Read chopi 2 Makronika 3 Bible Online

2 Makronika 3 - chopi bible

2 Makronika 3

¹ Solomoni a to khata kuaka Nyumba ya MKOMA kona Jerusalema, ka mmango wa Moriya, ka wukhalo awu Dhavhidha tate wakwe, a nga ti wusawute ani Orinani, nguko ngu hawa MKOMA a nga ti wonekisa kona ka Dhavhidha.

²Ngu mtxima wa wumbidi, ka ditshiku da wumbidi, ka dilembe da wunene da wukoma wakwe, Solomoni a to khata kuaka dithepele.

³Mipimo yi Solomoni a nga yi thumisa kuaka Nyumba ya Txizimu ngu yiya: Kulapha ka yona madingano ni mpimo wo khata ku nava ka mtxhanu wa magumi ni dimwedo a mikono, kuanama ka magumi mambidi a mikono.

⁴Se m'hubhe wu wu nga ti ti masoni madingano ni kuanama ka nyumba wu ti ni mpimo wuwa: Kulapha magumi mambidi a mikono, ni kudemba ka 120, awu mndani ka wona ku nga ti bhamilwe ngu nzalama ya yinene ngutu.

⁵Se mndani ka nyumba ya hombe va ti ti vhate ngu mapulango, ngu txitmwi ka ona ma ti bhamilwe ngu nzalama e hamba sifaniso sa mitxhese ni sa tiketani.

⁶Kambe a tsurisete nyumba ngu marigwi o tsurisela ngu ona. Se nzalama ya kona i ti ti ya Parivayimi.

⁷Nyumba yotshe yi ti ti bhamilwe ngu nzalama, makhona, ni misasimo, ni maseta a yona, ni matimba a yona; atxi tsurisela diseta ngu makerubhima.

⁸Solomoni a to aka kambe nyumba yo sawuleka ngutu, kulapha ka yona madingano ni kuanama ka nyumba i ti ti ka magumi mambidi a mikono, se kuanama ka yona i ti ti ka magumi mambidi a mikono; atxi yi bhama ngu nzalama yo hehuka a yi yi ku ni kunemela ka 600 wa titalenta.

⁹Kunemela ka sipikiri sa kona i ti ti ka mtxhanu wa magumi a maxekele a nzalama; ve bhama ni maseta a txitimwi ngu nzalama.

¹⁰ A to maha kambe makerubhima mambidi Nyumbani ko Sawuleka ngutu, ema bhama ngu nzalama.

¹¹Tibhapi ta makerubhima ti ti ni kulapha ka magumi mambidi a mikono, se libhapi la dikerubhima dimwani ni dimwani li ti mtxhanu wa mikono, ma txi guesa diseta da nyumba, se libhapi limwani la mtxhanu wa mikono li ti ti guesa libhapi la dikerubhima dimwani.

¹²Libhapi la dikerumbhima dimwani li ti ti ni mtxhanu wa mikono, li ti ti guesa diseta da nyumba, li txi guesana ni libhapi la dimwani.

¹³Se makerubhima awa ma ti ti emisilwe ma txi wonetela nyumbani ma txi nawuluta tibhapi ta ona kala ka magumi mambidi a mikono.

¹⁴Solomoni a to maha nguwo yo kwalala ni yo bhilivila, ni nguwo yo bhilivila ngutu, ni yo hehuka ya disilika e ti sanzeka txitimwi ka makerubhima.

¹⁵Ngu masoni ka nyumba a to maha tiphande timbidi ti ku ni kudemba ka magumi mararu wa mikono ni mtxhanu, se ringi a yi yi nga ti ti ka phande yimwani ni yimwani yi ti ni mtxhanu wa mikono .

¹⁶Solomoni e maha tiketani to fana ni wusekenya e ti hayeka misungoni ka tiphande, ni maromani hagari ka tiketani.

¹⁷Se Solomoni a to emisa tisika masoni ka dithepele, limwelo ka didhawa da txinene, limwani ka txibhabha; Ya didhawa da txinene e yi dhana ku i Jakimu, ya txibhabha a to yi dhana ku i Bhowazi.