Read chopi 2 Makronika 34 Bible Online

2 Makronika 34 - chopi bible

2 Makronika 34

¹ Josiya a khatile kufuma a di ni tanga ya mtxhanu wa malembe ni mararu, se a to fumela Jerusalema magumi mararu a malembe ni dilembe dimwendo.

²Se a to maha ta tinene masoni ka MKOMA, a to tsimbila ngu nzila ya Dhavhidha tate wakwe, kha ngaza e khukha ka yona eya txinene mwendo txibhabha.

³Ngu dilembe da wutxhanu ni mararu, da kufuma ka Josiya, i di ngadi dizambi, e khata kulava Txizimu txa Dhavhidha tate wakwe; se ngu dilembe da wugumi ni mambidi a to khata kubasisa ditiko da va ka Judha ni Jerusalema a txi thavisela makhalo awe o guleka, a txi wilela tiphande tawe ni sithombe so vatwa ni so wumbwa.

⁴ Va to khundumusela siluvelo sa bhahali, masoni kwakwe; va txi wilela ni sithombe sa ditambo asi si nga ti ti txitimwi kwawe, ni tiphande, ni sithombe so vatwa ni so wumbwa, ve si tshinda si maha mpupu a txi wu xwayela mathithani ka vale va nga ti ti si khozela.

⁵ A to hisa marambu a vaphaxeli txitimwi ka siluvelo sawe a basisa ditiko da va ka Judha ni Jerusalema.

⁶A to maha toneto ni ka madhoropa a ka Manasi, ni a ka Efrayime, ni a ka Simiyoni, ni a va ka Naftali.

⁷A to khundumusela siluvelo a txi wilela ni tiphande ni sithombe so vatwa, kala kuza si txi maha lithulu, atxi wilela sotshe sithombe sa ditambo ka ditiko dotshe da ka Israyeli sekoko, e tshumelela Jerusalema.

⁸Ngu dilembe da wugumi ni mtxhanu ni mararu da kufuma ka Josiya, nga ku a di hetile kubasisa ditiko ni nyumba, mfumeli a to rumela Safani, mwana Azaliya, ni Mahaseya, mthangeli wa didhoropa, ni Jowa, mwana Jowakazi, mabhalani, kasiku va txi ya lulamisa Nyumba ya MKOMA, Txizimu txakwe.

⁹Se va toya ka Hilikiya, mphaxeli wa hombe, veya mninga male yile yi nga ti tisilwe Nyumbani ka Txizimu, ayiya Valevhi, va woneleti va mtshunzuti wa ditimba, va nga amukela manzani ka Manasi ni Efrayime, ni ka votshe va ka Israyeli, ni va ka Judha ni Bhenjamini, ve tshumelela Jerusalema.

¹⁰Male ya kona yi ningetwe ka vathangeli va mthumo wo aka Nyumba ya MKOMA, va txi hakela ngu yona ava va thumako ko aka Nyumba ya MKOMA.

¹¹Yimwani ve ninga vavati ni vaaki, kasi ve xava marigwi o vatwa ni tiphande to tsanisa ngu tona diseta da tinyumba ti ti nga hasulelwa ngu vafumeli va ka Judha.

¹²Va vamna vava va thumile ngu kuthembeka; Vathangeli vawe i ti Jahati ni Obhadhiya, Valevhi va vanana va Merari, ni Zakariya ni Mesulami va vanana va Kohate kasi kuve yisa masoni mthumo wo aka. Ni vamwani Valevhi votshe ava va zivako kuveta sivetaveta.

¹³Ku ti ti ni varwali ni woneleti va mthumo wotshe wu va nga ti ti wu maha, se Valevhi vamwani i ti vamabhalani, ni vathangeli ni va woneleti va sike.

¹⁴Mbimo yi vona va nga humisa male yile yi nga ti ti vekilwe Nyumbani ka MKOMA, mphaxeli Hilikiya a to mana dibhuku da Mlayo wa MKOMA awu u nga ningwa ngu Mosi.

¹⁵Se Hilikiya a to gela mabhalani Safani a txi khene: Ni mani dibhuku da Mlayo Nyumbani ka MKOMA. Hilikiya a to ningela dibhuku ka Safani.

¹⁶Se Safani a to wiyisa dibhuku ka mfumeli e mu gela a txi khene: Sithumi sako si mahile totshe ti awe u nga ruma tona.

¹⁷Va tekile yotshe male ayi va nga yi mana Nyumbani ka MKOMA ve ningela manzani ka vathangeli ni ka vaaki.

¹⁸Se mabhalani Safani, a to gela mfumeli a txi khene: Mphaxeli Hilikiya a ni ningile dibhuku. Se Safani a to gonda dibhuku masoni ka mfumeli.

¹⁹Mbimo yile mfumeli a nga pfa mapswi a dibhuku da Mlayo, a to vharula syambalo sakwe.

²⁰Se mfumeli a to ruma Hilikiya ni Ahikamu mwana Safani, ni Abhidhoni mwana Mika, ni Safani mabhalani, ni Asayasi, txithumi txa mfumeli a txi khene:

²¹Tsulani mi ya wotisa ngu ditina dangu, ni da vathu vangu, ni dotshe ditiko da Israyeli ni da Judha, madingano ni mapswi a dibhuku diya di nga manwa, nguko kuhenya ka MKOMA nga hombe txitimwi kwathu; nguko vatate vathu kha va pfisisa mapswi a MKOMA, hambi ku londeta ni ta timweto ti ti nga bhalwa, amu ka dibhuku diya.

²²Sekoko Hilikiya ni ava mfumeli a nga va ruma nayo, vatoya ka Hulidha, mprofeti wa txisikati, msikati wa Salumi, mwana Tokati, mwana Hasira muwoneleli wa syambalo a nga ti akile Jerusalema ve womba-womba nayo ngu mhaka ya dibhuku.

²³Se ene a to khene: MKOMA Txizimu txa Israyeli a khene: Gelani m'thu wu a nga mi rumela kwangu mi txi khanu:

²⁴MKOMA a khene: Na tisa kubiha txitimwi ka wukhalo wuwa ni txitimwi ka vahanyi va wona, otshe makhombo awa ma nga bhalwa ka dibhuku di di nga gondwa masoni ka mfumeli wa Judha.

²⁵Nguko va ni lekile veya hisela dibaselo sizimu simwani, kasiku ni wusela kuhenya kwangu ngu yotshe mithumo yawe, se ngu toneto kuhenya kwangu na kuthekete txitimwi ka wukhalo wuwa, ku na pwateka ni wammweyo awu a no sikota ku kuthavisa.

²⁶Aniko mfumeli wa ka Judha, awu a nga mi ruma ku ta pfa ti to MKOMA a khene txani, mi na m'gela tiya: MKOMA, Txizimu txa ka Israyeli, madingano ni mapswi ale u nga mapfa, a khene:

²⁷A ku u nga dhukiswa mbiluni kwako, u ti veka hahatshi masoni ka Txizimu, mbimo yi u nga pfa mapswi akwe madingano ni wukhalo wuwa ni vathu va kona, u txi ti veka hahatshi, u vharulela ni syambalo sako, u dila masoni kwangu, ani ni ku pfite, kuwomba MKOMA.

²⁸Na ku tshanganisa ni vatate vako, u tshotshwa ngu kuthutha dithithani kwako, maso ako manambi kuwona kotshe kubiha ku ni no kunaheta txitimwi ka wukhalo wuwa ni ka vathu va kona. Se va to tshumela ni xamulo yiya veya gela mfumeli.

²⁹Seko mfumeli a to ramba otshe madhota a ka Judha ni a Jerusalema.

³⁰Se mfumeli a to kwelela Nyumbani ka MKOMA ni votshe va vamna va Judha ni vahanyi va Jerusalema, ni vaphaxeli, ni va ka Levhi ni vathu votshe, vahombe ni vavadotho, a to gonda tinzeveni ka vathu votshe otshe mapswi a dibhuku da txitumelelano adi di nga manwa Nyumbani ka MKOMA.

³¹Se mfumeli a to ema ha wukhaloni kwakwe e maha txitumelelano masoni ka MKOMA, kasi ku a txi vekisa milayo yakwe, ni sileleto sakwe, ngu mbilu yakwe yotshe, ni muhefumulo wakwe wotshe, ni kulondeta otshe mapswi a txitumelelano, awa ma nga bhalwa ka dibhuku da txitumelelano.

³²Se Josiya a to va khukhisa va txi ema, votshe vathu vale va nga ti ti maneka Jeursalema ni Bhenjamini; vahanyi va Jerusalema va to maha madingano ni txitumelelano txa Txizimu, Txizimu txa vatate vawe.

³³Se Josiya a to thavisela sotshe so nyenyeza sa matiko otshe a vanana va Israyeli e maha ti to votshe va va ku ditikoni ka Israyeli ve khozela MKOMA, Txizimu txawe; ka masiku otshe a kuhanya kwakwe, va Israyeli kha va leka MKOMA, Txizimu txa vatate vawe.