Read chopi 2 Makronika 7 Bible Online

2 Makronika 7 - chopi bible

2 Makronika 7

¹Mbimo yi Solomoni a nga heta kukhongela, ku to txhika mndilo ngu nzumani u hisa mningelo wo hiswa ni miphaxo; se wudhumo wa MKOMA wu to tata nyumba.

²Vaphaxeli ve tandeka ni kuwulela Nyumbani ka MKOMA, nguko wudhumo wa MKOMA u ti tatile Nyumba ya MKOMA.

³Se votshe vanana va ka Israyeli, mbimo yi va nga wona ti to mndilo ni wudhumo wa MKOMA sa txhika txitimwi ka nyumba, va to khizama ve namisa tikhohe tawe ti gwesa mafu, ve khozela ni kudhumisa MKOMA, nguko mbwa mnene, ni lirando lakwe li na zumba ngu ha ku si gwitiko.

⁴Se mfumeli ni votshe va ka Israyeli, va to phaxa miphaxo masoni ka MKOMA.

⁵Se mfumeli Solomoni a to ningela mphaxo ngu kuthutha, 22.000 wa tihomu, ni 120.000 wa tinvuta; ngu kumaha keto, mfumeli ni votshe vanana va ka Israyeli, va to ningelisisa Nyumba ya Txizimu.

⁶Vaphaxeli, va ti ti emile madingano ni mitxawa yawe, kufana ni Valevhi va ti ti emile ngu mitxawa yawe va di ni timbila ati ti ngati longisetwe MKOMA, ati ti nga mahwa ngu mfumeli Dhavhidha, kasi kuva txi dhumisa ngu tona MKOMA va txi kha vona: Nguko lirando lakwe kha li na mbi guma; mbimo ayi Dhavhidha a nga ti dhumisa ngu mithumo yawe; vaphaxeli va ti ti txaya mipundu masoni kwawe, na votshe va ka Israyeli va ti emile.

⁷Solomoni a to sawulekisa mtendela wa masoni ka Nyumba ya MKOMA; ngu konaho a nga lulamisela kona miphaxo ya kuhiswa ni miningelo, kumweko ni mafura a miphaxo ya kuthutha; nguko txiluvelo txa koporo txi nga ti mahilwe ngu Solomoni, i ti ti txidotho ku si eneli kumahela kona miphaxo ya kuhiswa, ni mningelo, ni mafura a miphaxo ya kuthutha.

⁸Ka mbimo yoneyo, Solomoni a to maha m'buso, wa mtxhanu wa masiku ni mambidi, a di kumweko ni votshe va Israyeli, dibutho dahombe, kukhukhela txidingeni ka Hamati kala ka mnambo wa Egipta.

⁹Se ka ditshiku da wutxhanu ni mararu, va to hamba m'buso wo hetelela, nguko va ti ti hetile mtxahanu wa masiku ni mambidi va txi khangula txiluvelo ni mtxahanu wa masiku ni mambidi va txi maha mibuso.

¹⁰Ngu ditshiku da magumi mambidi ni masiku mararu, ka mtxima wa wutxhanu ni wumbidi, mfumeli Solomoni a to hangalasa vathu, se va to tsula matendani kwawe, va di tsakile ngutu ta tinene, ngu mahaka ya totshe ta tinene tile MKOMA a nga mahela txithumi txakwe Dhavhidha, ni Solomoni, ni vathu vakwe va Israyeli.

¹¹Ku to maheka a tito, Solomoni a txi heta kuaka Nyumba ya MKOMA, ni nyumba ya mfumeli, ni yotshe mixuvo ya Solomoni, ayi a nga yi maha ngu kuranda kwakwe, Nyumabani ka MKOMA ni nyumbani kwakwe.

¹²Se MKOMA a to ti wonekisa ni wusiku ka Solomoni a m'gela ku khene: Ni pfite mkombelo wako ni kudila kwako, ni sawute wukhalo wuwa kasi ku va nyumba ya mphaxo wangu.

¹³Ngako ni txo thuka ni vhala nzuma, ni mati masini, kumbe kurumela tihumbi ti ta heta tithembwe, mwendo ku ni rumela mitungu hagari ka vathu vangu,

¹⁴Ngako vathu vangu, avale va dhanwako ngu ditina dangu, va txi ti sola, ve khongela, ve leka tinzila tawe to biha, ani ni na va engisa ni di nzumani, ni va divalela sionho sawe, ni holisa ditiko dawe.

¹⁵Konkuwa, maso angu ma na tuleka ni tinzeve tangu ti na engisa mikombelo yi yi no mahwa ka wukhalo wuwa.

¹⁶Nguko konkuwa ni sawute nyumba yiya, ni yi sawulekisa, kasiku wu veka kona ditina dangu yotshe mbimo; se maso angu ni mbilu yangu si na zumba kona mule masiku otshe.

¹⁷Se ngako awe u txi tsimbila masoni kwangu ku nga ti a nga tsimbilisa tona tate wako Dhavhidha, u maha totshe a ti ni nga kuruma tona, ni kuxayisa milayo yangu ni sileleto sangu,

¹⁸ ngu kona ni no tsanisa txikhalo txako txa wukoma, madigano ni txitumelelano a txi ni nga maha ni tate wako Dhavhidha, ni txi khani: Khu na mbi pwata dijaha do fumela Israyeli.

¹⁹Sekoko ngako mi txi hambuka mi leka milayo yangu ni sileleto sangu asi ni nga mi ninga, mi tsula mi ya khozela sizimu simwani mi si khizamela,

²⁰sekoko ni na mi thavisa ka ditiko diya ni nga mininga, se ka yiya nyumba ni nga yi sawulekisela ditina dangu, ni na yi tshotsha kule ni nani, ni mi maha txisekiso hagari ka votshe vathu.

²¹Se nyumba yiya yi nga guletwa ngutu, ni mmhi wu a no pinda ngu hawa, a na xamala, a txi khene: Ngu kutxani MKOMA e maha to nga tiya ka ditiko diya ni ka vathu vava kani?

²²Va na xamula va txi kha vona: Nguko va lekile MKOMA Txizimu txa vatate vawe, a txi txi nga va humisa ditikoni da Egipta, se va ti ningete ka sizimu sa walo, ve si khozela ni ku si thumela; ngu mhaka yeto, MKOMA a to rumela sikarato siya sotshe txitimwi kwawe.