Read chopi Eksodha 10 Bible Online

Eksodha 10 - chopi bible

Eksodha 10

¹Msana keto, MKOMA a to khene ka Mosi: “Tsula ka Faro, nguko ni bangisile kambe mbilu yakwe, ni timbilu ta mahalamu akwe, kasi kumaha sikombiso sangu hagari kwawe.

²Kambe awe u na xawutela ka vanana vako, ni ka vanana va vanana vako, sidiwukiso si ni nga si maha ditikoni ka Egipta ni sikombiso si ni nga si maha hagari kwawe; kasi mi na ziva ti to ngani MKOMA Txizimu.”

³Se Mosi ni Aroni, va yite kambe ka Faro, va txi ya m'gela tiya: “MKOMA, Txizimu txa Vahebheru, a khene: U na gwita mbimo muni kukaneta u si ti veki hahatshi masoni kwangu kani? Leka vathu vangu ve huma, kasi va txi ya ni khozela.

⁴Ngako u txi simama u lamba, u si leki vathu vangu ve huma, wona taku mangwana ni na tisa humbi kotshe ditikoni kwako.

⁵Humbi yi na fenengeta otshe mafu, aha koza mafu ma si koteki kuwoneka; humbi yi nadya asi si nga sala, si nga sala ka maralala; kambe yi nadya mindonga yanu yotshe, ayi yi kulako mu tithembweni.

⁶Humbi yi na tata tinyumba tako, ni tinyumba ta sithumi sako, ni totshe tinyumba ta Vaegipta, humbi yi yi si ziviko kuwonwa ngu vatate vako, ni vatate va vatate vako, kukhukhela ka ditshiku di va nga maneka ha ditikoni kala nyamsi.” Se Mosi a to tshembereka e huma masoni ka Faro.

⁷Konako, mahalamu a Faro ma m'gete ku kha ona: “Awuwa m'thu a na hi vangela makhombo kala mbimo muni kani? Leka vathu va txi tsula kasi va txi ya khozela MKOMA, Txizimu txawe. Awe khu ti woni ti to ditiko da Egipta da lova kani?”

⁸Sekoko Mosi ni Aroni, va to yiswa kambe masoni ka Faro, awu a nga ya va gela a txi khene: “Tsulani mi ya khozela MKOMA, Txizimu txanu; aniko, ngu vahi vathu va no huma va txi tsula kani?”

⁹Se Mosi a xamute a txi khene: “Hotshethu hi na tsula, mazambi athu ni madhota athu, ni vanana vathu vavafana ni vamahorana, ni mitxhambi yathu ya tinvuta ni ya tihomu, hi na huma naso hi txi tsula; nguko ku nava i di m'buso ka MKOMA, Txizimu txathu.”

¹⁰Sekoko Faro a wombile a txi khene: “MKOMA a nave ni nanu, nga ti ani ni txi mi leka mi txi tsula ni vanana vanu; wonani ti to mi na ni mipimiso yo biha!

¹¹Kha ti na mbi maheka eto, aniko tsulani anu mokha vavamna, mi txi ya khozela MKOMA Txizimu; nguko ngu toneto anu mi nga kombela tona.” Se va to va tutumisa masoni ka Faro.

¹²Sekoko MKOMA a to womba ka Mosi a txi khene: “Guleta dianza dako txitimwi ka ditiko da Egipta, kasiku humbi yi txi ta txitimwi ka ditiko da Egipta, yi ta dya wotshe mwasi wa ditiko, ni sotshe si mati a maralala ma nga ti si siyile.”

¹³Sekoko Mosi a to guleta ndonga yakwe txitimwi ka ditiko da Egipta. MKOMA a to wuyisa mu ditikoni ka Egipta diphuho da wutxani ka dotshe ditshiku dile ni ka wotshe wusiku wule. Mbimo yi di nga txa, diphuho da wutxani di manekile di txi wuyisa humbi.

¹⁴Se humbi yi to fenengeta ditiko dotshe da Egipta, yi to khandamela txitimwi ka dotshe ditiko, kambe i ti yayingi ngutu; ayi yi si ziviko kumaneka ka mbimo ya kale, kambe kha yi na mbiswa yi txi maneka yo talisa toneto.

¹⁵ Nguko yi to fenengeta kotshe txitimwi ka mafu, se mafu ma to phuma; se yi to dyela mwasi wotshe ha mafuni ni mihando yotshe ya mindonga, ayi yi nga ti sitwe ngu maralala; kha ka sala ni txa tximwetxo txo hanya mu ka mindonga, hambi mwasi, ka dotshe ditiko da Egipta.

¹⁶Sekoko mfumeli Faro, a to dhana Mosi ni Aroni ngu kukuluveta, a txi khene: “Ni onhete MKOMA, Txizimu txanu, ni nanu ni mi onhete.

¹⁷Konkuwa koko, na mi kombela taku mi txi ni divalela txionho txangu, ka txona txikhati txiya dwe, kambe khongelani ka MKOMA Txizimu txanu, ti to a txi thavisa kwangu lifo liya.”

¹⁸Mosi, ngako a di khukhile masoni ka Faro, a to khongela ka MKOMA.

¹⁹Sekoko MKOMA a to maha to moya wa mswa-ditambo wu txi futeta ngu mtamo, se moya wonewo wu to khukhula humbi yotshe wu txi ya yi vhunga lineneni ko Bhilivila; aha ku nga mbi sala ni ya yimweyo humbi ka dotshe ditiko da Egipta.

²⁰Kambe MKOMA a to bangisa mbilu ya Faro, aha ko kha sikota kuleka vanana va ka Israyeli ve tsula.

²¹Sekoko MKOMA a to khene ka Mosi: “Guleta dianza dako u txi di komba nzumani, kasi ku ku txi maneka txidema txa hombe, txo hambi vathu va nga txi gwesa.”

²²Se Mosi a to guleta dianza dakwe a txi di komba nzumani, aha ku nga maneka txidema ka dotshe ditiko da Egipta, mndani ka masiku mararu.

²³Mmwani ni mmwani a ti sikoti kuwona mmwani, ni wammweyo kha sikota kukhukha ka wukhalo wule a nga ti ka wona, mndani ka masiku mararu; ditikoni kotshe ka Egipta ni ka makhalo otshe. A mu ku nga txi maneka vanana va ka Israyeli ku ti ti ho kuwonekela.

²⁴Sekoko Faro a to dhana Mosi ni Aroni a txi va gela tiya: “Tsulani, mi txi ya khozela MKOMA, Txizimu txanu. Ku na sale mitxhambi ya tinvuta ni ya tihomu dwe; vanana vanu tsulani navo.”

²⁵Kambe Mosi a to khene: “U na veka manzani kwathu asi si lavekako, kasi kuya phaxa ngu sona ni ku si ningela ka MKOMA, Txizimu txathu.

²⁶Ni sona sifuyo sathu hi na tsula naso; kha ku na mbi sala hambi ni txala txathu, nguko hi na ya thavisa koneyo asi hi felako kukhozela ngu sona MKOMA, Txizimu txathu, hambi athu hi fanete kuya thavisa ka sona asi MKOMA a ku ni fanelo yo mahelwa mphaxo ngu sona, ngako hi di hokile koneyo.”

²⁷Kambe MKOMA Txizimu txi bangisile kambe mbilu ya Faro, aha ko ene kha tumela ku va leka va txi tsula.

²⁸Se Faro a wombile ka Mosi a txi khene: “Khukha hafuhi kwangu, aniko u nga swe u txi woneka kambe masoni kwangu, nguko ditshiku di u nota woneka khoheni kwangu, u na fa.”

²⁹Se Mosi a to khene: “U wombile tona: Kha ni na mbiswa ni txi wona khohe yako kambe.”