Read chopi Nehemiya 11 Bible Online

Nehemiya 11 - chopi bible

Nehemiya 11

¹Se vathangeli va vathu va to aka Jerusalema, aniko vathu va xaxuva tixolo kasi kusawula mmwewo ka mtxawa wa digumi, wu no ya aka didhoropani ko sawuleka ka Jerusalema, se a va va mtxhanu ni mune va na ya aka ka madhoropa mamwani.

²Se ditiko di to katekisa votshe vathu va va nga ti ningeta ngu kuranda kwawe kuya zumba Jerusalema.

³ Se a vava mba thangeli va ditiko va nga aka Jerusalema (se ka madhoropa a Judha mmwani ni mmwani a ti ti akile ka wukhalo wakwe, ka madhoropa awe, i ku vava: Vaisrayeli, vaphaxeli, ni Valevhi, ni Vaneti, ni vanana va tikhumbi ta Solomoni.)

⁴Vamwani ka vanana va ka Judha ni ka vanana va ka Bhenjamini va akile Jerusalema. Ka vanana va ka Judha i ti ti: Ataya, mwana Uziya, mwana Zakariya, mwana Amariya, mwana Sefatiya, mwana Mahalaleli, wa vanana va Perezi;

⁵ni Mahaseya mwana Bharuke, mwana Koli-Hoze, mwana Hazaya, mwana Adhaya, mwana Joyaribhe, mwana Zakariya, mwana Musiloni.

⁶Votshe vanana va Perezi, va va nga zumba Jerusalema, i ti 468 wa vavamna va mtamo.

⁷Vanana va Bhenjamini ngu vava: Salu, mwana Mesulami, mwana Johedhi, mwana Pedhaya, mwana Kolaya, mwana Mahaseya, mwana Itiyeli, mwana Jesaya.

⁸Se msana kwakwe, ku ti ni Gabhayi ni Salayi: I ti 928.

⁹Sekoko mthangeli wawe i ti ti Joyeli, mwana Zikiri; ni Judha mwana Senuwa, madingano ni madhoropa.

¹⁰Ka vaphaxeli: Jedhaya, mwana Joyaribhe, Jakimi,

¹¹Seraya, mwana Hilikiya, mwana Mesulami, mwana Zadhoki, mwana Merayoti, mwana Ayitubhe, wa hombe wa Nyumbani ka Txizimu,

¹²ni vanawe, avale va nga ti ti maha mthumo wa nyumbani, i ti 822; se Adhaya, mwana Jerowamu, mwana Pelaliya, mwana Anzi, mwana Zakariya, mwana Pasuri, mwana Malikiya,

¹³ni vanawe, vathangeli va vatate vakwe, i ti 242; se Amasayi, mwana Azareli, mwana Azayi, mwana Mesilemoti, mwana Imeri,

¹⁴ni vanawe, vavamna va mtamo, i ti ti 128, mthangeli wawe i ti Zabhedhiyeli, mwana Gedholimi.

¹⁵Se ka Valevhi: I Semaya, mwana Hasubhe, mwana Azirikami, mwana Hasabhiya, mwana Bhuni;

¹⁶se Sabhetayi ni Jozabhadhi, misungo ya va ka levhi, va ti ti thangela mthumo wa hahanze ka Nyumba ya Txizimu;

¹⁷se Mataniya, mwana Mika, mwana Zabhedhi, mwana Asafe, mthangeli wu a nga khata mkombelo wa kubonga, ni Bhakebhukiya, i nga ti ti wa wumbidi ka vanawe; kulondeta Abhidha, mwana Samuwa, mwana Galali, mwana Jedhutuni.

¹⁸Votshe Valevhi va didhoropani ko sawuleka i ti 284.

¹⁹Se vawoneleli va sike: Akubhe, Talimoni, kumweko ni vanawe, i ti 172 wa vawoneleli va matimba.

²⁰Se vamwani va ka Israyeli, vaphaxeli ni va ka Levhi, va ti ti maneka ka otshe madhoropa a va ka Judha, mmwani ni mmwani ka thomba yakwe.

²¹Se Vaneti va ti ti akile Ofeli; se Ziya ni Gisipa va to fumela hagari ka Vaneti.

²²Sekoko mthangeli wa va ka Levhi kona Jerusalema, i ti ti Uzi, mwana Bhani, mwana Hasabhiya, mwana Mataniya, mwana Mika, mwana Asafe, vaembeleli, ka mthumo wa Nyumbani ka Txizimu.

²³Nguko mfumeli a ti ti leletile mithumo yawe, ni ti to vaembeleli ve ningwa txyavelo txawe, mmweyo ni mmweyo ka ditshiku dakwe.

²⁴Se Petaya, mwanana wa Mesezabheli, mmweyo wa vanana va Zera, mwana Judha, a ti ti ka dianza da mfumeli, ka totshe timhaka ta vathu.

²⁵Se madingano ni mikhokhola ni tithembwe ta kona, vamwani ka vanana va ka Judha va ti akile Kiriyate-Aribha, ni ka makhalo ma nga ti fumwa ngu vona, ni ka Dhibhoni ni ka makhalo o fumwa ngu vona, ni ka Jekabhizeyeli ni madhoropa a kona,

²⁶ni ka Jesuwa, ni ka Moladha, ni ka Bheti-Palete,

²⁷ni ka Hasari-Suwali, ni ka Bherisebha, ni ka makhalo a ma nga ti fumwa ngu vona;

²⁸ni ka Zikilage, ni ka Mekona, ni ka makhalo a ma nga ti fumwa ngu vona;

²⁹ni ka Eni-Rimoni, ni ka Zora, ni ka Jarimute;

³⁰ka Zanoya, Adhulamu ni ka madhoropa a kona; Lakisi ni tithembweni ta kona; ni da Azeka ni ka makhalo a ma nga ti ti fumwa ngu vona. Se va to ya gova kukhukhela Bherisebha kala mkovani ka Hinomi.

³¹Vanana va Bhenjamini wa Gebha, va to aka ka didhoropa da Mikima, ni Ayiya, ni Bheteli, ni ka makhalo a ma nga ti ti fumwa ngu vona;

³²ni da Anatote, da Nobhe, da Ananiya,

³³da Hazori, da Rama, da Gitayini,

³⁴da Hadhidhe, da Zebhoyini, da Nebhalate,

³⁵da Lodhe ni da Ono, mkovani ka va vati.

³⁶Se vamwani Valevhi va mtxawa wa Vajudha va to aka hagari ka va ka Bhenjamini.