile i ngadi ta tinene masoni ka MKOMA, kufana ni tosthe tile a nga mahisa tona tate wakwe Amaziya.

⁵Nguko a ti karatile ngu kulava MKOMA, ka masiku a Zakariya txizivi txa siwoniso sa Txizimu; ka masiku otshe ale a nga lava MKOMA, Txizimu txi to mkatekisa.

⁶Se a to huma ni yimbi yakwe a yalwa ni Vafilista, a to khundumusela diguma da Gati, ni diguma da Jabhini ni da Asidhodhi, a to aka madhoropa ditikoni da Asidhodhi ni ditikoni da Vafilista.

⁷Se Txizimu txi to m'vhuna kuxula Vafilista ni maarhabi a ma zumbako Guri-Bhahali, a txi xula ni Vamewuni.

⁸Va ka Amoni va to mu tisela simaha sokari va ta muha, se wudhumo wakwe u hangalaka kala mihinganoni ka Egipta, nguko i ti ti m'thu wa mtamo ngutu.

⁹Kambe Uziya a to aka sitezi kona Jerusalema, ka Txike txa Dikhonani ni ka Txike txa Mkovani, e si tsanisa.

¹⁰A to aka mikhokhola ya hombe txivulani, a to kela sisima sasingi, nguko a ti ti ni sifuyo so tala mikovani ni tibalani; ni vadimi va tithembwe ta mivhinya, mimangoni ni ka tithembwe to nona, nguko a ti ti dhunda ngutu kudima.

¹¹Kambe Uziya a ti ti ni dibutho da yimbi da vavamna vo ziva kuthumisa matxhari, va to huma veya kulwani ngu mitxawa, va to tsula ngu mtengo wule wu nga balwa ngu Jeyeli mabhalani, ni Mahaseya mthangeli, va txi thangelwa ngu Ananiya mmweyo wa vathangeli va mfumeli.

¹²Mtxawa wuwa wu ti thangelwa ngu vathangeli va 2.600 wa vavamna wa mtamo.

¹³Se hahatshi kwakwe ku di ni dibutho da yimbi da 307.500 wa va vammna va mtamo, va va zivako kulwa yimbi, ve lwela mfumeli ka valala vakwe.

¹⁴Uziya a to longisela sivhikelo ni matxhari, ni sigoko, ni sikatawu so vhika ngu sona, ni malaho, ni sibhalakaza, e ninga dibutho dotshe da yimbi.

¹⁵Se titxhari ti to maha mitxhini, e yi veka amu ka sitezi ni mu ka makhona a Jerusalema, kasi kuve txopa ngu yona marigwi a hombe. Wudhumo wakwe wu to hangalaka ka matiko otshe, nguko MKOMA a ti ti vhunetela ngu nzila yo xamalisa kala ku a txi tsana.

¹⁶Mbimo yile Uziya a nga wona ti to wukoma wakwe wu tsani, mbilu yakwe yi to khata kutikulisa, e ndaka Mlayo wa MKOMA Txizimu txakwe, a to wulela Nyumbani ka MKOMA e hisa dibaselo ha txiluveloni ka dibaselo.

¹⁷Mphaxeli Azariya kumweko ni vaphaxeli vamwani va mtxhanu wa magumi ni magumi mararu, va to mlondeta ngu msana,

¹⁸Ve ya wulela ve mtsimba mfumeli Uziya, va txi kha vona: Uziya, mthumo wo hisa dibaselo masoni ka MKOMA hi nga wako, mbwa vaphaxeli, vanana va Aroni, a va hi ku vona va nga sawulwa kuhisa dibaselo, huma dithepeleni muwa! Mhaka yi u yi mahako kha yi na kutsanisa kukatekiswa ngu MKOMA Txizimu.

¹⁹Sekoko, Uziya a to henya, manzani kwakwe a di ni txikadyana txo hisela ka txona dibaselo; mbimo yoneyo a to khatwa ngu wulwati wa xokonho, yi to huma ngu ha ka banza yakwe, a di emile masoni ka vaphaxeli, Nyumbani ka MKOMA, hafuhi ni txiluvelo txa dibaselo.

²⁰Se Azariya mphaxeli wa hombe ni vaphaxeli vamwani, va to wona ti to a ni xokonho ka banza yakwe, ve kuluveta ve mretha e huma hahanze, nene a to huma ngu kukuluveta, nguko MKOMA a ti mupekile.

²¹Kukhukhela ka ditshiku donedo mfumeli Uziya a to karatwa ngu xokonho kala kuza efa. A ti ti zumba ka nyumba ayi yi nga ti dawani, va si mtumeleli kuwulela Nyumbani ka MKOMA. Se Jothamu, mwana Uziya, a to fuma ka wukhalo wakwe, ni kulamula timhaka ta vathu va ditiko.

²²Mithumo yotshe ya Uziya yo khata ni yo hetelela yi bhatwe ngu mprofeti Isaya, mwana Amosi.

²³ Uziya a to otela ka vatate vakwe, a tshotshwa Jerusalema, mathithani ka vafumeli vamwani, hahanze ka m'ti, nguko va ti kha vona: Mbwa xokonho. Se Jothamu mwanakwe a to sala a fuma ka wukhalo wakwe.