Read chopi Nehemiya 9 Bible Online

Nehemiya 9 - chopi bible

Nehemiya 9

¹Se ka ditshiku da magumi mambidi ni mune, ka wona mtxima wuwa, vanana va ka Israyeli va to sengeletana, ve ti tona sakudya, va di ambate syambalo sa masaka, va di ti theletete mafu ha msungo kwawe.

²Se liveleko la ka Israyeli li to ti hambanisa ni votshe vamatiko, se ve ema ve ti tshanza ngu mhaka ya sionho sawe ni wubihi wa vatate vawe.

³Sekoko va di emile ka makhalo awe, va to gondelwa dibhuku da Mlayo wa MKOMA, Txizimu txawe, ngu txipimo txa wumune txa ditshiku; se ka txipimo tximwani txa wumune, va to titshanza, ve khozela MKOMA, Txizimu txawe.

⁴Se Jesuwa, Kadhimiyeli, Sebhaniya, Bhuni, Serebhiya, Bhani ni Kenani va to ya ema txiluveloni txa va Levhi ve peka huwa ka MKOMA Txizimu txawe.

⁵Sekoko Valevhi, ni Jesuwa, ni Kadhimiyeli, ni Bhani, ni Hasabhineya, ni Serebhiya, ni Hodhiya, ni Sebhaniya, ni Petaya va to kha vona: Khukhani mi dhumisa MKOMA, Txizimu txanu, yotshe mbimo! Mahani mkombelo, mi dhumisa ditina da wudhumo wakwe, di di ku txitimwi ka sotshe si si katekiswako ni kudhumiswa.

⁶Awe ngawe wekha u ku MKOMA, ngawe u nga maha nzuma, nzuma ya tinzuma ni dotshe dibutho da yona, mafu ni sotshe si si ku ka ona, ni minambo ni sotshe si si ku ka yona; sotshe ngawe u si hanyisako, ni dibutho da nzumani da kukhozela.

⁷Ngawe MKOMA Txizimu, u nga sawula Abramu, u mthavisa ka Uri wa Vakaldheya, u mraya ditina daku i Abrahamu.

⁸Se u wona kuthembeka ka mbilu yakwe masoni kwako, u maha nayo txitumelelano, txo ninga vanana vakwe ditiko da Vakanana, ni da Vaamori, ni da Vafarezi, ni da Vajebhusi, ni da Vagirigasi; se u tsanisile mapswi ako, nguko u lulamile.

⁹U woni kuxupheka ka vatate vathu kona Egipta, u engisile kudila kwawe, hafuhi ni linene lo Bhilivila.

¹⁰U kombisile sixamaliso ni sidiwukiso ka Faro, ni ka sotshe sithumi sakwe, ni ka vathu votshe va ditiko dakwe, nguko wu ti zivile ti va nga xanisisa tona vathu vako, se ngu kumaha keto u ti manete ditina, kufana ni ti ti wonekako nyamsi.

¹¹Aniko u to va abanisela linene masoni kwawe, se ve pinda ngu hagari ka linene, li di omile; u rinza valala vako mazivani, va txi nga marigwi amu ka mati o tutuma.

¹² Se u va kombile nzila ni mitshikari ngu direfu, ni wusiku u va kombile nzila ngu phande ya mndilo, kasi kuwoninga nzila yi va no tsimbila ngu yona.

¹³U txhikile txitimwi ka mmango wa Sinayi, u womba-womba navo u di nzumani, u va ningile wululamo wa wunene ni milayo ya ditshuri, sileleto ni sirumo sa sinene.

¹⁴Se u va zivisile Sabbata yako yo sawuleka; ni sirumo, ni sileleto, ni mlayo u va ningile ngu dianza da txithumi txako Mosi.

¹⁵ Se u va ningile sakudya sa nzumani kasi kuve mana kumalata nzala yawe, ni mati o huma dirigwini kasi ku tima ditora dawe. Kambe u va leleta kuve wulela ve teka ditiko dile u ngadi gulela dianza u txi khawe u na va ninga.

¹⁶Hambi keto vona, vatate vathu va to ti kulisa, ni ku ti nemelisa kuthumani kwawe, va si engisi milayo yako.

¹⁷Se va to lamba ku kuengisa, va si khumbuli sixamaliso sako sile u nga va mahela, ve ti nemelisa kuthumani kwawe, se ngu wuhurupha wawe va to ti sawulela mthangeli, kasi ku e va thangela ve tshumelela wukhumbini kwawe; kambe awe u Txizimu txi txi divalelako, txo pfela ni wumbilu, txi swelako kuhenya, txo tala ngu wunene, se awe khwa va leka;

¹⁸hambi mbimo yile va nga ti ti mahete dirole do wumbwa, va txi kha vona: Atxiya Txizimu txako, txi txi nga kuhumisa ditikoni ka Egipta, va txi maha txiruko txa hombe.

¹⁹ Kambe awe ngu wunene wako wa hombe, khwa va leka txiwulani. Phande ya direfu kha yi khali kuve kule navo ni mitshikari amu kova komba nzila, hambi direfu da mndilo ni wusiku, kasi ku va wonigela ni ku va komba nzila yo tsimbila ngu yona.

²⁰Se u va ningile moya wako wa wunene, kuve gondisa ngu wona; hambi manna ako khu ya thavisa txisofuni kwawe; ni mati o sela u va ningile.

²¹Se ngu mamaheloyo u va xayisile txiwulani mune wa magumi a malembe, kha va pwata txilo, syambalo sawe kha siya sakala, ni minenge yawe kha ya simba.

²² Kambe u va ningile mifumo ni matiko, u va ambanisela tithomba; se vona va to teka ditiko da Seyoni, i ku ditiko da mfumeli wa Hesibhoni, ni ditiko da Oge, mfumeli wa Bhasani.

²³U engetete vanana vawe ve fana ni tinyeleti ta nzumani, se u va wuyisa ka ditiko di u nga ti gete vatate vawe ti to va na wulela ka dona ve di teka.

²⁴ Ngu kumaha keto, vanana vawe va to wulela ka dona ve di teka; se u wisile hahatshi masoni kwawe, vahanyi va ditiko dile, i ku Vakanana, u va ningela manzani kwawe, ni vafumeli, ni vathu va ditiko, kasi ku va Israyeli va na maha kuranda kwawe ngu vona.

²⁵Se va to teka Didhoropa da Hombe, ni ditiko do nona, ve teka ni tinyumba to tala ngu siya sa yotshe mixowo, ni sisima so kelwa ni mivhinya, ni miolivha, ni mindonga yo tala ya mihando; va to dya ve khura, ve ena, se ve tsula va di tsakile ngu wudhumo wako wa hombe.

²⁶ Hambi keto, kha va kuengisa, va to kuwukela, ve tshuralela mlayo wako, ve daya vaprofeti vako, va va nga ti ti womba-womba kwawe, ti to ve tshumelela kwako; se va to maha wubihi wa hombe.

²⁷Ngu toneto, u va ningete manzani ka valala vawe ve va xanisa; kambe ka mbimo ya kuxaniseka kwawe, va pekile huwa kwako, awe u to engisa u di nzumani; se ngu mhaka ya wumbilu wako wa hombe, u va ningile vatxhatxhisi, va va nga va txhatxhisa manzani ka vaxanisi vawe.

²⁸Aniko, va di mani kuhumula, va to tshumela ve maha kubiha masoni kwako; se u to va leka manzani ka valala vawe, va txi va fumela; se mbimo yile va nga hindukula va txi kwangula kwako, awe u va engisile u di nzumani, u va hulukisa sikhati so tala ngu mhaka ya wumbilu wako.

²⁹Se u va laya ti to ve tshumelela ka mlayo wako; aniko vona va to ti kulisa, va si engisi sirumo sako, ve onhela wululamo wako, awu ngako m'thu a txi wu londisa a na hanya.

³⁰ Hambi keto u nawulutile wunene wako ka malembe o tala, kambe u va kanetile ngu Moya wako, ngu txisofu txa vaprofeti vako; aniko vona kha va kuengisa; sekoko u to va ningela manzani ka vathu va matiko.

³¹Kambe, ngu mhaka ya wunene wako wa hombe, khwa va haxula, hambi ku va leka; nguko awe u Txizimu txa wunene ni wumbilu.

³²Konkuwa koko, awe Txizimu txathu, awe Txizimu txa hombe, txa mtamo ni kuthisa, txi xayisako txitumelelano ni wunene, yi nga maneke i di yidotho yotshe xomulo yi yi nga hi hokela, ni vafumeli vathu, ni vathangeli vathu, ni vaphaxeli vathu, ni vaprofeti vathu, ni vatate vathu, ni votshe vathu vako, kukhukhela ka masiku a vafumeli wa va Asiriya, kala ka ditshiku da nyamsi.

³³Aniko, ka totshe ti ti hi humelelako, awe u lulamile; nguko awe u mahile ta tinene, se athu hi maha kubiha.

³⁴Se vafumeli vathu, vathangeli vathu, vaphaxeli vathu ni vatate vathu kha va xayisa mlayo wako, hambi kuengisa sirumo sako ni wufakazi wako, mbimo yi u nga va sola.

³⁵Nguko hambi ka mfumo wako kha va ku thumela, hambi ku u nga va ninga ngu wunene wako wa hombe, hambi ka ditiko da hombe do nona di u nga va ninga kha va kuthumela, hambi kuhunduluka ka mithumo yawe yo biha.

³⁶Wona taku nyamsi hi tikhumbi; hambi ka ditiko dile u nga ninga vatate vathu kuve dya mihando ya dona ni kuzumbiseka, wona taku hi tikhumbi ka dona.

³⁷Ditiko da pfuna kambe mihando nja vafumeli vale u nga va veka txitimwi kwathu, ngu mhaka ya sionho sathu; va thuma kuranda kwawe txitimwi ka mimidi yathu ni txitimwi ka sifuyo sathu; se hi kuxanisekani ka hombe.

³⁸Se ka totshe eto, hi mahile txitumelelano txo tsana, hi txi bhate; se vathangeli vathu, ni Valevhi vathu, ni vaphaxeli vathu va txi tsanisile.