Read chopi Eksodha 13 Bible Online

Eksodha 13 - chopi bible

Eksodha 13

¹Sekoko MKOMA a to womba ka Mosi a txi khene:

² Ni sawulekisele “otshe matiwula, hagari ka vanana va ka Israyeli, matiwula a vathu mwendo a sihari, nguko otshe ngangu.”

³Se Mosi a to khene ka vathu: Di alakanyeni ditshiku diya, adi mi nga huma ngu dona ditikoni ka Egipta, nyumbani ka wukhumbi, nguko MKOMA a mi humisile kona ngu dianza da mtamo; se ngu mhaka yeto, kha mi na mbi dya dipawu do tshumbelwa ka ditshiku donedo.

⁴Anu ma huma nyamsi ka mtxima wa Abhibhi i ku wo khata, ka ditshiku da kuhuma kwanu ditikoni ka Egipta.

⁵Ngako MKOMA a di mi hokisile ditikoni ka Vakanana, da Vaheti, da Vaamori, da Vahevhi ni da Vajebhusi, adi a nga xambanya ku di ningela ka vatate vanu, ditiko di dikhulungako masi ni wulombe, ditshiku diya mi na di vekisa, ka wona wuwa mtxima.

⁶Mi na dya mapawu o mbi tshumbelwa mndani ka mtengo wa mtxhanu wa masiku ni mambidi, se ka ditshiku da wutxhanu ni mambidi ku na vaho m'buso wo dhumisa MKOMA.

⁷Mndani ka mtxhanu wa masiku ni mambidi mi na dya mapawu o mbi tshumbelwa; mitini kwanu kha ku na mbi maneka txilo txo tshumbelwa; hambi ni kotshe mu ditikoni kwanu.

⁸Ka donedo ditshiku, mmwani ni mmwani a na womba ka mwanakwe a txi khene: Ngu tiya MKOMA a nga hi mahela ngu mbimo yi hi nga huma ditikoni ka Egipta.

⁹Txi nava i di txialakanyiso manzani kwanu, ni ha mbanza kwanu, kasiku Mlayo wa MKOMA wu txi zumba sisofuni kwanu; nguko MKOMA a mi humisile ditikoni ka Egipta ngu dianza da mtamo.

¹⁰Ngu mhaka yeto mlayo wuwa mi na wu vekisa ka mbimo yi yi nga emiselwa, ka dilembe ni dilembe.

¹¹ Ka mbimo yi MKOMA a no mi hokisa ditikoni ka Vakanana, nga ti a nga xambanya kwanu ni ka vatate vanu, ngako a di mi ningile,

¹²u na ningela ka MKOMA, votshe vanana va mazambi avale i ku matiwula, ni sifuyo sotshe sa matiwula sa vamatune si mi ku naso, nguko vanana vo khata va lumba MKOMA.

¹³Kambe otshe matiwula a timbongola, u na txitxisa ngu[15] txinvutana; se ngako u si txitxisi ngu txinvutana, u na wila msungo; aniko otshe matiwula a vathu, va lixaka la ka kwanu, va na ningelwa ka MKOMA.

¹⁴Ngako mangwana wa ditshiku vanana vanu va txi mi wotisa va txi kha vona: “Toneto ti womba txani kani?” Mi na xamula mi txi khanu: MKOMA a hi humisile ditikoni ka Egipta, nyumbani ka wukhumbi, ngu dianza da mtamo.

¹⁵Nguko, ngako Faro a di bangisile mbilu yakwe, asi hi leki hi txi huma, MKOMA a date otshe matiwula a ditikoni ka Egipta, kukhukhela ka matiwula a vathu kala ka matiwula a sihari. Ngu toneto, hi phaxako ka MKOMA ngu matiwula otshe a txiwamna, aniko ha wukhaloni ka vanana vathu va txiwamna hi phaxa ngu sifuyo.

¹⁶Nguko eto ti nava i di txikombiso kwako, i di txialakanyiso ha mbanza kwanu, nguko MKOMA a hi thavisile ditikoni ka Egipta ngu mtamo wakwe wa hombe.

¹⁷Ngako Faro adi lekile va ka Israyeli va txi huma, MKOMA kha va tsimbitisa ngu nzila yi yi tshawunyetako ditiko da Vafilista, hambiko i ku ya txikhangawula, nguko Txizimu txi pimisile ti to va ka Israyeli ngu kuthava yimbi, va nga thuka va txi tshumela va txi ya ditikoni ka Egipta.

¹⁸Konako, Txizimu, txi mahile ti to vathu va txi tenderuka ngu nzila ya txiwula hafuhi ni lineneni lo Bhilivila; kambe vanana va ka Israyeli va humile ngu ditikoni ka Egipta va di xomile.

¹⁹ Mosi a tekile ni marambu a Josefa nguko ene a ti xambanyisile vanana va ka Israyeli ngu mtalo wawe tito: “Ngu ditshuri Txizimu txi nata mi thavisa; tekani marambu angu mi txi tsula nawo.”

²⁰Ngako va di khukhile Sukote, va ka Israyeli va to ya gova Etami hafuhi ni txiwulani.

²¹MKOMA Txizimu a ti thangela masoni kwawe, ni mitshikari a ti ti va komba nzila ngu direfu, ni wusiku a ti ti va komba nzila ngu phande ya mndilo, kasi ku va woninga, kasiku va txi tsimbila kwati wusiku ni mitshikari.

²²Direfu kha da nga va ni kukhukha masoni ka vathu ni mitshikari, ni phande ya mndilo ni wusiku.