Read chopi 2 Makronika 6 Bible Online

2 Makronika 6 - chopi bible

2 Makronika 6

¹Sekoko Solomoni a to khene: MKOMA wu ti khawe u na zumba txidemani.

²Se ani ni ku akete nyumba yo zumba ka yona, i ku wukhalo wu u no zumba ka wona yotshe mbimo.

³Sekoko mfumeli a to tshembereka e katekisa wotshe msengeletano wa va Israyeli, wu nga ti emile.

⁴A txi khene: A na dhumiswe MKOMA, Txizimu txa ka Israyeli, a nga womba ngu txisofu txakwe ka tate wangu Dhavhidha, ni kumaha ngu dianza dakwe, a txi khene:

⁵Kukhukhela ditshiku dile ni nga thavisa vathu vangu ditikoni da Egipta, kha na sawula didhoropa ni da dimwedo ka totshe tihunzu ta ka Israyeli kasi kuaka nyumba, kasi ni veka kona ditina dangu. Futhi kha na sawula m'thu awu no thangela vathu vangu va Israyeli.

⁶Konkuwa ni sawute m'ti Jerusalema kasi ku ditina dangu di txi zumba kona; ni Dhavhidha kasi e fumela vathu vangu va Israyeli.

⁷Kambe Dhavhidha, tate wangu a alakanyile mbiluni kwakwe kuakela nyumba ditina da MKOMA, Txizimu txa Israyeli.

⁸Hambiko MKOMA a ti khene ka tate wangu Dhavhidha: Ngako u nga alakanya mbiluni kwako kuakela nyumba ditina dangu, u mahile tona u nga alakanya eto mbiluni kwako.

⁹Hambi keto, khu na mbi yi aka nyumba yiya, kambe mwanana wako, awu a no velekwa ngu ngawe, a na akela ditina dangu nyumba yiya.

¹⁰Se MKOMA a to tsanisa dipswi dakwe dile a nga ti di wombile; nguko ni emile ka wukhalo wa tate wangu Dhavhidha, ni khalahatshile ka txikhalo txa wukoma txa ka Israyeli, nga ha a nga womba MKOMA; se ni akete nyumba ditina da MKOMA, Txizimu txa Israyeli.

¹¹Se ni vekisile wukhalo wa dibhokiso di di ku ni txitumelelano txile MKOMA a nga txi maha ni vanana va ka Israyeli.

¹²Solomoni a to ema masoni ka txiluvelo txa MKOMA, ni masoni ka wotshe msengeletano wa ka Israyeli, se e guleta mawoko akwe.

¹³Nguko Solomoni ati mahile txikadha txa koporo, txi ku ni mtxhanu wa mikono ya kulapha ka txona, ni mtxhanu wa mikono ya kuanama, ni mikono yiraru ya kudemba, e txi veka hagari ka mtendela, se e kwela ka txona e khizama ngu mazolo masoni ka wotshe msengeletano wa Israyeli, e guleta mawoko akwe me komba nzumani.

¹⁴A txi khene: O MKOMA, Txizimu txa Israyeli, kha ku nga ni Txizimu txo ngawe, txitimwi nzumani, hambi hahatshi ha mafuni, u xayisako txitumelelano ni wunene, ka sithumi sako si si tsimbilako ngu mbilu yotshe masoni kwako.

¹⁵U nga maha ni txithumi txako, i ku tate wangu Dhavhidaha, a ti u nga m'gela; nguko ngu txisofu txako u wombile, ngu diwoko dako u mahile, nga ha ti wonekako ka diya ditshiku.

¹⁶Konkuwa koko, awe MKOMA, Txizimu txa Israyeli, maha ka txithumi txako Dhavhidha tate wangu, a ti u nga mthembisa u txi khawe: Kha ku na mbi pwateka dijaha masoni kwangu, a di di no khalahatsha ka txikhalo txa wukoma txa ka Israyeli; aniko vanana vako va na xayise nzila yako, ve tsimbila ka mlayo wangu, nga ti awe u nga tsimbilisa tona masoni kwangu.

¹⁷Konkuwa awe MKOMA, Txizimu txa Israyeli, di na tatiseke dipswi dako adi u nga womba ka txithumi txako, tate wangu Dhavhidha.

¹⁸Ina ngu ditshuri Txizimu txi ndi na zumba ni vathu ha mafuni kani? Wona taku tinzuma kala ka nzuma ya tinzuma nga ti si sikoti ku u enela ka tona, se ngutu-ngutu nyumba yiya ni nga yi aka.

¹⁹Engisa koko mkombelo wa txithumi txako awe MKOMA, Txizimu txangu, kasi upfa kudila ni mkombela wu nyamsi txithumi txako txi mahako masoni kwako.

²⁰Kasi ku maso ako me wonelela txitimwi ka nyumba yiya wusiku ni mitshikari, txitimwi ka wukhwlo wuwa, aha u nga womba ngu yona ku khawe: Ditina dangu di nave hale; kasi u engisa mkombelo wu txithumi txako txi no maha ka wukhalo wuwa.

²¹Engisa kudila ka txithumi txako ni ka vathu vako va ka Israyeli, mbimo yi va khongelako ka wuwa wukhalo, engisa u di ka wukhalo wu u zumbako ka wona nzumani, engisa kambe divalela.

²²Ngako m'thu wokari a txi onhela mmwani, e mu vekela txixambanyo txitimwi kwakwe ti to e xambanya, se txixambanyo txita masoni ka txiluvelo txako, ka yiya nyumba,

²³awe koko engisa u di nzumani, u maha ati to u lamula sithumi sako, u sunga m'bihi, u mmrweka mnandu wakwe ha msungo kwakwe, u maha ta tinene ka wo lulama, u mmahela madingano ni wululami wakwe.

²⁴Ngako vathu vako va Israyeli va txi xulwa ngu mlala, ngu kuva va di kuonhete, ve hundulukela kwako, ve dhumisa ditina dako, ve dila masoni kwako nyumbani muwa,

²⁵sekoko awe engisa u di nzumani, u divalela sionho sa vathu vako va ka Israyeli, u tshumela u va heleketa ka ditiko dile u nga va ninga vona ni vatate vawe.

²⁶Ku ngako nzuma yi txi tsiveka ma siwi mati, ngu kuva va di ni onhete, se va txi khongela ka wuwa wukhalo, ve khumbuka ditina dako, ve hunduluka sionhoni kwawe, na awe u di vaxanisile,

²⁷va engise awe koko u di nzumani, u divalela txionho txa sithumi sako ni txa vathu vako va ka Israyeli, ni ku va gondisa to va na tsimbile ngu nzila ya yinene, nisa mati txitimwi ka mafu awa u nga ninga vathu vako kuva thomba.

²⁸Ku txi maneka nzala ditikoni, ku txi humelela mitungu, ni kuyha ka timbewu mwendo sijhingara ka siyalo, ni tihumbi, mipungu, mbimo yi mlala wako a tsivako sike sako, mwendo kumaneka ka mitungu yokari hambi malwati,

²⁹yotshe mikombelo ni kotshe kudila ku no mahwa ngu wuhi m'thu wa ka Israyeli, aha koza mmweyo ni mmweyo epfa kupanda ka mbilu, e nawuluta dianza dakwe ka yiya nyumba,

³⁰va engise u di nzumani, ka txikhalo txi u zumbako ka txona, divalela, ninga ka mmweyo ni mmweyo madingano ni mahanyelo akwe, ni ti u wonisako tona mbilu yakwe, nguko ngawe wekha u zivako timbilu ta vanana va vathu.

³¹Kasi veva ni txithavo otshe masiku a kuhanya ka mafu a u nga ninga vatate vathu.

³²Mu engise nene mluveli wule i singako wa vathu vako va ka Israyeli, wa kuva a tako ngu ka matiko a kule, ngu kuranda ditina dako da hombe, ni dianza dako da mtamo, ni diwoko dako do nawuluka, se e ta khongela ka yiya nyumba,

³³Engisa awe nzumaniyo, txituluni hale u zumbako kona, u maha madingano ni kudila ka mluveli, kasi votshe vathu va ha mafuni ve ziva ditina dako, va txi na kuthava kufana ni vathu vako va ka Israyeli, va na ziva kambe ti to ditina dako da khumbukwa txitimwi ka nyumba yiya ni nga yi aka.

³⁴Ngako vathu vako va txi huma ve yalwa ni valala vawe, ngu nzila yi u no va komba, ve khongela ka MKOMA ka didhawa di u ngadi sawula ka didhoropa diya, ni da nyumba yi ni nga akela ditina dako,

³⁵engisa koko na u di nzumani mikombelo yawe ni kudila kwakwe, va ninge kuhumelela.

³⁶Ngako va txi kuonhela (nguko kha ku na m'thu asi onhiko), se awe u txi va henyela, u va ningela masoni ka valala, kasi ku avale va no va ñola, ve va yisa ditikoni ka valala kota tikhumbi, hambi i di kule mwendo hafuhi;

³⁷se ditiko di va no yiswa ka dona kota tikhumbi, ve ti alakanya, ve hunduluka, ve kudilela va di ka ditiko da wukhumbi, va txi kha vona: Hi onhile, kambe hi thumisile kuhambana, hi mahile wubihi;

³⁸se va txi hundulukela kwako ngu yotshe mbilu yawe ni wotshe muhefemulo wawe, ditikoni ka valala vawe vale va nga va yisa wukhumbini, va kombela kwako ngu didhawa da ditiko di u nga ninga vatate vawe, ka didhoropa di u ngadi sawula, ni ka nyumba yi ni nga yi akela ditina dako,

³⁹engisa koko ngu nzumani, u di khalahatshile ka txikhalo txa ha u zumbako kona, mikombelo yawe ni kudila kwawe, se va mahele wumbilu, u divalela vathu vako ngako va di kuonhete.

⁴⁰Konkuwa, awe Txizimu txangu, hi wone u engisa mikombelo yathu yi hi mahako ka wukhalo wuwa,

⁴¹ MKOMA Txizimu khukha konkuwa u wulela u humula ka wukhalo wako, awe ni dibhokiso da mtamo; MKOMA Txizimu, vaphaxeli vako va na ambale kuhanyiswa, se ni vasawuleki va na tsakele wunene wako.

⁴²O MKOMA Txizimu, u nga jikise khohe ya mtotiwa wako; alakanya wumbilu wa Dhavhidha txithumi txako.