Read chopi Nehemiya 2 Bible Online

Nehemiya 2 - chopi bible

Nehemiya 2

¹Ku to maheka koko tito, ka mtxima wa nisani, ka dilembe da magumi mambidi a kufuma ka mfumeli Aritasasta, ku ti ti vekilwe vhinya masoni kwakwe, se ani ni to teka vhinya ni thelela mfumeli; aniko ni si khali kukarateka masoni kwakwe.

²Se mfumeli a to khene kwangu: Nji txani khohe yaku yi godhola, na kuve khu lwali kani? Ina hi nga kukarateka ka mbilu. Sekoko ni to thava ngutu,

³ni txi khani ka mfumeli: Hanya mfumeli kala kupinduka! Na lambela txani kukarateka mbiluni, na kuve didhoropa, wukhalo wa mathitha a vatate vangu, wu khundumusilwe, ni matimba a kona ma hisilwe ngu mndilo kani?

⁴Sekoko mfumeli a to khene kwangu: U kombela txani konkuwa kani? Sekoko ni to khongela ka Txizimu txa nzumani,

⁵ni txi khani ka mfumeli: Ngako ti txi tsakisa mfumeli, ni kungako txithumi txako wu txi txi tumela masoni kwako, ni kombela ti to u ni rumela ka ditiko da Judha, ka didhoropa da mathitha a vatate vangu, kuva ni txi ya di aketa.

⁶Sekoko mfumeli a to ni gela a di khalahatshile kumweko ni mfumeli wa txisikati a txi khene: I mbimo muni di no heta dipfhumba dako, ni ku wu na wuya nini kani?

⁷Ni txi khani kambe ka mfumeli: Ngako ti txi kutsakisa awe mfumeli, ni ninge mapapilo a kuya ma kombisa ka vathangeli va mtxhatuko ka mnambo, kasi ku va na ni tumelela kutshawunyeta kala ni txi ya hoka Judha;

⁸ni papilo yo ya ka Asafe, muwoneleli wa thembwe ya mfumeli, kasi ku a na ni ninga tiphande to aka ngu tona sike sa mkhokhola, ni ta diguma da didhoropa, ni ta nyumba yi ani ni no zumba ka yona. Se mfumeli a to ni ninga, madingano ni wunene wa dianza da Txizimu, txitimwi kwangu.

⁹Sekoko, ni to hoka ka vathangeli va mtxhatuko ka mnambo, ni va ninga mapapilo a mfumeli; se mfumeli a ti tirumete kumweko ni nani vathangeli va mabutho ni vagadhi va mahantxhi.

¹⁰Se mbimo yile Sambalati, Muhoroni, ni Tobhiya txithumi, Muamoni, va nga pfa ti to ku ni m'thu wokari, a telako ku ta vhuna vanana va ka Israyeli, va to karateka ngutu.

¹¹Se ni to hoka Jerusalema, ni zumba kona masiku mararu.

¹²Se ni to wuka ni wusiku, ani ni vavamna vokari, kambe kha na gela m'thu a ti Txizimu txangu txi nga ti ti vekile mbiluni ku ni ya ti mahela Jerusalema; hambi txihari ni si nga natxo, hahanze ka txile ni nga ti ti gadhile.

¹³Se ni to huma ni wusiku ngu Txike txa Mkovani, ngu didhawa da Txisima txa Dragoni ni ngu didhawa da Txike txa Ditalani, ni wonisisa maguma a Jerusalema, a ma nga ti ti khundumusilwe, ni matimba a kona ma nga ti ti hisilwe ngu mndilo.

¹⁴Se ni to pindelela ni ya ka Txike txa Txisima kala ka diziva da mfumeli; kambe ku singani wukhalo wo pinda ngu ka wona ni txifuyo txile ni nga ti ti gadhile.

¹⁵Sekoko ni wusiku ni to kwelela ngu txinambwanani ni ya wonisisa diguma; ni wuya, ni ta wulela ngu Txike txa Mkovani.

¹⁶Aniko vafumeli kha va kuziva mu ni nga ti yite kona, hambi ti ni nga ti maha tona; nguko ni sanzi kuwomba txilo ka Vajudha, hambi ka vaphaxeli, mwendo ka vafumeli, ni votshe vale va nga ti ka mthumo wa kona, va si zivi txilo.

¹⁷Sekoko ni to va gela ku khani: Ma wu wona wusiwana wu hi ku ka wona, aku Jerusalema a nga khundumuswa, ni matimba a kona ma nga hiswa; ngonani hi ta aketa diguma da Jerusalema, kasi ku hi si zumbi kambe tinganani.

¹⁸Sekoko ni to va gela nga ha dianza da Txizimu txangu di nga ni mahela wunene, ni mapswi ale mfumeli a nga ti ma wombile kwangu. Sekoko va to kha vona: Ahi khukheni hi aka! Se va to ti ningetetela kumaha mthumo wa wunene.

¹⁹Se mbimo yile a nga tiengisa Sambalati, Muhoroni, ni Tobhiya, txithumi txa Muamoni, ni Gesemi, Muharabhi, va to hiseka, ve hi txhipisa, va txi kha vona: Nda txani tona ti mi mahako kani? Mo lava kuwukela mfumeli kani?

²⁰Sekoko, ni to va xamula ni txi khani: Txizimu txa nzumani, ngu txona txi no hi humelelisa; se athu sithumi sa txona, hi na khukha hi aka; kambe anu kha mi na txyavelo, hambi fanelo, ni txyalakanyiso amu Jerusalema.