Read chopi 2 Makronika 29 Bible Online

2 Makronika 29 - chopi bible

2 Makronika 29

¹Ezekhiya a to khata kufuma a di ni tanga ya magumi mambidi ni mtxhanu wa malembe, se a to fumela Jerusalema magumi mambidi a malembe ni mtxhanu ni mune; se ditina na mwamwakwe i ti ti Abhiya, mwana Zakariya.

²A to maha to lulama masoni ka MKOMA, nga tile a nga mahisa tona tate wakwe Dhavhidha.

³Ka mtxima wo khata ka dilembe do khata da kufuma kwakwe, Ezekhiya a to tula matimba a Nyumba ya MKOMA, e ma longisa.

⁴A to sengeleta vaphaxeli ni Valevhi ka mtendela wa wutxani.

⁵Se a to khene kwawe: Ni engiseni anu va ka Levhi! Ti basisani, mi basisa ni Nyumbani ka MKOMA, Txizimu txa vatate vanu, mi thavisa yotshe nzambwa ha wukhaloni ko sawuleka.

⁶Nguko vatate vathu va hambukile, va mahile to biha masoni ka MKOMA Txizimu txathu, ve mu leka; ve jikisa tikhohe tawe ve leka kuwonetela ditenda da MKOMA va txi ditshuralela.

⁷Va to vhala matimba a m'hubhe, ve tima ni malambu, ve leka kuhisa dibaselo, kha va ningela mningelo wo hiswa ha wukhaloni ko sawuleka ka Txizimu txa Israyeli.

⁸Se kuhenya ka MKOMA kutota ka va ka Judha ni Jerusalema, e va ningela ka pfilu-pfilu, ka kuhoxotwa, ni txisekiso, nga ti anu mi ti wonako ngu maso anu.

⁹Nguko wonani, vatate vathu va datwe ngu matxhari, se vanana vathu va mazambi ni mahorana ni vasikati vathu va yisilwe wukhumbini.

¹⁰Konkuwa mbiluni kwangu ni alakanya ti to hi maha txitumelelano ni MKOMA, Txizimu txa Israyeli, kasi ku kuhenya ka MKOMA kuhambuka kwathu.

¹¹Konkuwa vanangu, mi nga mahe mihoni, nguko MKOMA ami sawute ku mi txi ema masoni kwakwe mi mu khozela ni kuva sithumi sakwe mi mu hisela dibaselo.

¹²Sekoko Valevhi va to khukha: I ku Mahate, mwana Amasayi, ni Joweli, mwana Azariya, mwanana wa Vakohate; ni vanana va Merari, Kixi, mwana Abhidhi, ni Azariya, mwana Jeyaleleli; ni va ka Gerxoni, Jowa, mwana Zima, ni Edheni, mwana Jowa.

¹³Vanana va ka Elisafani i Simiri ni Jeyeli; va ka Asafe i Zakariya ni Mataniya;

¹⁴vanana va ka Hemani i Jeyeli ni Semeyi; va ka Jedhutumi i Semaya ni Uziyeli.

¹⁵Va to sengeleta vanawe, ve ti basisa se ve wuya mandingano ni kuruma ka mfumeli ngu dipswi da MKOMA, ve ta basisa Nyumba ya MKOMA.

¹⁶Se vaphaxeli va to wulelela Nyumbani ka MKOMA kasi kuva txi kubasisa ve humisa hahanze yotshe nzambwa ayi va nga yi mana dithepeleni ka MKOMA va ya yi veka digumani ka Nyumba ya MKOMA; se Valevhi va yi teka va ya yi tshotsha txinambwanani ka Khedroni.

¹⁷Va to khata mthumo wa kubasisa ngu ditshiku do khata ka mtxima wo khata, se ngu ditshiku da wutxhanu ni mararu ka mtxima wonewo va to wulela mhubheni ka MKOMA va txi basisa Nyumba ya MKOMA mndani ka mtxhanu wa masiku ni mararu; se ngu ditshiku da digumi ni mtxhanu ni dimwendo ka mtxima wonewo ve heta mithumo yawe.

¹⁸Sekoko va to wulela nyumbani ka mfumeli Ezekhiya, va txi ya kha vona kwakwe: Hi basisile yotshe Nyumba ya MKOMA ni txiluvelo txa mningelo wo hiswa ni siya sotshe ni meza ya mapawu a mphaxo, ni sotshe siya sa yona.

¹⁹Ni sotshe siya asi mfumeli Akazi a nga ti ti si tshotshile ka wukoma wakwe, athu hi si longisile hi si basisa si vekilwe masoni ka Txiluvelo txa MKOMA.

²⁰Se mfumeli Ezekhiya a to wuka ni mixo eya sengeleta vathangeli va didhoropa se a kwelela navo veya Nyumbani ka MKOMA.

²¹Se va to naha mtxhanu wa marole ni mambidi, ni mtxhanu wa tihamba ni timbidi, ni mtxhanu wa sivuntana ni simbidi, ni mtxhanu wa tiphongo ni timbidi ve maha mhamba yo thavisa sionho sa wukoma ni sa wukhalo wo sawuleka ni sa ka Judha, se Ezekhiya a to gela vaphaxeli vanana va Aroni ti to ve ningela txitimwi ka txiluvelo txa MKOMA.

²²Se va to daya tihomu, se vaphaxeli ve teka mnoha ve miyatela txitimwi ka txiluvelo; nakona va to daya tihamba ve miyatela mnoha txitimwi ka txiluvelo, ve daya sivuntana ve miyatela mnoha wa sona txitimwi ka txiluvelo.

²³Va to naha ni tiphongo ta mhamba ya txionho masoni ka mfumeli ni ka msengeletano ve sanzeka manza awe txitimwi ka tona.

²⁴Se vaphaxeli va to daya tiphongo ve teka mnoha wa tona va txi miyatela txitimwi ka txiluvelo ve maha mhamba yo thavisa sionho sa votshe va ka Israyeli, nguko mfumeli a to leleta to kumahwa mningelo wa hiswa ni kumaha mhamba yo thavisa sionho sa votshe va ka Israyeli.

²⁵A to veka Valevhi Nyumbani ka MKOMA, va di ni sitende, ni tingoma, ni timbila, madingano ni kuruma ka Dhavhidha ni ka Gadhi mhuti wa mfumeli, ni wa mprofeti Nathani i ku kuruma ku kutako ngu ka MKOMA, ngu dianza da vaprofeti vakwe.

²⁶Valevhi va ti ti emile va di ni sivetaveta sa Dhavhidha, se vaphaxeli va ti ti ni mipundu.

²⁷Ezekhiya a to leleta ti to ve khata kuhumisa mningelo wo hiswa txitimwi ka txiluvelo, se mbimo yi va nga khata kuhumisa mningelo wo hiswa, va to khata ni kuembelela tindando to dhumisa MKOMA, ngu mipundu ni sivetaveta sa Dhavhidha, mfumeli wa Israyeli.

²⁸Se mbimo yi va nga ti ti embelela tindando ni kuveta mipundu, wotshe msengeletano wu to khizama kala ku mthumo wa mningelo wo hiswa wu guma.

²⁹Mbimo ayi va nga heta kuningela, mfumeli ni votshe a vale a nga ti ti navo va to khizama ve khozela.

³⁰Se mfumeli Ezekhiya ni vathangeli, va to gela Valevhi ti to va fanela kudhumisa MKOMA, ngu mapswi a Dhavhidha, ni a Asafe, m'huti. Se Valevhi va to m'dhumisa ngu kutsaka, ve khizama, ve mkhozela.

³¹Ezekhiya a to xamula a txi khene: Konkuwa anu mi nga ti ningela ka MKOMA, tshuketani mi tisa mhamba ni miningelo ya kudhumisa, Nyumbani ka MKOMA. Se msengeletano wu to tisa mhamba ni miningelo ya kubonga, vamwani ngu kuranda kwawe, va humisile miningelo ya kuhiswa.

³²Se mtengo wa miningelo ya kuhiswa ayi msengeletano wu nga humesa ngu wuwa: Mtxhanu wa magumi ni mambidi a tihomu, ni 100 wa tihamba, ni 200 wa sivuntana; sotshe a siya mningelo wo hiswa awu u humiselwako MKOMA.

³³Mningelo wumwani wo hiswa i ti ti wa 600 wa tihomu ni 3.000 wa tinvuta.

³⁴Vaphaxeli i ti ti va dotho se va txi tandeka ku sunduwulela sotshe sihari sa mningelo wo hiswa. Se va to vhunetwa ngu vanawe va ka Levhi kala ku wotshe mthumo wu txi guma, ni kala ku vaphaxeli vamwani ni vona ve txi ti basisa, ngu ku Valevhi va ti ni timbilu to lulama kupinda vaphaxeli.

³⁵Mningelo wo hiswa i ti ti wawungi ngutu, ni mafura a mningelo wa kubonga, ni so sela sa mningelo wo hiswa. Ngu kumaha keto, mthumo wo khozela Nyumbani ka MKOMA wu to tsana.

³⁶Se Ezekhiya kumweko ni vathu votshe va to tsaka ngu ti Txizimu txa nga va mahela tona, ngu ku va sikotile kumaha wotshe mthumo ngu kukuluveta.