Read chopi Nehemiya 13 Bible Online

Nehemiya 13 - chopi bible

Nehemiya 13

¹ Ka ditshiku dile, ku to gondwa mu ka dibhuku da Mosi, tinzeveni ka vathu; se ka dona ku to maneka taku, va ka Amoni ni va ka Mowabhi, va nga swe ve wulela ka msengeletano wa Txizimu,

²nguko va ya huma ni dipawu ni mati ve hingeta vanana va ka Israyeli; aniko va to xava Bhalahamu, kasi ku e va ruketela, aniko Txizimu txathu txi phemberusile txiruko txi maha kateko.

³Ku to maheka koko taku va di pfite mlayo wuwa, va to thavisa ka Israyeli totshe tixaka ti ngadi patanelani.

⁴Hahanze keto, Eliyasibhe, mphaxeli, a nga ti xayisa Nyumba ya Txizimu txathu, a ti mahile wuxaka ni Tobhiya;

⁵se a to mlongisela nyumba ya hombe, eyo ku nga ti vekwa ka yona miningelo ya sakudya, dibaselo, siya, ni sa wugumi sa tindoho, ni vhinya, ni mtona, asi ku nga leletwa to si ningwa Valevhi, ni vaembeleli, ni va woneleti va sike, kufana ni mningelo wa kundiwitelwa wa vaphaxeli.

⁶Kambe mndani ka totshe eto, ani ni si nga ho Jerusalema, nguko ngu dilembe da magumi mararu ni malembe mambidi da Aritasasta, mfumeli wa Bhabhilona, ni tile ni ta wonana ni mfumeli; se msana ka masiku okari, ni to kombela kutumelelwa ngu mfumeli.

⁷Ngu kumaha keto, ni to ta Jerusalema, ni ta pfa wubihi wu a nga wu maha Eliyasibhe, kasi kusiza Tobhiya, ngu ku mmahela nyumba mitendelani ka Nyumba ya Txizimu,

⁸ti to ni panda ngutu, se ni humisela yotshe thundu ya Tobhiya, ni yi veka hahanze ka nyumba.

⁹Se ni to leleta ti to tinyumba ti sawulekiswa; ni tshumela ni wuyisa siya sa Nyumbani ka Txizimu, ni miningelo ya sakudya, ni dibaselo.

¹⁰Ni to mana kambe ti to Valevhi kha va ningwa txyavelo txawe txatxidotho, ni ti to Valevhi ni vaembeleli, avale va nga ti thuma va tutumile, mmwani ni mmwani eya ditikoni kwakwe.

¹¹Sekoko ni to lwisana ni vafumeli ni txi khani: Yi lekelwa txani Nyumba ya Txizimu kani? Se ni to va sengeleta ni va tshumetela mithumoni kwawe.

¹² Sekoko, dotshe ditiko da Judha di to tisa sa wugumi sa tindoho, ni vhinya, ni mtona, amu sisangalani.

¹³Se ko xayisa timale, ni to veka Selemiya, mphaxeli, ni Zadhoki, mabhalani, ni Pedhaya, mmweyo wa Valevhi; kumweko ni Hanani, mwana Zakuri, mwana Mataniya; nguko va manekile va di thembekile, se va to rwekwa mthumo wo phakela vanawe.

¹⁴(Ngu mhaka ya tiya, awe Txizimu txangu, ni alakanye, u nga pfhite mithumo ya lirando yi ni nga yi maha Nyumbani ka Txizimu ni ka vawoneleli va yona.)

¹⁵Ka ona ale masiku, ni woni vathu kona Judha, va txi kamela vhinya ngu Sabbata, vamwani va txi rwalela tinyanda ngu timbongola; ni vhinya, ni mauvha, ni makuwa, ni thundu ya mixowo yotshe va txi si yisa Jerusalema ngu ditshiku da Sabbata; se ni to va laya, ditshiku dile va nga ti xavisa sakudya.

¹⁶Kambe vathu va Tiri vale va nga ti akile Jerusalema, va ti tisa sihaka ni thundu yotshe, ku ta xavisa ngu Sabbata, ka vanana va ka Judha, ni Jerusalema.

¹⁷Se ni to lwisana ni sikhumukani sa ka Judha, ni si gela tiya: Wubihi muni wuwa mi wu mahako, ngu kunyenyezisa ditshiku da Sabbata kani?

¹⁸Ina hi nga tona tiya va nga maha vatate vanu, txiza Txizimu txathu txi tisa dikhombo diya txitimwi kwathu, ni ka didhoropa diya kani? Se anu mingadi mi engetela kuhenya ka Txizimu txitimwi ka Israyeli, ngu ku nyamisa Sabbata.

¹⁹Ku to maheka koko taku, matimba a Jerusalema me fenengetwa ngu mtsudi, kusanzi kuhoka Sabbata, ni leleta to ku vhalwa matimba; se ha sikenini ni to veka vamwevo ka vafana vangu, kasi ku ku si wuleli thundu ni ya yimweyo, ngu ditshiku da Sabbata.

²⁰Sekoko, vanyatithombe ni va xavisi va simaha sotshe va to otela hahanze ka Jerusalema, kumweko mwendo kumbidi.

²¹Ni to va laya, ni txi khani: Ngu kutxani mi ta otela masoni ka diguma kani? Mi txo engeta mi ti maha kambe, na mi ñola. Kukhukhela ka yona yile mbimo, kha va ta kambe ngu Sabbata.

²²Ni to gela Valevhi kuva txi ti sawulekisa, niku ve ta wonelela sike, kasi kusawulekisa ditshiku da Sabbata. (Ka tona eto kambe, awe Txizimu txangu, ni alakanye, u ni divalela ngu wunene wako wawungi.)

²³Ni wona Vajudha va vale va ngadi tekani ni vavasikati va ka Asidhodhe, ni va ka Amoni, ni va ka Mowabhi.

²⁴Se vanana vawe va ti womba-womba ka kudotho lidimi la txiasidhodhi, va si sikoti kuwombawomba txijudha,

²⁵Se ni to ya lwisana navo, ni va ruketela, vamwani kwawe ni va peka, ni va dulela misisi, se ni va xambanyisa ka Txizimu ni txi khani: Mi nga lowoliseni kambe vanana vanu vamahorana ka vanana vawe va majaha, mi nga tekeni kambe vanana vawe vamahorana m i ninga vanana vanu va majaha, hambi ku ti tekela anu mi pune.

²⁶ Ina hi nga toneto Solomoni, mfumeli wa ka Israyeli, a nga onha ngu tona, ku si nga ngadi ni mfumeli wo nga ene hagari ka matiko o tala, wa ku randwa ngu Txizimu txakwe, se Txizimu txi mveka kuva mfumeli wa dotshe ditiko da ka Israyeli kani? Hambi keto vavasikati va matiko, va to muonhisa.

²⁷Se hi nga tumelisa kutxani ti to mi maha wotshe wubihi wuwa wa hombe, mi onhela Txizimu txathu ngu kutekana ni vavasikati va matiko kani?

²⁸ Mmweyo ka vanana va Joyadha, mwana Eliyasibhe, mphaxeli wa hombe, i ti mwane wa Sambalati, muhoroni, ngu mhaka yeto, ni to mtovela masoni kwangu.

²⁹Vaalakanye, awe Txizimu txangu, nguko va nyenyezisile wuphaxeli, ni txitumelelano txa wuphaxeli, ni txa Valevhi.

³⁰Ngu kumaha keto, ni to va basisa ka yotshe mithumo ya vamatiko, ni va ninga mithumo ya vaphaxeli ni ya Valevhi, mmwani ni mmwani ka mthumo wakwe,

³¹ni lulamisa ni mningelo wa tikhuni, ngu timbimo ta kona, ni matiwula. Ni alakanye, awe Txizimu txangu, ka ta tinene.