Read chopi Nehemiya 12 Bible Online

Nehemiya 12 - chopi bible

Nehemiya 12

¹Avava mbaphaxeli ni Valevhi va va nga wuya ni Zorobhabheli, mwana Selatiyeli, ni Jesuwa: Seraya, Jeremiya, Ezra,

²Amariya, Maluke, Hatusi,

³Sekaniya, Rehumi, Mermoti,

⁴Idho, Ginetoyi, Abhiya,

⁵Miyamini, Mahadhiya, Bhiliga,

⁶Semaya, Joyaribhe, Jedhaya,

⁷Salu, Amoki, Hilikiya, e Jedhaya; avava i ti ti vathangeli va vaphaxeli ni va vanawe, ka masiku a Jesuwa.

⁸Se Valevhi ngu vava: Jesuwa, Bhinuyi, Kadhimiyeli, Serebhiya, Judha ni Mataniya; avava ni vanawe va ti thangela mthumo wa kudhumisa.

⁹Se Bhakebhukiya ni Uni, vanawe, va ti ti masoni kwakwe ko wonelela.

¹⁰Se Jesuwa a to veleka Joyakimi, Joyakimi a to veleka Eliyasibhe, Eliyasibhe a to veleka Joyadhi,

¹¹se Joyadhi a to veleka Jonatani, Jonatani a to veleka Jadhuwa.

¹²Se ka masiku a Joyakimi, ku ti ni vaphaxeli, vathangeli va tinyumba ta vatate: Ka Seraya, mphaxeli i Meraya; ka Jeremiya, i Hananiya;

¹³ka Ezra, i Mesulami; ka Amariya, i Jowanani;

¹⁴ka Maluke, i Jonata; ka Sebhaniya, i Josefa;

¹⁵ka Harimi, i Adhina; ka Merayoti, i Helikayi;

¹⁶ka Idho, i Zakariya; ka Ginetoni, i Mesulami;

¹⁷ka Abhiya, i Zikiri, ka Miniyamini ni ka Mohadhiya, i Pilitayi.

¹⁸Ka Bhiliga, i Samuwa; ka Semaya, i Jonata;

¹⁹se ka Joyaribhe, i Matenayi; ka Jedhaya, Uzi;

²⁰ka Salayi, i Kalayi; Amoki, i Hebheri;

²¹ka Hilikiya, i Hasabhiya; ka Jedhaya, i Netaneli.

²²Matina a Valevhi vale i nga ti vathangeli va tinyumba ta vatate, ka masiku a Eliyasibhe, ni Joyadha, ni Jonani, ni Jadhuwa, ma bhatwe; ni a vaphaxeli, kala kufumani ka Dhariyo, mupersiya.

²³Vanana va Levhi, vathangeli va tinyumba ta vatate, va bhatwe dibhukuni ka makronika, kala ka masiku a Jowanani, mwana Eliyasibhe.

²⁴Ndiva koko vathangeli va Valevhi: Hasabhiya, Serebhiya, ni Jesuwa, mwana Kadhimiyeli; se vanawe va ti masoni kwakwe, va txi dhumisa ni kuninga kubonga, madingano ni kuleleta ka Dhavhidha, m'thu wa Txizimu.

²⁵Mataniya, Bhakebhukiya, Obhadhiya, Mesulami, Talimoni ni Akubhe i ti vaxayisi vo woneleta sike sa tinyumba to veka ka tona siya.

²⁶Avava mba masiku a Joyakimi, mwana Jesuwa, wa mwana Jozadhake, ni masiku a Nehemiya, mfumeli, ni ka masiku a mphaxeli Ezra, mabhalani.

²⁷Se ka mbimo ya kuningelisiswa ka diguma da Jerusalema, ku to lwa Valevhi ka otshe makhalo awe, kasi ku ta maha mthumo wo ningelisisa ngu kutsaka, va txi dhumisa, ni tindando, ni sitende, misengele ni tiharipa.

²⁸Se vanana va vaembeleli va to sengeletana, va libalani li li nga ranganyetako Jerusalema, ni va mikhokhola ya Netofa,

²⁹kumweko ni va nyumba ya Giligali, ni va tithembweni ka Gibheya, ni Azimavhete; nguko vaembeleli va ti ti akete mikhokhola madhawani ka Jerusalema.

³⁰Se vaphaxeli ni Valevhi va to ti sawulekisa; koneko va to sawulekisa vathu, ni matimba ni diguma.

³¹Sekoko ni to kweta vathangeli va ka Judha txitimwi ka diguma, se ni veka mitxawa yimbidi ya hombe ya vaembeleli. Mtxawa wumwewo ngu didhawa da txinene txitimwi ka diguma, ka didhawa da Txike txa Ditalani.

³²Se ngu msana kwawe, ku ti londeta Hosaya, ni hafu ya vathangeli va ka Judha,

³³ni Azariya, ni Ezra, ni Mesulami,

³⁴ni Judha, ni Bhenjamini, ni Semaya, ni Jeremiya;

³⁵ni vamwani va vanana va vaphaxeli, va nga ti ni mipundu: Zakariya, mwana Jonatani, mwana Semaya, mwana Mataniya, mwana Mikaya, mwana Zakuri, mwana Asafe,

³⁶ni vanawe, i ku Semaya, ni Azareli, ni Milalayi, ni Gilalayi, ni Mahayi, ni Netaneli, ni Judha, ni Hanani, ni sivetaveta sa Dhavhidha, m'thu wa Txizimu; se Ezra, mabhalani, a ti thangete masoni kwawe.

³⁷Va di hokile ka Txike txa Txisima ngu masoni kwawe, va to kwela ha dinerani ka Didhoropa da Dhavhidha ngu ha ko kwela ngu kona diguma, kukhukhela txitimwi ka nyumba ya Dhavhidha an'ze ka Txike txa Mati, ngu didhawa da wutxani.

³⁸Se mtxawa wa wumbidi wa vaembeleli wu to thangela, se ani ni londeta msana ka wona; kambe hafu ya vathu yi to tsimbila ngu txitimwi ka diguma, kukhukhela ka Txitezi txa Sikho, an'ze ka Diguma da kuanama;

³⁹se kukhukhela ka Txike txa Efrayime, ni kukhukhela ka Txike txa Kale, ni kukhukhela ka Txike txa Sihaka, ni ka Txitezi txa Hananeli, ni ka Txitezi txa Meya, an'ze ka Txike txa Sifuyo; se va to ya ema ka Txike txa Mkorani.

⁴⁰Sekoko, mitxawa yiya ya yimbidi ya vaembeleli, yi to ya ema Nyumbani ka Txizimu, kumweko ni nani, ni hafu ya valamuli vale ni nga ti navo.

⁴¹Se vaphaxeli Eliyakimu, Mahaseya, Miniyamini, Mikaya, Eliyohenayi, Zakariya ni Hananiya i ti ti vatxhayi va mipundu,

⁴²kufana kambe ni Mahaseya, ni Semaya, ni Eleyazari, ni Uzi, ni Jowanani, ni Malikiya, Elame, Ezeri; se vaembeleli va ti ti embelela kumweko ni Jeziraya, mthangeli.

⁴³Ka ditshiku donedo va to maha mphaxo wa hombe, ve tsaka, nguko Txizimu txi ti ti va ningile litsako la hombe. Se vavasikati ni vanana va to tsaka ni vona. Ngu mamahelo eyo kutsaka ka Jerusalema ku to pfala kule.

⁴⁴Ka ditshiku donedo ku to sawulwa va xayisi va sibhiya sa tithomba, miningelo yo ndiwitelwa, ni mihando yo khata, sa wugumi, ve sengeleta ka sona, madingano ni tithembwe ta madhoropa, ni makhalo a ma nga vekwa ngu Mlayo wa vaphaxeli ni Valevhi; nguko Judha a ti ti tsaka ngu mhaka ya mthumo wa vaphaxeli ni wa Valevhi.

⁴⁵ Se va to thumela Txizimu txawe ni kumaha mithumo ya kubasisa vathu; va ti thuma kufana ni vaembeleli, ni vawoneleli va sike, madingano ni kuruma ka Dhavhidha ni ka mwanana wakwe Solomoni.

⁴⁶Nguko ka masiku a Dhavhidha ni a Asafe, kukhukhela ka kale ku ti ti ni vathangeli va vaembeleli, ni tindando to dhumisa ni to bonga Txizimu.

⁴⁷Sekoko ka masiku a Zorobhabheli ni ka masiku a Nehemiya, votshe va ka Israyeli va ti ti ningela sakudya sa vaembeleli ni sa vawoneleli va sike, ka mmweyo ni mmweyo ngu ditshiku dakwe; se va ti ti si sawulekisela Valevhi, ni vona Valevhi ve si sawulekisela vanana va Aroni.