Read chopi Ezra 4 Bible Online

Ezra 4 - chopi bible

Ezra 4

¹Mbimo yile valala va Judha ni Bhenjamini va nga engisa to kha vona, a vale va nga wuya ngu wukhumbini, va aka dithepele da MKOMA Txizimu txa Israyeli,

² va tile ka Zorobhabheli ni ka vathangeli vavatate ve ta kha vona: Hi lekeni hi aka ni nanu, nguko, ku nga anu, hi na xota kumweko Txizimu txanu; nga kule nathu hi txi phaxelako kukhukhela ka masiku a Esari-Edhomi, mfumeli wa Asuri, i ku ene a nga hi ruma kuta hawa.

³Sekoko Zorobhabheli ni Jesuwa, ni vamwani vathangeli vavatate va ka Israyeli, va to kha vona: Kha ti laveki ati to anu ni nathu hi akela nyumba Txizimu txathu; aniko athu hokha, hi na muakela nyumba MKOMA, Txizimu txa ka Israyeli, nga ti hi nga leletiswa tona ngu mfumeli Siro, mfumeli wa Persiya.

⁴Ngu kumaha keto, vathu va ditiko dile va to karalisa manza a vathu va ka Judha, va txi va kayelisa ka mhaka ya kuaka.

⁵Se va to xavelela madhota o dingana kuthidhelisa mhaka yawe, ka otshe masiku a Siro, mfumeli wa Persiya, kala kufumani ka Dhariyo, mfumeli wa Persiya.

⁶Se hahatshi ka kufuma ka Asuwero, ngu kukhata kwakwe kufuma, va to bhala tximangalo txo wukela vazumbi va ditiko da ka Judha, kona Jerusalema.

⁷Ka masiku ya Aritasasta, Bhisilamu, Mitredhate, Tabhili, ni vamwani vangana vakwe, va to bhalela Aritasasta, mfumeli wa Persiya; dipasi di ti ti bhatwe ngu mibhalo ya Txiharamu, aniko ngu lidimi la Txisiriya.

⁸Vamabhalani va kona koko i ti ti Rewumi, mthangeli, ni Sinisayi, mabhalani, dipapilo do wukela Jerusalema, ka mfumeli Aritasasta, ngu mamahelo awa.

⁹Sekoko Rewumi, mthangeli, kumweko ni Sinisayi mabhalani wa kona, ni vamwani va vangana vawe, va to bhala tiya: Vadhinati ni Vafarsaki, Vatarpeli ni Vafarisita, Vaarkevhi ni Vabhabhilona, Vasusaki ni va ka Dheha, ni Vaelami,

¹⁰ni vamwani vathu, va nga tekwa ngu wa hombe ni wa nduma, Osinapari, a txi ya va maha vazumbi va didhoropa da Samariya, ni vamwani va mtxhatuko ka mnambo, ka yona mbimo yile.

¹¹Mahungu a dipapilo dile va nga rumela ka mfumeli Aritasasta ngu awa: “Sithumi sako i ku vavamna va mtxhatuko ka mnambo, ngu mbimo ya kona.”

¹²Ti zive awe mfumeli taku Vajudha vale va nga khukha ngu kheyo kwako veta kwathu Jerusalema, se va aka ngu kanu didhoropa, ni kuwusa maguma a kona, ni kululamisa sitsaniso sa kona.

¹³Konkuwa a na ti zive mfumeli taku, ngako di txo aketwa didhoropa dile, maguma a dona me wuswa, kha va na mbi dihela madingano, i ku tiresa ni timbasani; se yi na hangalakisa toneto thomba ya mfumeli.

¹⁴Sekoko, ngako hi holiswako ngu wukoma, na kuve kha ti hi dingani kuwona kwa mbi dhundeka ka mfumeli, ngutxo txi hi mahako hi rumela txiziviso ka mfumeli.

¹⁵Ati to ku na xolwe ka dibhuku da matimu a vatate vako, emo ka dibhuku da matimu, u na tiziva konemo ti to didhoropa dile ndo akwa ngu kanu, do wukela vafumeli ni matiko a hombe a mndani ka ditiko, niku kuve ni kuwukelwa ka dona ka timbimo ta kale.

¹⁶Athu koko hi txharihisa mfumeli ti taku di txo aketwa didhoropa dile, ni kuwuswa maguma a kona, tekela ku tiziva taku khu na mbi mana ni wawumwewo wukhalo kheno mtxhatuko ka mnambo.

¹⁷Se mfumeli a to rumela xamulo yiya. “Ka Rewumi, mthangeli, ni ka Sinisayi mabhalani wa kona, ni ka vamwani vale a nga ti kumweko navo, va nga ti ti zumba Samariya; a to rumela kambe ka votshe vale va nga ti ti sate mtxhatuko ka mnambo a txi khene: Kuthutha! Ngu mbimo ya kona!”

¹⁸Dipapilo dile u nga hi rumelela digondilwe kha kwati masoni kwangu.

¹⁹Se ni rumile, va xote ve mana taku, ka timbimo ta kale, didhoropa dile di akilwe ngu kanu masoni ka vafumeli, se ka dona ka wuswa kulwa ni kutxhipisa.

²⁰Hambu keto ku ti ti ni vafumeli va mtamo ngutu txitimwi ka Jerusalema, va nga khozisa otshe makhalo na va ti mtxhatuko ka mnambo, va txi ningwa timale, tiresa ni timbasani.

²¹Konkuwa, va ningeni dipswi vavamna vale, ati to ve ema, va si ngadi ve aka didhoropa dile, kala ani ni womba dimwani dipswi.

²²Ti woneleni ku mi si phazami keto; txi na kulela txani txikaratwetxo txi ta thikameza vafumeli kani?

²³Sekoko msana ka kuva di di gondilwe dipapilo da mfumeli Aritasasta, masoni ka Rewumi, ni Sinisayi, mabhalani wa kona, ni vangana vakwe, va to tsula ngu txikuluveta Jerusalema, veya tsimba Vajudha ngu ku va lwisa ngu manza.

²⁴Se ku to ema kuakwa ka Nyumba ya MKOMA, a nga ti ti maneka Jerusalema, ku to ema kala ka dilembe da wumbidi da kufuma ka Dhariyo, mfumeli wa Persiya.