Read chopi 2 Makronika 9 Bible Online

2 Makronika 9 - chopi bible

2 Makronika 9

¹ Mbimo yile mfumeli wa txisikati wa Sabha a nga pfa nduma ya Solomoni, a tile Jerusalema e ta m'hika ngu siwotiso so karata. A to ta ni dibutho da hombe, ni makameli ma di rwate sidyanadyana, ni nzalama yayingi ngutu, ni marigwi a lisima; se e ta geletela Solomoni totshe ti a ngadi nato mbiluni kwakwe.

²Se Solomoni a to mtxhamusela totshe timhaka takwe; mfumeli kha sisa ni txa tximwetxo asi m'geli.

³Mbimo yile mfumeli wa txisikati wa Sabha a nga pfa wuzivi wa Solomoni, e wona ni nyumba yile a nga ti yi akile,

⁴ni sakudya sa ha mezani kwakwe, ni mazumbelo a tikhumbi takwe, ni mathumelo a vathu vakwe, ni syambalo sawe, ni vatheleli va magombe akwe, ni syambalo sawe, ni mu a nga txi kwela ngu kona a txiya Nyumbani ka MKOMA, a to pwata ni txo womba.

⁵A to khene ka mfumeli: I ti ditshuri dipswi di ni nga dipfa ditikoni kwangu, ngu mhaka ya mithumo yako ni wuzivi wako.

⁶Aniko ani ni si makholwi mapswi ako, niza ni txita, se maso angu ma ti wonile; kha va siyeta ku ni gela ka kona; u pindisile ngutu ngu wutxhari ni tithomba ka nduma yile ni nga yipfa.

⁷Va katekile vavamna va u ku navo, vakatekile vathumi vako avale yotshe mbimo va ku masoni kwako, va pfisisako wutxhari wako!

⁸A na dhumiswe MKOMA Txizimu txako, awu a tsakako ngu ngawe, kasi e kuveka ha txituluni ka wukoma wa Israyeli, kasi ku u txi fuma ngu ditina da MKOMA Txizimu txako, ngu ku Txizimu txako txa randa Israyeli ka yotshe mbimo; ngu mhaka yeto, a kumahile mfumeli, kasi uva ni kupimisa ni wululamo.

⁹Se a to ninga mfumeli 120 wa titalenta ta nzalama, ni tixakaxaka tatingi ta makha, ni marigwi a lisima ngutu; kha kuzivi kuta makha amangi ngutu ku nga tiya mfumeli wa txisikati wa Sabha a nga ningisa tona mfumeli Solomoni.

¹⁰Kambe tikhumbi ta Hiramu ni tikhumbi ta Solomoni a ti ti nga tisa nzalama ti txi khukhela Ofiri, ti txi tisa ni mapulango amangi ngutu almuge, ni marigwi a lisima.

¹¹Se mapulango eyo ya almuge mfumeli a to hamba ngu ona sikadha sa Nyumbani ka MKOMA ni sa nyumbani ka mfumeli, kumweko ni tiharipa ni misengele ya vaembeleli; kha kuzivi kuta mapulango o ngeto ditikoni da Judha.

¹²Mfumeli Solomoni a to ninga mfumeli wa txisikati wa Sabha, sotshe sile a nga si kombela ngu ku si navela, kuleka sile a nga maha ngu kuninga apune, madingano ni wuha wa mfumeli Solomoni; se a to tshumela e khukha kuya ditikoni kwakwe, ene ni tikhumbi takwe.

¹³Se kunemela ka nzalama yile yi nga txi nehwa ka Solomoni dilembe ni dilembe i ti ka 666 wa titalenta ta nzalama.

¹⁴Hahanze ka si si nga wiyiswa ngu vanyamabhindu ni vaxavisi, ni ya votshe vafumeli va Arabhiya, ni vathangeli ta ditiko da kona va ti tisa nzalama ni silivhela ka Solomoni.

¹⁵Solomoni a mahile 200 wa makhalo ngu nzalama yo tshulwa; 600 wa mandagarita a nzalama a to ruma kuva me pimwa, o lumba wukhalo ni wukhalo;

¹⁶a to maha kambe 300 wa sivhikelo sa nzalama yo tshulwa, txivhikelo ni txivhikelo txi ti ni mpimo wa 300 wa maxekela a nzalama; eya si veka txitingani ka Libhanoni.

¹⁷Mfumeli a to maha txikhalo txa hombe txa wukoma ngu makwasa a tinzofu e tshulela ngu nzalama ya yinene ngutu.

¹⁸Txitulwetxo txa wukoma, txi ti ni mtxhanu wa sikando ni tximwetxo, ni txikhigelo tximwetxo txa mikondo txo mahwa ngu nzalama, se madhawa otshe a mambidi ku di ni sikhigelo kala ha ka txikhalo txa kona; ni tingonyamo timbidi ti di kumweko ni sikhigelo.

¹⁹Kona txitimwi hale ka sikadha sa mtxhanu ni tximwetxo sa madhawa mambidi, ku di ni digumi da tingonyamo ni timbidi; ku si zivi ka nga mahwa so fana niso ka mfumo ni wawumwewo.

²⁰Sotshe siya sile a nga txi sela ngu sona mfumeli Solomoni i ti ti sa nzalama, ni sotshe sigoto sa txitingani ka Libhanoni i ti sa nzalama ya lisima; ku si nga ni silivhela, ngu masiku a Solomoni, yi si nga ni kudhundeka ni kakumweko.

²¹Nguko mfumeli a di ni sitataru sa Tarxixi, ni sitataru sa tikhumbi ta Hiramu, kumweko ngu malembe mararu, ku txi wuya sitataru sa Tarxixi si txi tisa nzalama ni silivhela, ni makwasa a tinzofu, ni tikhawu ni mapavawu.

²²Sekoko mfumeli Solomoni a to pinda (pala) votshe vafumeli va ha mafuni ngu tithomba ni wuzivi.

²³Votshe vafumeli va ha mafuni va txi lava kuwona khohe ya Solomoni, kasi vepfa wuzivi wule Txizimu txi nga ti vekile mbilinu kwakwe.

²⁴Se mmweyo ni mmweyo a txi ta mninga siya sa silivhela ni siya sa nzalama, syambalo, ni matxhari, ni makha, ni mahantxhi, ni mamula; tximwetxo ni tximwetxo ngu dilembe ni dilembe.

²⁵Kambe Solomoni a di ni 4.000 wa mahantxhi o ndinda sikotxikani sa tiyimbi, ni 12.000 wa vagadhi va mahantxhi, e si yisa ka madhoropa a sikotxikani, se simwani si zumba kumweko ni mfumeli Jerusalema.

²⁶ A ti ti fuma votshe vafumeli, kukhukhela mnamboni kala ditikoni da Vafilista, kala magwito ka Egipta.

²⁷Mfumeli a to maha ti to Jerusalema kumaneka silivhela yo tala ku nga marigwi ni mikedhari o tala ngutu nga miphayi ya txitinga yi manekako mapuloni.

²⁸ Se ku txi tiswa mahantxhi ngu Egipta ni ngu ka matiko otshe me ta ningwa Solomoni.

²⁹Se ngu wungi wa mithumo ya Solomoni, ni totshe tile a nga maha, ti ngava ti sa bhalwa amu ka dibhuku da matimu a Nathani mprofeti, ni ka wuprofeti wa Ayiya wa Siloni, ni ka siwoniso sa Idho m'huti, ngu Jerobhowamu mwana Nebhate?

³⁰Solomoni a to fumela Jerusalema ka dotshe ditiko da Israyeli, mune wa magumi a malembe.

³¹Se Solomoni a otete aha va ku kona vatate vakwe, a to tshotshwa Didhoropani ka tate wakwe Dhavhidha, se mwanana wa kona Robhowamu a to fuma ka wukhalo wakwe.