Read chopi 2 Makronika 32 Bible Online

2 Makronika 32 - chopi bible

2 Makronika 32

¹Msana ka timhaka tiya, ni kuthembeka kuwa, kutota Senakeribhe mfumeli wa Asiriya e ta wulela ditikoni ka Judha, eya gova e wukela madhoropa a hombe a txi lava ku ma honyola.

²Ezekhiya a txi wona ti to Senakeribhe a tile ku ta xasela Jerusalema,

³a to sunga txikungo ni vathangeli vakwe ni vathu vakwe txa kuya kuletela sisima sa mati asi si ku hahanze ka didhoropa; se vona va to m'vhunetela.

⁴Sekoko va to sengeleta vathu vavangi ngutu veya kuletela sotshe sisima sa mati ni txinabwana txi txi tshawunyetako ngu hagari ka ditiko. Va txi kha vona: Ngu kutxani vafumeli va Asiriya ve ta mana mati amangi kani?

⁵Se ene a to tsana ngutu e aketa dotshe diguma adi di nga ti khundumusilwe, ve di laphisa kala sidingililelo, e aka dimwani diguma ngu hahanze e tsanisa Milo didhoropani ka Dhavhidha, atxi ti mahela matxhari amangi ni sivhikelo sasingi.

⁶A to veka vathangeli va yimbi hagari ka vathu, a txi va sengeleta mtendelani ka txike txa didhoropa a txi womba-womba navo mapswi awa ma rulisako timbilu tawe a txi khene:

⁷Mahani mtamo mi tsana; mi nga thaveni txilo hambi kuwika msana ngu mhaka ya mfumeli wa Asiriya ni vathu votshe ava aku navo, nguko ava hi ku navo mbavangi kupinda ava a ku navo.

⁸Ene ani diwoko da nyama, kasi athu hi ni MKOMA Txizimu txathu, awu a hi vhunetelako kulwa tiyimbi tathu. Vathu va to tsaniswa ngu mapswi a Ezekhiya, mfumeli wa va ka Judha.

⁹Msana keto, Senakeribhe, mfumeli wa Asiriya a to rumela sithumi sakwe si tsula Jerusalema ka Ezekhiya mfumeli wa va ka Judha ni ka votshe va ka Judha ava va nga ti ti ni Jerusalema, a txi khene:

¹⁰Senakeribhe mfumeli wa Asiriya, a khene: Mi themba txani anu, aku mi zumbako mi di ti vhalete amu Jerusalema kani?

¹¹Ina Ezekhiya kha mi kujeteli ku mi txi na fa ngu nzala ni ditora, a txi khene: MKOMA Txizimu txathu, a na hi hulukisa manzani ka mfumeli wa Asiriya kani?

¹²Kasi hi nga ene Ezekhiya awu a nga thavisela makhalo anu o guleka ni siluvelo sanu, atxi womba-womba ni va ka Judha ni Jerusalema a txi khene: Mi na khozela masoni ka txiluvelo tximwetxo, mi hisela ka txona dibaselo kani?

¹³Ina anu kha mi tizivi a ti ani ni vatate vangu hi nga mahela votshe vathu va matiko kani? Mi alakanya ti to sizimu sa matiko ale si wu mani mtamo wo hulukisa matiko ale manzani kwangu kani?

¹⁴Ngu txihi txizimu, ka sizimu sotshe sa matiko ale vatate vangu va nga mahaxulela, txi nga sikotako kutxhatxhisa vathu va txona manzani kwangu, aha koza Txizimu txanu txi sikota ku mi txhatxhisa manzani kwangu kani?

¹⁵Konkuwa koko mi nga xengetelweni ngu Ezekhiya, hambi ku mi kujetele ngu mamahelo eyo, kambe mi nga mthembeni nguko kha ku na txizimu txa ditiko ni da dimwedo, hambi txa mfumo ni wawumwewo txi nga txhatxhisako vathu va txona manzani kwangu, hambi manzani ka vatate vangu, Txizimu txanu txi nga sikotisa kutxani ku mi hulukisa manzani kwangu.

¹⁶Sithumi sakwe si to ya masoni ngu kupoyilela MKOMA Txizimu ni Ezekhiya txithumi txakwe.

¹⁷Senakeribhe a to bala kambe mapapilo o ruketela MKOMA, Txizimu txa Israyeli, a txi khene: A ku sizimu sa mifumo ya ditiko si nga mbi xanguta vathu va sona manzani kwangu, ngu toneto, ni txona Txizimu txa Ezekhiya kha txi na mbi hulukisa vathu va txona manzani kwangu.

¹⁸Va to peka huwa ngu lidimi la Txijudha ka vathu va Jerusalema va nga ti ti txitimwi ka diguma, ve va dhukisa, ve va dhudhumelisa kasi kuve va honyola didhoropa.

¹⁹Va to womba-womba ngu Txizimu txa Jerusalema, nga ti va wombawombisako tona ngu sizimu sa vathu va ditiko, so mahwa ngu manza a vathu.

²⁰ Se mfumeli Ezekhiya, ni mprofeti Isaya, mwana Amosi, va to peka huwa nzumani ve kombela ngu mhaka yiya.

²¹ Sekoko MKOMA a to rumela ngelozi ku ta heta votshe vavamna va mtamo, ni vathangeli ni vathangeli va wugoveloni ka mfumeli wa Asiriya; se Senakeribhe a to tshumela ngu tingana eya ditikoni kwakwe. A di wulete nyumbani ka sizimu sakwe, vathu va nyumba yakwe va to m'daya koneho ngu ditxhari.

²²Sekoko MKOMA a to hulukisa Ezekhiya ni vahanyi va Jerusalema manzani ka Senakeribhe, mfumeli wa Asiriya, ni manzani ka votshe; E tsimbilisa vathu vakwe ka otshe madhawa.

²³Vathu vavangi va to tisa simaha Jerusalema, ku ta ninga MKOMA, ni simaha sa lisima ngutu ve ta ninga Ezekhiya, mfumeli wa va ka Judha, kukhukhela koneho a to guleka masoni ka matiko otshe.

²⁴Ka ona masikuyo, Ezekhiya a to khatwa ngu malwati a kufa, se a to kombela ka MKOMA, se ene a to womba-womba nayo e mkomba txiwoniso.

²⁵Ezekhiya kha sikota kubonga wunene wu va nga mmahela ngu MKOMA, nguko a ti tate ngu kutikulisa mbiluni kwakwe, se kuhenya ka MKOMA ku to txhika txitimwi kwakwe, ni txitimwi ka va ka Judha ni Jerusalema.

²⁶Se Ezekhiya a to ti sola e ti veka hahatshi ngu mhaka ya kanu ya kutikulisa ka mbilu yakwe kumweko ni vathu va Jerusalema; se kuhenya ka hombe ka MKOMA ku yata txitimwi kwawe, ka masiku a Ezekhiya.

²⁷Ezekhiya a di ni thomba yayingi ni wudhumo wa hombe; va to aka wukhalo wo veka ka wona nzalama ni silivhela ni marigwi a lisima, ni makha ni sivhikelo, ni sotshe si asi lavako.

²⁸A to ti akela tinyumba to xayisela ka tona fulaho ni vhinya, ni mafura, atxi ti akela ni sibala sa sifuyo sakwe sa tixaka-xaka.

²⁹A to ti akela madhoropa e ti lavela ni tinvuta ni tihomu ta tingi ngutu, nguko Txizimu txi mningile thomba yayingi ngutu.

³⁰Ngene Ezekhiya wu a nga vhala txisima txa mati a Giyoni, e ma tsimbitisa ngu hahatshi, ngu didhawa da mswa-ditambo ka didhoropa da Dhavhidha, nguko Ezekhiya a di katekisilwe ka mithumo yakwe yotshe.

³¹ Vathangeli va Bhabhilona va to rumela mitumi ka Ezekhiya, kuya wotisa ngu timhaka ta txidiwukiso a txi txi nga maheka ditikoni, Txizimu txi to mleka ve m'duka, kasi ku txi ziva totshe ti tiku mbiluni kwakwe.

³²Mithumo yimwani ya Ezekhiya ni sotshe simaho sakwe, si bhatwe ka dibhuku da siwoniso sa mprofeti Isaya mwana Amosi ni ka dibhuku da matimu a vafumeli va ka Judha ni va ka Israyeli.

³³Ezekhiya a to otela ni vatate vakwe, eya tshotshwa ka mathitha a txitimwi a vanana va ka Dhavhidha. Vathu votshe va ditiko da Judha ni vahanyi va Jerusalema va to mudila kufani kwakwe, se mwanakwe Manasi a to fuma ka wukhalo wakwe.