Read chopi 2 Makronika 30 Bible Online

2 Makronika 30 - chopi bible

2 Makronika 30

¹Ezekhiya a to rumela mitumi ka dotshe ditiko da Israyeli ni da Judha atxi bhalela mapapilo va ka Efrayime ni va ka Manasi e va ramba kuta Nyumbani ka MKOMA, kona Jerusalema, ve ta maha Pasika ya MKOMA, Txizimu txa Israyeli.

² Nguko mfumeli a ti ti mani silayelo sa vathangeli vakwe ni sa wotshe msengeletano kona Jerusalema saku va txi maha Pasika ngu mtxima wa wumbidi.

³Ka yoneyo mbimo, kha va sikota kumaha m'buso ngu ku mtengo wa vaphaxeli va va nga ti basisa i ti ti wudotho, ni vo vathu va ti siya sengeletana Jerusalema.

⁴Se ti wonekile i di ta tinene masoni ka mfumeli ni ka wotshe msengeletano.

⁵Se va to leleta votshe va ka Israyeli, kukhukhela Bherisebha kala Dhani kasi kuva txi ta Jerusalema ku ta maha Pasika ya MKOMA Txizimu txa Israyeli. Nguko kupindile malembe o tala na va si khali kumaha Pasika madingano ni ti ti nga bhalwa.

⁶Ku to rumelwa mitumi ka dotshe ditiko da Israyeli ni da Judha, yi di ni mapapilo awa ma nga bhalwa ngu dianza da mfumeli ni vathangeli vakwe madingano ni kuruma ka MKOMA a txi khene: Vanana va Israyeli, hundulukelani ka MKOMA, Txizimu txa Abrahama, ni Isaake, ni Israyeli,[1] kasi ku ni txona txi tshumelela kwanu mi nga huluka manzani ka vafumeli va Asiriya.

⁷Mi nga maheni ta kufana ni vatate vanu ni vananu ava va nga leka MKOMA Txizimu txa vatate vawe kala kuza ve ti ningela tiphangoni ku nga ha mi ti wonako.

⁸Mi nga bangiseni tithamo tanu kufana ni vatate vanu kambe ningelani dianza danu ka MKOMA se mi wulela amu ka wukhalo wo sawuleka awu ene a nga wu basisa ngu ha ku si gwitiko, mi thumela MKOMA Txizimu txanu, kasi ku kuhenya kwakwe kuhambuka kwanu.

⁹Nguko mi txi hindulukela ka MKOMA, vananu ni vanana vanu ava va nga tsuliswa wukhumbini va na mahelwa wumbilu ngu vale va nga va teka, va na va wuyisa ditikoni muwa; ngu ku MKOMA Txizimu txanu txi ni wuxinji ni wumbilu kha txi na mbi mi tshuralela ngako mi txi tshumelela ka txona.

¹⁰Mitumi yi to pinda ngu ka didhoropa ni didhoropa ditikoni ka Efrayime, ni ka ditiko da Manasi, kala kuza ve hoka Zebhuloni, kambe vathu va to va seka, ve va maha sivhilwa.

¹¹Hambi keto, vamwani va ka Aseri, ni va ka Manasi, ni va ka Zebhuloni, va to ti veka hahatshi, ve tumela kuya Jerusalema.

¹²Dianza da Txizimu di ti ti txitimwi ka vathu va ka Judha, di va ninga mbilu yimweyo yo maha kuruma ka mfumeli ni ka vathangeli madingano ni dipswi da MKOMA.

¹³Ngu mtxima wa wumbidi ka dilembe ku to sengeletana vathu vavangi ngutu kona Jerusalema, ve maha m'buso wa mapawu o mbi tshumbelwa. I ti ti msengeletano wa hombe ngutu.

¹⁴Va to khukha va thavisela siluvelo asi si nga ti ti Jerusalema, ve thavisa ni totshe tikhadi to hisela ka tona dibaselo, veya si tshotsha mlongani ka kedroni.

¹⁵Sekoko ngu ditshiku da wugumi ni mune ka mtxima wa wumbidi va to phaxa mhamba ya Pasika. Vaphaxeli ni va ka Levhi va to wa tingana, ve ti basisa ve neha mningelo wo hiswa Nyumbani ka MKOMA.

¹⁶Va toya zumba ha wukhaloni kwawe, madingano ni Mlayo wa Mosi, m'thu wa Txizimu. Vaphaxeli vona va txi theletela mnoha txitimwi ka txiluvelo, awu va nga wu amukela manzani ka Valevhi.

¹⁷Nguko ku ti ni vathu votala hagari ka msengeletano, ava va nga mbi ti basisa; se Valevhi va ti ti ningilwe mthumo wo dayela sivuntana sa Pasika votshe a vale va nga mbi ti basisa kasi ku ni vona ve mahela mhamba MKOMA.

¹⁸Mtalo wa vathu va ka Efrayime, Manasi, va ka Isakari ni Zebhuloni va dyite Pasika va siya khata ngu kubasiswa kambe hi nga tona ti ti nga bhalwa; kambe Ezekhiya a to va kombelela a txi khene: MKOMA awe u ku mnene, tshangana ni vale

¹⁹va longiselako timbilu tawe kasi kuve lava MKOMA Txizimu, Txizimu txa vatate vawe, hambi ku va sinziko ku ti sawulekisa.

²⁰MKOMA a to engisa mkombelo wa Ezekhiya, e hanyisa vathu.

²¹Vanana va ka Israyeli, ava va nga ti Jerusalema, va to maha M'buso wa mapawu a kwa mbi tshumbelwa, mtxhanu wa masiku ni mambidi, ngu litsako la hombe. Ditshiku ni ditshiku, Valevhi ni vaphaxeli va ti kwangula va txi dhumisa MKOMA.

²²Ezekhiya a to womba-womba ka votshe va ka levhi ava va ku ni wutxhari wa wunene wo ziva MKOMA; se vathu votshe ve busa mtxhanu wa masiku ni mambidi, va ningela mningelo wa kudikha va txi dhumisa MKOMA Txizimu txa vatate vawe.

²³Wotshe msengeletano wu to pfana kuya masoni, ngu kumaha mibuso yo fana ni wule va nga wu maha, wa mtxhanu wa masiku ni mambidi, va di tsakile ngutu.

²⁴Nguko Ezekhiya, mfumeli wa Judha, a ningete ka msengeletano 1.000 wa marole ni 7.000 wa tivunta. Se vathangeli va ningete ka msengeletano 1.000 wa marole ni 10.000 wa tivunta; Vaphaxeli vavangi va to tibasisa.

²⁵Ku to maneka litsako la hombe ka wotshe msengeletano wa va ka Judha, ni ka vaphaxeli, ni Valevhi ni ka wotshe msengeletano wa votshe va nga ta ngu Israyeli, ni va luveli va ditiko da Israyeli ni va va hanyako ditikoni ka Judha.

²⁶Ku manekile kutsaka ka hombe Jerusalema, nguko kukhukhela ka masiku a Solomoni, mwana Dhavhidha, mfumeli wa Israyeli, kha yi khali kuhumelela mhaka yo fana ni yi kona Jerusalema.

²⁷Sekoko vaphaxeli ni Valevhi va to khukha ve katekisa vathu; dipswi dawe di to engiswa, nguko mikombelo yawe yi hokile ka wukhalo wakwe wo sawuleka nzumani.