Read chopi Nehemiya 3 Bible Online

Nehemiya 3 - chopi bible

Nehemiya 3

¹Eliyasibhe, mphaxeli wa hombe, a to khukha ni vanawe, i ku vaphaxeli kulowe, veya aka Txike txa Sifuyo, atxi va nga txi tsanisa, ve guleta ni matimba a txona; va to aka diguma an'ze ka Txitezi txa Meya, ve di tsanisa kala ka Txitezi txa Hananeli.

²Se ngu hafuhi ka txitezi txa Hananeli, ku to aka vavamna va Jeriko. Ngu didhawa kwawe kuaka Zakuri, mwana Iniri.

³Se Txike txa Sihaka txi akilwe ngu vanana va Hasenaha, ve kelela tiphande ta kona, ve vekela matimba a kona, ni sikhiyelo sa kona ni sikhweketo sa kona, ni matimba a kona a tisimbi.

⁴Se ngu didhawani kwawe, ku to aka Meremote, mwana Uriya, mwana Kozi; ngu didhawani kwakwe kuaka Mesulamu, mwana Bherekiya, mwana Mesezabheli; se didhawa kwakwe ku to aka Zadhoki, mwana Bhahana.

⁵Se ngu didhawani kwakwe ku to aka va ka Tekowa; aniko vafumeli vawe kha va wuleta tithamo tawe ka mthumo wa MKOMA wawe.

⁶Se Joyadhi mwana Paseya ni Mesulamu mwana Bhesodhiya va to aka Txike txa Kale, avava va to kelele tiphande, ve vekela matimba a kona, ni sikhiyelo sa kona ni sikhweketo sa kona.

⁷Se ngu didhawani kwakwe ku to aka Melatiya, Mugibheyoni, ni Jadhomi, Mumeronota, vavamna va Gibheyoni ni Misipa, va nga ti lumba mfumo wa mfumeli wa mtxhatuko ka mnambo.

⁸Didhawa kwawe, ku to aka Uziyeli, mwana Haraya, mmweyo wa vatshuli; se ngu didhawa kwakwe, kuaka Ananiya, mmweyo wa vamahi va mafura o tola, va to tsanisa Jerusalema an'ze ka Diguma da kuanama.

⁹Se ngu didhawa kwakwe, ku to aka Refaya, mwana Huri, wa hombe wa hafu ya Jerusalema.

¹⁰Se ngu didhawa kwakwe ku to aka Jedhaya, mwana Harumafe, ni hafuhi ka nyumba yakwe; se ngu didhawa kwakwe kuaka Hatusi, mwana Hasabhineya.

¹¹Malakiya, mwana Harimi, ni Hasubhe, mwana Pahate-Mowabhi, va to aka dimwani didhawa, ve aka ni Txitezi txa Txikho.

¹²Se didhawa kwawe ku to aka Salumi, mwana Halowesi, wa hombe wa yimwani hafu ya Jerusalema, ene ni vanana vakwe vamahorana.

¹³Txike txa Mkovani txi akilwe ngu Hanuni ni vazumbi va Zanowa; avava va to aka ve vekela matimba ni sikhiyelo ni sikhweketo sa kona, ve aka kambe 1.000 wa mikono ya diguma, an'ze ka Txike txa Ditala.

¹⁴Txike txa Ditala txi akilwe ngu Malakiya, mwana Rekabhi, wa hombe wa ditiko da Bheti-Hakeremi; awuwa a akile e vekela matimba ni sikhiyelo ni sikhweketo sa kona.

¹⁵Txike txa Txisimani txi akilwe ngu Salumi, mwana Koli-Hoze, wa hombe wa ditiko da Misipa; awuwa a to aka, e tshulela e vekela matimba ni sikhiyelo ni sikhweketo sa kona, a to aka kambe diguma da diziva da Sela, hafuhi ni thembwe ya mfumeli, kala ka sivando si si kwitimako, so khukhela Didhoropani ka Dhavhidha.

¹⁶Msana kwakwe, Nehemiya, mwana Azibhuke, wa hombe wa hafu ya Bheti-Zuri, a to aka an'ze masoni ka mathitha a Dhavhidha, kala ka txisima txi txi nga ti ketwe, ni kuya hoka nyumbani ka tindena.

¹⁷Msana ka Nehemiya, ku to thuma Valevhi, i ku Rewumi, mwana Bhani. Se ngu didhawani kwakwe, ku to thuma Hasabhiya, wa hombe wa hafu ya ditiko da Keyila.

¹⁸Msana ka Hasabhiya, ku to thuma vanawe i ku: Bhavhayi, mwana Henadhadhe, wa hombe wa hafu yimwani ya ditiko da Keyila.

¹⁹Se ngu didhawa ka Bhavhayi, Ezeri, mwana Jesuwa, wa hombe wa Misipa a to aketa didhawa dimwani, masoni ka mmango wa nyumba ya matxhari, ngu dikhonani ka kona.

²⁰Msana ka Ezeri, ku to londeta Bharuke, mwana Zabhayi, e aketa dimwani didhawa, kukhukhela dikhonani kala ka txike txa nyumba ya Eliyasibhe, mphaxeli wa hombe.

²¹Msana ka Bharuke, ku to londeta Meremote, mwana Uriya, mwana Kozi, e aketa didhawa dimwani, kukhukhela ka txike txa nyumba ya Eliyasibhe kala magwito ka nyumba ya Eliyasibhe.

²²Se msana kwakwe, ku to aka vaphaxeli vale va nga ti zumba mkovani.

²³Msana keto, Bhenjamini ni Hasubhe, va to aka ngu masoni ka nyumba yawe ni vona; msana kwawe, ku to aka Azariya, mwana Mahaseya, mwana Ananiya, hafuhi ni nyumba yakwe.

²⁴Msana ka Azariya, Bhinuwi, mwana Henadhadhe, a to aka dimwani didhawa, kukhukhela ka nyumba ya Azariya kuya dikhonani ni kala magwito.

²⁵Palali, mwana Uzayi, a to aka kukhukhela masoni ka dikhona ni ka txitezi txi txi khukhelako ka nyumba ya txitimwi ya wukoma, yi ku hafuhi ni diguma da mkorani. Msana ka Palali, ku to aka Pedhaya, mwana Paro,

²⁶ngu kumaha keto, Vanetine, va nga ti ti zumba Ofeli, va to aka kala ka Txike txa Mati, ngu didhawa da wutxani, an'ze ka txitezi txa txitimwi.

²⁷Msana ka Pedhaya, Vatekowa, va to aketa dimwani didhawa, ngu masoni ka txitezi txa hombe txo lapha, an'ze digumani ka Ofeli.

²⁸Vaphaxeli va to aketa kukhukhela ka Txike txa Mahantxhi, mmwani ni mmwani e aketa ngu masoni ka nyumba yakwe.

²⁹Msana ka vaphaxeli, ku to aka Zadhoki, mwana Imeri, masoni ka nyumba yakwe, se, msana kwakwe, kuaka Semaya mwana Sekaniya, muwoneleli wa Txike txa Wutxani.

³⁰Msana ka Semaya, Hananiya, mwana Selemiya, ni Hanumi, mwanana wa wutxhanu ni mmweyo wa Zalafi, va to aketa dimwani didhawa. Msana kwawe Mesulamu, mwana Bherekiya, a to aketa dimwani didhawa, ngu masoni ka nyumba yakwe.

³¹Msana ka Mesulamu, Malikiya, mwanana wa mtshuli, a to aketa an'ze ka nyumba ya Vanetine, ni ya vanyamabhindu, masoni ka Txike txa Mifikadhi, veya hoka ka nyumba ya magwito.

³²Se ngu hagari ka nyumba ya magwito, ni Txike txa Sifuyo, ku aketile vatshuli va nzalama ni va nyamabhindu.