Read chopi 2 Makronika 28 Bible Online

2 Makronika 28 - chopi bible

2 Makronika 28

¹Akazi a to khata kufuma a di ni tanga ya magumi mambidi a malembe, se a to fuma digumi da malembe ni mtxhanu ni dimwendo kona Jerusalema; aniko kha maha to lulama masoni ka MKOMA, ku nga tate wakwe Dhavhidha.

²Nguko a tsimbite ngu tinzila ta vafumeli va ka Israyeli, hahanze keto, a to vata sithombe sa va ka bahali.

³Kambe a to hisa dibaselo mkovani ka Mwana Hinomi, hambi vanana vakwe a mahile ngu vona mningelo wo hiswa, ngu wubihi wa vawuyi vale MKOMA a nga ti ti va tshotshile kule ni vanana va ka Israyeli.

⁴Kambe a mahile miphaxo ni kuhisa dibaselo ka makhalo o guleka ni simangwanani, ni hahatshi ka yotshe mindonga ya ku nakana.

⁵ MKOMA Txizimu txakwe txi to mningela manzani ka vafumeli va Siriya. Vasiriya va to mxasela ve teka ni vathu vakwe ve va yisa Dhamasku. Akazi a to ningelwa manzani ka mfumeli wa va ka Israyeli, se Vaisrayeli va to mxula.

⁶Peka mwana Remaliya, a to daya 120.000 wa vavamna va ka Judha ngu ditshiku dimwedo, hambi ku votshe i nga ti tindena, ngu ku va lekile MKOMA Txizimu txa vatate vawe.

⁷Se Zikiri, ndena ya ka Efrayime, a to daya Mahaseya, mwana mfumeli, ni Azirikami, mxayisi wa thomba, ni Elikana, m'vhuni wa mfumeli.

⁸Se vanana va ka Israyeli va to ñola 200.000 wa va ka Judha, vavasikati, majaha ni mahorana, va to teka simaha sasingi ve si wuyisa Samariya.

⁹Ku di ni wammweyo wa mprofeti wa MKOMA, ditina dakwe i ti ti Obhedhi, se mbimo yi dibutho di nga ti wuya ngu Samariya, a to huma e va hingeta a txi khene: MKOMA Txizimu txa vatate vanu, a henyete va ka Judha, a va ningela manzani kwanu, mi va daya ngu tshiku yile yi nga hoka ni nzumani.

¹⁰Se konkuwa mi ni txikungo txo xanisa vanana va ka Judha ni va Jerusalema, mi va maha tikhumbi. Ina hi nga anu kani mi ku ni mnandu ka MKOMA Txizimu txanu?

¹¹Ngu mhaka eto, ni engiseni! Ni khani tshumetani tikhumbi vananu ava mi nga va ñola, va lekeni ve titsulela, nguko kuhenya ka MKOMA ku na wela txitimwi kwanu.

¹²Sekoko vamwevo hagari ka vathangeli va vanana va ka Efrayime, i ku Azariya, mwana Jowanani, ni Bherekiya, mwana Mesilemoti, ni Jeyizikiya, mwana Salumi, ni Amasa, mwana Hadhilayi, va to wukela mtxawa wu wu nga ti wuya ngu kulwani.

¹³Va txi kha vona: Mi nga wuletiseni tikhumbi tiya amuwa, nguko mi nga hi engetela sionho sathu ni minandu yathu ka MKOMA, mnandu wathu mbwa hombe ni kuhenya ka hombe ka MKOMA ku txitimwi ka vanana va ka Israyeli.

¹⁴Se vavamna vale va yimbi va to siya tikhumbi ni sile va nga wuya naso masoni ka vathangeli ni ka wotshe msengeletano.

¹⁵Se vavamna vale va nga dhanwa ngu matina awe, va to khukha ve teka tikhumbi totshe ti ti nga ti siya ambala txilo ve ti ambeka syambalo sile va nga ti ti honyote, ve va ninga tikathula, ve va tota mafura, va va ninga sakudya ni sa kusela. Votshe vale va nga ti gumile mtamo va to va teka ngu timbongola ve tsula navo Jeriko ka didhoropa da mitxhese ka vanawe; msana keto, va to tshumela veya Samariya.

¹⁶Ka yoneyo mbimo, mfumeli Akazi, a to rumela txikombelo ka vafumeli va Asiriya, kasi kuvata m'vhuna.

¹⁷Va ka Edhomi va to ta ve talwa ni va ka Judha, va to ñola tikhumbi ve tsula nato.

¹⁸Ni vona Vafilista va to dhumela madhoropa a mikovani ni a wulambwe ka Judha, se va to teka Bheti-Xemexe, ni Ayijaloni, ni Gedheroti, ni Soko ni makhalo akwe o mlumba, ni Timana ni makhalo akwe o mu lumba, ni Gimizo ni makhalo akwe o mu lumba, ve zumba ka ona.

¹⁹Nguko MKOMA a vekile hahatshi va Judha ngu mhaka ya Akazi, mfumeli wa Israyeli, nguko Akazi a jikisile va ka Judha ve leka kulondetela nzila ya MKOMA.

²⁰Se Tigilati-Pileseri, mfumeli wa Asiriya, a tota kwakwe e ta mu xanisa e mmaha mlala wakwe, asi mfeleli.

²¹Nguko a to teka sa Nyumba ya MKOMA ni sa nyumba ya mfumeli, ni sa vathangeli, e siningela ka mfumeli wa Asiriya, hambi keto kha ta m'vhuna txilo.

²²Hambi kule a nga ti ti kuxanisekani, mfumeli Akazi a toya masoni e onhela MKOMA.

²³Nguko a to phaxela ka sizimu sa Dhamasku, sile si nga mxula, se a nje khene: Ngako sizimu sa vafumeli va Siriya si nga va vhuna, ni na si mahela miphaxo, kasi ku si na ni vhuna. Aniko si to va lovisa vona, ni va ka Israyeli.

²⁴Kambe Akazi a to sengeleta siya sa Nyumbani ka Txizimu e si fayetela, e vhala matimba a Nyumbani ka MKOMA. Se a to ti akela siluvelo ka madhawa otshe a Jerusalema.

²⁵Ni ka madhoropa otshe a ditiko da ka Judha a to aka makhalo o guleka kasi kuhisela ka ona dibaselo da simwani sizimu; ngu kumaha keto, a to wusa kuhenya ka MKOMA, Txizimu txa vatate vakwe.

²⁶Se yimwani mithumo yakwe ni timhaka totshe ta wutomi wakwe to khata ni to gwita, ti bhatwe amu ka dibhuku da matimu a vafumeli va ka Judha ni va ka Israyeli.

²⁷ Akazi a to otela ni vatate vakwe, veya mtshotsha didhoropani ka Jerusalema, aniko kha va m'veka ka mathitha a vafumeli va ka Israyeli, se mwanana wakwe Ezekhiya, a to fuma ka wukhalo wakwe.