Read chopi Eksodha 14 Bible Online

Eksodha 14 - chopi bible

Eksodha 14

¹Sekoko MKOMA a wombile ka Mosi a txi khene:

²“Gela vanana va ka Israyeli ti to va txi tshumela va txi ya gova masoni ka Pi-Hahiroti, hagari ka Migodholi ni linene, masoni ka Bhahali-Safoni, anu mi na ya gova masoni ka wuwa wukhalo, hafuhi ni linene.

³Sekoko Faro a na khene ngu vanana va ka Israyeli: Va timete nzila ha mafuni, txiwula txi va ranganetile.

⁴Ani ni na maha ti to Faro a txi bangisa mbilu yakwe, se ene a na mi tutumela, kambe ani ni na komba mtamo wangu ni txi m'wukela ene kumweko ni dibutho dakwe da yimbi: Vaegipta va na tiziva ti to ani ngani MKOMA.” Se va ka Israyeli va to maha toneto.

⁵Ngako mfumeli wa Egipta a di zivisilwe ti to vathu va thavile, mbilu ya Faro ni timbilu ta mahalamu akwe ti to txitxeka ve wukela vathu. Se vona va to womba va txi kha vona: “Hi mahile tiya ngu txani, hi txi leka va ka Israyeli ve tsula, ve leka ku hi thumela kani?”

⁶Faro a to ruma kupanisa txikotxikani txakwe txa yimbi e teka kambe dibutho dakwe da yimbi e tsula nado,

⁷a to teka 600 wa sikotxikani so sawulwa ni sikotxikani sotshe sa ditikoni ka Egipta, ni tinduna totshe ti txi va ti di txitimwi ka ona otshe.

⁸MKOMA a to bangisa mbilu ya Faro, mfumeli wa Egipta, se ene a to londeta vanana va ka Israyeli, mbimo yi vona va nga ti huma ngu diwoko da wundena.

⁹Vaegipta va to va londeta, va di ni otshe mahantxhi ni sikotxikani sa kona a mfumeli Faro, ni vagadhi va kona va mahantxhi ni dibutho da kona da yimbi, avava va nga ya va manela va di govile hafuhi ka linene, i ku hafuhi ka Pi-Hayiroti, masoni ka Bhahali-Zefomi.

¹⁰Mbimo yi Faro a nga hoka hafuhi, vanana va ka Israyeli va to gula maso ve wona ti to Vaegipta ndiva, va ta ngu msana kwawe. Va to va ni kuthava ka hombe; sekoko vanana va ka Israyeli va to dila ka MKOMA.

¹¹Va wombile ka Mosi va txi kha vona: “Ina ditikoni ka Egipta ku ti si nga ni maphala, eko u nga hi thavisa kasi ku hi txi ta fa mu txiwulani kani? Ngu kutxani u txi maha toneto kani? Ngu kutxani u nga hi thavisa ditikoni ka Egipta kani?

¹²Ina hi nga toneto hi nga ti kugela to: Hi leke hi txi maha tikhumbi ta Vaegipta kani? Nguko i ti si nga txhukwana kuva hi di zumbile hi txi thumela Vaegipta kani? Kupinda ku ta fela txiwulani muwa kani?”

¹³Kambe Mosi a to khene ka vathu: “Mi nga thaveni; manekani mi di tsani, nguko nyamsi mi na wona ti MKOMA a no mi hulukisisa tona; nguko Vaegipta vava mi va wonako nyamsi, kha mi na mbiswa mi txi va wona kambe.

¹⁴MKOMA a na lwa ngu nganu, kambe anu mi na malala mi txi dwe!”

¹⁵Sekoko MKOMA a to khene ka Mosi: “Ngu kutxani u peka huwa kwangu kani? Va gele vanana va ka Israyeli ve tsimbila va txi ya masoni.

¹⁶Awe, guleta ndonga yako, u txi nawuluta dianza dako, u txi di komba txitimwi ka linene, u txi li abanisa, ti to vanana va ka Israyeli va txi tsimbila mu ko oma, ngu hagari ka linene.

¹⁷Ani ni na bangisa timbilu ta Vaegipta kasiku va txi mi londeta, kambe ni na dhumiswa ka Faro ni ka yimbi yakwe yotshe, ka sikotxikani sakwe ni ka vagadhi vakwe va mahantxhi.

¹⁸Se Vaegipta va na tiziva ti to ani ngani MKOMA, ka mbimo yi ni no dhumiswa ka Faro, ka sikotxikani sakwe ni ka vagadhi vakwe va mahantxhi.”

¹⁹Ka mbimo yoneyo, Ngelozi ya Txizimu, ayi yi nga ti thangela mabutho a va ka Israyeli, yi to khukha yi txi zumbela msana kwawe. Ni yona phande ya direfu yi to guleka yi txi khukha masoni kwawe yi ta manekela msana;

²⁰ngu ka toneto, direfu di manekile di txi zumbela hagari ka dibutho da yimbi ya Vaegipta ni va ka Israyeli; aniko ngu ka Vaegipta direfu i ti da mtema wa hombe, aniko, ka va ka Israyeli di ti ti va woningeta. Ngu mhaka yeto, Vaegipta kha va sikota kumanela va ka Israyeli ka wusiku wotshe.

²¹Sekoko Mosi a to nawuluta dianza dakwe txitimwi ka linene, se MKOMA a to abanisa mati ka wotshe wusiku wule, ngu moya wa mtamo, wa kuta ngu wutxani; se linene li txi maneka li di omile.

²² Se vanana va ka Israyeli va to wulela ngu hagari ka linene, na mati ma di phwite; mati ma to maha maguma mambidi, dimwani txineneni ni dimwani txibhabha.

²³Vaegipta va nga ti valondeta va to wulela ni vona msana kwawe, mahantxhi otshe a Faro, sikotxikani sakwe ni vagadhi vakwe va mahantxhi, kala hagari ka linene.

²⁴Ngu mbimo ya mixo, MKOMA a to wona ngu mu ka phande ya mndilo ni ya direfu ngu didhawa da wugovelo wa Vaegipta, se e va vinganyisa.

²⁵Ene a to hujumelisa mawili a sikotxikani sawe, a txi maha ti to si tsimbila ngu kukarateka. Sekoko Vaegipta va to kha vona: “A hi tutumeni masoni ka MKOMA, nguko ene a lwa ngu ku va emela a txi wukela athu Vaegipta.”

²⁶Se MKOMA a to khene ka Mosi: “Nawuluta dianza dako txitimwi ka linene, kasiku, mati me tshumela ma txi tshangana ma txi mita Vaegipta, sikotxikani sawe ni vagadhi vawe va mahantxhi.”

²⁷Sekoko Mosi a to nawuluta dianza dakwe txitimwi ka linene, kutxani ka kona ni mixo, lona li to wuya ha wukhaloni ka lona. Vaegipta, mbimo yi va nga ti thava, va to tshangana ni mati. MKOMA a to bhwabhwamelisa Vaegipta hagari ka linene.

²⁸Mbimo yi mati ma nga tshumela me teka txikale txa ona, ma to mita sikotxikani, vagadhi va mahantxhi, ni mahantxhi a kona, ni dotshe dibutho da yimbi ya Faro, yi yi nga ti va londetile mu lineneni yi txi va hinga, kambe kha ka huluka ni wammweyo.

²⁹Ti di ngeto, va ka Israyeli va to pinda ngu hagari ka Linene la kuoma; mati ma ti mahile diguma ngu txinene ni txibhabha.

³⁰Ka ditshiku donedo, MKOMA a hulukisa va ka Israyeli manzani ka Vaegipta, ni va ka Israyeli va woni Vaegipta va di fite ha likasani ka mati a linene.

³¹Mbimo yi vanana va ka Israyeli va nga wona txitsayiso txa hombe txi Txizimu txi nga txi maha ka Vaegipta, va to thava MKOMA, ve kholwa kwakwe ni ka Mosi txithumi txakwe.