Read chopi Ezra 1 Bible Online

Ezra 1 - chopi bible

Ezra 1

¹Ka dilembe do khata da Siro, mfumeli wa Persiya (kuva di txi na tatiseka dipswi da MKOMA ngu txisofu txa Jeremiya), MKOMA a to wusa moya wa Siro, mfumeli wa Persiya, a nga kwangula ka dotshe ditiko dakwe, kumweko ni kubhala, a txi khene:

² MKOMA, Txizimu txa nzuma, a ni ningile yotshe mifumo ya ha mafuni; se a ni rwekile ku mu akela nyumba kona Jerusalema, i ku kona Judha.

³Ni wihi a kuho hagari kwanu, ka votshe vathu vakwe, Txizimu txakwe txi nave ni nene, a na kwelele eya Jerusalema, i ku kona Judha, eya aka Nyumba ya MKOMA, Txizimu txa Israyeli; nguko ene Njizimu txi zumbako Jerusalema.

⁴Se ni vahi vale va no ya zumba ve luvela ka wukhalo wokari, vavamna va wona wukhaloewo va na m'vhuna ngu silivhela ni nzalama, siya, sifuyo, ni siningo simwani va no ti lava kuningela Nyumbani ka Txizimu, txi txi zumbako Jerusalema.

⁵Sekoko vathangeli va vatate va miti ya tihunzu ta ka Judha ni Bhenjamini, ni vaphaxeli, ni Valevhi, ni votshe vale Moya wa Txizimu wu nga va wusa, va to ya kuya aka Nyumba ya MKOMA, wu a ku Jerusalema.

⁶Se votshe vale va zumbako madhawani kwawe va to va vhuna ngu siya sa silivhela ni sa nzalama, ni siya, sifuyo, ni simwani so tshura, ni sotshe sile si nga ningwa ngu lidhundo.

⁷Kambe mfumeli wa Siro a to humisa siya Nyumbani ka MKOMA, asile si nga ti ti tisilwe Jerusalema ngu Nabhukodhonozori, e ta si veka nyumbani ka sizimu sakwe.

⁸Siro, mfumeli wa Persiya, asi thavisile ngu dianza da Mitredhate, mxayisi wa tithomba, a nga si ningela manzani ka Sesibhazari, mthangeli wa ka Judha.

⁹Mtengo wa kona ngu wuwa: Magumi mararu a mikamba ya nzalama, 1.000 wa mikamba ya silivhela, ni yimwani mikamba ya magumi mambidi ni mtxhanu ni mune,

¹⁰magumi mararu a majingo a nzalama, 410 wa majingo a silivhela ya wumwani mxowo, ni simwani siya sa 1.000.

¹¹Sotshe siya sa silivhela ni sa nzalama mtengo wa 5.400; sotshe siya a tekile Sesibhazari, mbimo yile va ka Israyeli va nga huma ngu wukhumbini Bhabhilona, ve tshumelela Jerusalema.