Read chopi Esteri 9 Bible Online

Esteri 9 - chopi bible

Esteri 9

¹Se ka mtxima wa wugumi ni yimbidi, i ku mtxima wa Adhari, ka ditshiku da digumi ni mararu ka wona mtximewo, ku to hoka dipswi da mfumeli ni txileleto txakwe ti to si mahwa, ka ditshiku dile valala va Vajudha va nga ti ti verela ku va khozisa, ku to humelela to hambana, nguko Vajudha ngu vona va nga khozisa valala vawe.

²Nguko Vajudha va to sengeletana madhoropani kwawe ka otshe matiko a hombe a mfumeli Asuwero kasi kudaya vale va no va wukela, se ni wammweyo asi sikoti kutsana masoni kwawe, nguko va ti ti thawa ngu vathu votshe.

³Se votshe vahombe va matiko a hombe, ni tinduna, ni vafumeli, ni vale va nga ti maha mthumo wa mfumeli, va to vhunetela Vajudha, nguko kuthisa ka Mordhekayi ku ti ti wete txitimwi kwawe.

⁴Nguko Mordhekayi i ti ti wa hombe nyumbani ka mfumeli, ni wudhumo wakwe wu pfate ka otshe matiko a hombe; nguko wamwamna wule Mordhekayi a ti ti ya masoni ngu kukula.

⁵Vajudha koko va to daya votshe valala vawe, ngu ditxhari, ve va daya, ve va lovisa; va txi maha kuranda kwawe txitimwi ka vale va nga ti va vengela.

⁶Se mkhokholani ka Susani, Vajudha va to daya ni kulovisa 500 wa vavamna;

⁷Va to daya ni Parisandata, ni Dhalifoni, ni Asipata,

⁸ni Porata, ni Adhaliya, ni Aridhata,

⁹ni Farimasita, ni Arisayi, ni Aridhayi, ni Vayizata.

¹⁰Digumi da vanana va Hamani, mwana Hamedhata, mlala wa Vajudha, va datwe; kambe kha va handa txilo.

¹¹Ka ditshiku donedo da dimwedo, mfumeli a to ziviswa mtengo wa sirumbi sa mkhokholani ka Susani.

¹²Se mfumeli a to khene ka msikati wakwe Esteri: Mkhokholani ka Susani, Vajudha va date ni kulovisa 500 wa vavamna, ni digumi da vanana va Hamani; se ka mamwani matiko a hombe a mfumeli, va di mahisile kutxani ka mamwani matiko a hombe a mfumeli kani? Ngu txihi koko txikombelo txako kani? Se u na ningwa. Mwendo ngu kuhi kuvilelea kwako kani? Se u na mahelwa.

¹³Sekoko Esteri a to khene: Ngako mfumeli a txi ti wona i di ta tinene, a tumele kambe mangwana, taku Vajudha vale va ku Susani ve maha madingano ni kuruma ka nyamsi; se va na txikite digumi da vanana va Hamani ka phande yimweyo.

¹⁴Sekoko mfumeli a to womba taku ti na mahwe toneto; se ku to humiswa txileleto kona Susani, se kutxikitwa digumi da vanana va Hamani.

¹⁵Se Vajudha vale va nga ti maneka Susani va to sengeletana ni vona, ngu ditshiku da digumi ni mune ka mtxima wa Adhari, ve daya 300 wa vavamna kona Susani; kambe kha va handa txilo.

¹⁶Kambe Vajudha vamwani vale va nga ti ti maneka ka matiko a hombe a mfumeli va to sengeletana kasi kuve lwela wutomi wawe, se va to humula kuxaniswa ngu valala vawe; va date 75.000 wa valala vawe; kambe kha va handa txilo.

¹⁷Eto ti mahekile ngu ditshiku da digumi ni mararu ka mtxima wa Adhari; se ve humula ngu ditshiku da digumi ni mune ka mtxima wonewo, ve maha ti to ditshiku dile di va da mibuso ya hombe ni da litsako.

¹⁸Kambe Vajudha vale va nga ti ti maneka Susani va to sengeletana ngu masiku a digumi ni mararu ni a digumi ni mune ka mtxima wonewo; se ve humula ngu ditshiku da digumi ni mtxhanu ka wona mtximewo, ditshiku dile va to di maha da mibuso ya hombe ni da lisako.

¹⁹Se ni vona Vajudha vale va mikhokholani va nga ti zumba sidhoropanani, va to maha ti to ditshiku da digumi ni mune ka mtxima wa Adhari di va da kutsaka ni da mibuso ya hombe, ditshiku da kuhumula, ve rumelelana siningo ka dona.

²⁰Se Mordhekayi a to bhala timhaketo, e rumela mapapilo ka votshe Vajudha vale va nga ti maneka ka otshe matiko a hombe a mfumeli Asuwero, ka va hafuhi ni ka va kule,

²¹e va leleta ti to ve xayisa ditshiku da digumi ni mune da mtxima wa Adhari, ni ditshiku da digumi ni mtxhanu ka mtxima wonewo, ka otshe malembe,

²²i ku masiku ale Vajudha va nga mana kuhumula ka valala vawe, ni mtxima wule ku nga hunduluswa kuxaniseka kwawe kumaha kutsaka, ni txidilo txi nga maha ditshiku da kuhumula; kasi ku me maha masiku a mibuso ya hombe, ni a kutsaka, ni a kurumelelana siningo, ni kuvhuna sisiwana.

²³Se Vajudha va to ti rweka mthumo wo maha tile va ngadi khatile kumaha, ni tile Mordhekayi a nga ti va bhalete.

²⁴ Nguko Hamani, mwana Hamedhata, Muagagi, mlala wa votshe Vajudha, a ti mahile txikungo txo lovisa Vajudha; ni kupeka tixolo, i ku “Puri” kasi ku va hoxota ni ku va lovisa.

²⁵Aniko ahale yi nga hoka mhaka ka mfumeli, a to rumela ngu mapapilo ti to txikungo txo biha txa Hamani, txo wukela Vajudha, txi wela ha msungo kwakwe; ngu koneho, va to mtxikita, ene ni vanana vakwe, ha phandeni kumweko.

²⁶Ngu kumaha keto, masiku ale va to ma raya ku i Purimi, wa ditina da Puri; kambe ngu mhaka ya otshe mapswi a dipapilo dile, ni tile va nga ti wona txitimwi keto, ni tile ti nga ti va humelete,

²⁷Vajudha va to tsanisa vona ni mbewu yawe, ni votshe vale va sengelako kumweko navo ti to kha va na mbi leka kuxayisa masiku ale amambidi, madingano ni tile ti nga bhalwa ngu mhaka yawe, ni mbimo ya kona yile yi nga emiswa, ka otshe malembe;

²⁸ni ti to masiku awa ma na alakanywa ni kuxayiswa ngu liveleko ni liveleko, ngu mwaya, ditiko da hombe ni didhoropa, ni ti to masiku awa a Purimi ma na khumbukwa hagari ka Vajudha, niku txyalakanyiso txa ona kha txi na mbi va ni magwito hagari ka liveleko lakwe.

²⁹Msana keto, msikati wa mfumeli ene Esteri, mwana Abhiyayeli, ni Mordhekayi, Mujudha, va to bhala ngu mtamo wotshe kasi kutsanisa da wumbidi dipapilo diya da Purimi.

³⁰Se va to rumela mapapilo ka votshe Vajudha, va ku ka 127 wa matiko a hombe a mfumo wa Asuwero, ni mapswi a kudikha ni wunene,

³¹kasi kutsanisa masiku awa a Purimi ni timbimo ta ona ti ti nga emiswa, madingano ni tile Mordhekayi, Mujudha, ni msikati wa mfumeli ene Esteri va nga leleta, niku vona vapune va nga ti tsanisile txitimwi kwawe ni ka liveleko lawe, madingano ni kutitona sakudya ni kudila kwawe.

³²Se txirumo txa Esteri tx to i tsanisa timhaka ta wule a nga ti ti xayisa Purimi; se ti to bhalwa amu ka dibhuku.