Read chopi Eksodha 1 Bible Online

Eksodha 1 - chopi bible

Eksodha 1

¹ Aawa koko, ngu ona matina a vanana va ka Israyeli, avale va nga wulela ditikoni ka Egipta, kumweko ni Jakobe, mmwani ni mmwani ni ngamu yakwe:

²Rubheni, ni Simiyoni, ni Levhi, ni Judha,

³ni Isakari, ni Zebhuloni, ni Bhenjamini,

⁴ni Dhani, ni Naftali, ni Gadhi, ni Aseri.

⁵Votshe va nyumba ya ka Jakobe, i ti ti mtxhanu wa magumi ni mambidi a vathu. Kambe Josefa a ti ti maneka a di Egipta ngu kale.

⁶Ngako koko Josefa a di fite, ni votshe vanawe, ni lotshe liveleko la mbimo yoneyo,

⁷ vanana va ka Israyeli va to velekelana ve anda ngutu; kambe va manekile va txi tala, ni kuva ni mtamo, aha koza ditiko da Egipta di txi tala ngutu ngu vona.

⁸ Msana keto, ku to humelela mfumeli wamphya ditikoni ka Egipta, awu a nga ti sa m'ziva Josefa.

⁹Eyo a to khene ka vathu vakwe: “Wonani ti to vathu vava, i ku vanana va ka Israyeli mbavangi, kambe va ni mtamo ngutu kupinda athu.

¹⁰ He thumiseni wutxhari kasiku hi si va leki ve anda, nguko hahanze ka toneto, ka mbimo ya yimbi, va na tatisa mtengo wa valala vathu, va txi hi lwisa, ngu msana va txi huma mu ditikoni.”

¹¹Se Vaegipta va to veka vahombe va[1] tihunzu, ti to ve xupha Vaisrayeli, ngu mithumo ya txibhalo. Va to akela Faro madhoropa a Pitomi, ni Ramusesi, amu ku nga ti ni ko veketela kona silo sakwe.

¹²Aniko, hambiko Vaegipta va nga ti va xupha, Vaisrayeli va manekile va txi anda ni kukula; se Vaegipta va to karateka ngutu ngu mhaka ya vanana va Israyeli.

¹³Se Vaegipta va to thumisa vanana va ka Israyeli ngu tshofu;

¹⁴ngu kumaha keto, va to va pfisa kupanda kuhanyani kwawe, ngu wukhumbi wo nemela, ngu kuvhuva txitsowo ni kubhaka sitini, mithumo yo hambana-hambana, ya tithembweni ni mithumo yotshe yi va nga txi va ruma ku yi maha.

¹⁵Se mfumeli wa Egipta a to womba ka vahefemulisi va Vahebheru (evo mmwani a nga txi dhanwa ku i Sefira, se ditina da mmwani i Fuwa), a txi khene:

¹⁶“Nga ti mi txi hefemulisa va sirumbu sa vasikati va Vahebheru, wonisisani vanana va kona. Nga ti i di mfana, dayani; aniko i di mwanana wa dihorana, mlekeni e hanya.”

¹⁷Aniko vahefemulisi ngu kuthava Txizimu, kha va maha nga ti mfumeli wa Egipta a nga ti va rumile tona, va to leka vanana va vafana ve hanya.

¹⁸Sekoko mfumeli wa Egipta a to dhana vahefemulisi, a txi va gela tiya: “Ngu kutxani mi leka vanana vavafana ve hanya kani?”

¹⁹Se vahefemulisi va to kha vona ka Faro: “Vavasikati va Vahebheru kha va fani ni vavasikati va Vaegipta; nguko[2] vona va tsana, nava sanzi kuta vahefemuliswa, va ti hefemulisa vapune.”

²⁰Ngu mhaka yeto, Txizimu txi katekisile vahefemulisi. Se vathu va to talelana, ni kumaha va mtamo ngutu.

²¹Se ku to maheka taku, ngako vahefemulisi va nga txi thava Txizimu, txona txi to katekisa tinyumba tawe.

²² Sekoko Faro a to layela ka votshe vathu vakwe, a txi khene: “Votshe vanana vavafana va no velekwa va dumwateni mnamboni ka Nilo, aniko, vanana vamahorana va lekeni ve hanya.”