Read chopi Ezra 10 Bible Online

Ezra 10 - chopi bible

Ezra 10

¹Se mbimo yile Ezra a nga khongela, e ti sola, e dila, e ti namisa masoni ka Nyumba ya MKOMA, vathu va msengeletano wa hombe wa va ka Israyeli, vavamna ni vavasikati, ni vanana, va to ta patana nayo, na va txi dila, ngu huwa ya hombe.

²Sekaniya, mwana Jeyeli, mmweyo wa vanana va Elamu, a to xamula a txi khene ka Ezra: Athu hi ti nga eyisa Txizimu txathu, hi tekile vasikati va mamwani matiko, hambi keto, ka yona mhakeyo, ku nga diho kuthemba ka Israyeli.

³Konkuwa koko, a hi maheni txitumelelano ni Txizimu txathu, txaku hi na tshumeta votshe vasikati ni vanana vawe, madingano ni txilayelo txa MKOMA, ni txirumo txa Txizimu txathu; ti mahwa madingano ni Mlayo.

⁴Khukha koko, nguko ya kulumba mhaka yiya, se athu hi nava ni nawe; ti karate u maha toneto.

⁵Sekoko Ezra a to khukha e xambanyisa vathangeli va vaphaxeli ni Valevhi, ni votshe va ka Israyeli, ati to va na maha madingano ni dipswi diya; se vona va to xambanya.

⁶Se Ezra a to khukha ngu masoni ka Nyumba ya Txizimu, e wulela ka txibhiya txa Jehohanani, mwana Eliyasibhe, a di hokile, kha ngadya dipawu, kambe kha sela mati, nguko a ti pandisekile ngu sihambunyeto sa vale va wukhumbini.

⁷Se va to txhumayela kotshe Judha ni Jerusalema, ka votshe vale va nga ti wuyile ngu wukhumbini, ti to ve sengeletana Jerusalema.

⁸Se votshe vale ku no pinda masiku mararu va si se hoka, madingano ni silayelo sa vathangeli ni sa madhota, yotshe thomba yawe yi na tsimbiselwa, kambe ene a na thaviswa ka msengeletano wa vale va nga wuya ngu wukhumbini.

⁹Sekoko votshe vavamna va ka Judha ni va ka Bhenjamini, ngu masiku mararu va to sengeletana Jerusalema; i ti mtxima wa wutxhanu ni mune, ka ditshiku da magumi mambidi ka mtxima; se votshe vathu va to khalahatsha mthandani ka Nyumba ya Txizimu, na va txi dhudhumela ngu mhaka yiya, ni kuna ka nzuma ya hombe.

¹⁰Sekoko a to khukha Ezra, i ku mphaxeli, e va gela tiya: Anu mi hambunyetile, ngu kuteka vasikati va mamwani matiko, mi andisa kuhotela ka Israyeli.

¹¹Sekoko, anu ti soleni masoni ka MKOMA, Txizimu txa vatate vanu, mi maha kuranda ka txona; hambanani ni vathu va matiko, ni vasikati va matiko.

¹²Se wotshe msengeletano wu to xamula ngu mapswi o guleka wu txi kha wona: Ti na maheke; madingano ni mapswi ako, eto ta hi dingana kumaha.

¹³Hambi keto vathu mbangi, kambe kuna nzuma ya hombe, kambe kha ti koteki kuzumba hahanze hawa; hi nga mthumo wa ditshiku dimwedo, mwendo mambidi, nguko hi vangi hi nga hambunyeta mhaka yiya.

¹⁴Sekoko ku na vekwe vathangeli vathu ditinani ka wotshe msengeletano, mndani ka mhaka yiya; ni votshe vale va ku madhoropani kwathu, va nga tekana ni vasikati va mamwani matiko, va nate ngu timbimo ta kona, kumweko ni madhota a didhoropa dimwedo ni dimwedo, ni valamuli vawe, hiza hi jikisa kule ni nathu kutura ka txiviti txa Txizimu txathu, ngu mhaka yiya.

¹⁵Hambi keto hahanze ka Jonatani, mwana Asayeli, ni Jazeya, mwana Tikivha, va to kaneta mhaka yiya; nene Mesulamu ni Sabhetayi, Mlevhi, va to va vhuna.

¹⁶Va to maha eto avale va nga wuya ngu wukhumbini; se va to phawuka mphaxeli Ezra ni vavamna, ni vathangeli va vatate madingano ni tinyumba ta vatate vawe, ni votshe ngu matina awe; ngu ditshiku do khata da mtxima wa wugumi, va to khalahatsha ve wotisela ngu mhaka yiya.

¹⁷Se va to heta kuxola mahungu a votshe vavamna vale va nga ti tekile vavasikati va mamwani matiko, kala ka ditshiku do khata da mtxima wo khata.

¹⁸Se ku to maneka hagari ka vanana va vaphaxeli avale va nga tekana ni vavasikati va mamwani matiko: Ka vanana va Jesuwa, vanana va Jozadhake, ni vanawe: I ku Mahaseya, ni Eliyezeri, ni Jaribhe, ni Gedhaliya.

¹⁹Va to ningana manza, na va txi thembisa ku va na salisana ni vasikati vawe, se ngu ku tipfa mnandu, va to teka hamba ka mtxhambi ve maha mphaxo ngu mhaka ya sionho sawe.

²⁰Se ngu ka vanana va Imeri: I Hanani ni Zebhadhiya.

²¹Se ngu ka vanana va Harimu: I Mahaseya, ni Eliyasi, ni Semaya, ni Jeyeli, ni Uziya.

²²Se ngu ka vanana va Pasuri: I Eliyowenayi, Mahaseya, Ismayeli, Nathaniyele, Jozabhadhi ni Elasa.

²³Se ka va ka Levhi: Jozabhadhi, ni Simeyi, ni Kelaya (awuwa M'kelita), ni Petaya, ni Judha, ni Eliyezeri.

²⁴Ni ka vaembeleli: Eliyasibhe; ni ka vaxayisi va matimba: I Salumi, ni Telemi, ni Uri.

²⁵Se va ka Israyeli ka vanana va Parosi: Ramiya, ni Jeziya, ni Malkiyasi ni Miyamimu, ni Eleyazari ni Malkiyasi, ni Bhenaya.

²⁶Ni ka vanana va Elamu: Mataniya, ni Zakariya, ni Jeyeli, ni Abhidhi, ni Jerimoti ni Elija.

²⁷Se ka vanana va Zatu: Eliyowenayi, ni Eliyasibhe, ni Mataniya ni Jerimoti, ni Zabhadhi ni Aziza.

²⁸Se ka vanana va Bhebhayi: Jehowana, Hanayiya ni Zabhayi ni Atilayi.

²⁹Se ka vanana va Bhani: Mesulamu, ni Maluke, ni Adhaya, ni Jasubhe ni Seyali, ni Jerimoti.

³⁰Se ka vanana va Pahate-Mowabhi: Adhina, ni Kelali, ni Bhenaya, ni Mahaseya, ni Mataniya, ni Bhezaleli, ni Bhinuyi, ni Manasi.

³¹Se ka vanana va Harimu: Eliyezeri, Isiya, Malakiya, Semaya, Mimiyoni,

³²Bhenjamini, Maluke ni Samariya.

³³Se ka vanana va Hasunmi: Matenayi, Matata, Zabhadhi, Elifeleti, Jeremayi, Manasi ni Simeyi.

³⁴Se ka vanana va Bhani: Mahadhani, Aniramu, ni Wele,

³⁵Bhenaya, Bhedhiya, Keluyi,

³⁶Vaniya, Meremote, Eliyasibhe,

³⁷Mataniya, Matenayi, Jahasayi.

³⁸Bhani, Bhinuyi, Simeyi,

³⁹Selemiya, Natamu, Adhaya,

⁴⁰Makinadhebhayi, Sasayi, Sarayi,

⁴¹Azareli, Selemiya, Semariya,

⁴²Salumi, Amariya ni Josefa.

⁴³Se ka vanana va Nebho: Jeyiyeli, Matitiya, Zabhadhi, Zebhina, Jadhayi, Joyeli ni Bhenaya.

⁴⁴Votshe vava va ti tekile vavasikati vavamatiko; kambe vamwani hagari kwawe, va ti ti ni vasikati va nga va velekela vanana.