Read chopi Eksodha 15 Bible Online

Eksodha 15 - chopi bible

Eksodha 15

¹ Sekoko ka yona yile mbimo, Mosi ni vanana va ka Israyeli va to embelela ndando yiya ve dhumisa MKOMA, va txi kha vona: Ni na embelela ni dhumisa MKOMA, nguko a gulekile ngutu; A tshotshile lineneni dihantxhi ni m'gadhi wa dona.

² MKOMA mtamo wangu ni ndando yangu; ngene a nga ni hanyisa; ene ngene Txizimu txangu;[16] ngu mhaka yeto ni na muakela nyumba; ngene Txizimu txa tate wangu; ngu mhaka yeto, ni na m'dhumisa.

³MKOMA ngene i ku ndena ya kulwa; ditina dakwe ngene MKOMA.

⁴A bhwabhwamelisile mu lineneni, sikotxikani ni dibutho da yimbi ya Faro; manganakana akwe o thembeka ma bhwabhwamete mu ka linene lo Bhilivila.

⁵Mavimbi ma va tsitsivetile; va bhekile nga marigwi va txi ya kutshimani.

⁶Dianza dako da txinene, awe MKOMA, da ti pfalisa, kambe nda mtamo; da phatulela valala;

⁷Ngu wuhombe wa wukoma wako u wisile valala vako. Kuhenya kwako kuturile ku txi vahisa nga mwasi.

⁸Ngu kufuteta ka moya wako mati a linene ma to abaneka; mavimbi ma to ema ma txi maha maguma; mati ale ma khulungako ma to ema ma txi banga.

⁹Mlala a ti ti khene: “Ni na va londeta, ni na va mana, ni na va honyolela simaha sawe; ni txi va tekela sotshe si ni si lavako; wu na khura[17] ngu sona moya wangu, ni na swomola ditxhari dangu, ni va fuvisa ngu dianza dangu!”

¹⁰U futetile ngu moya wako, se linene li va mitile; va bhekile nga simbi, va txi ya hahatshi ka mati.

¹¹Awe MKOMA, i mani a fanako ni nawe, hagari ka sizimu kani? I mani wo nga awe[18] i ku wa hombe ni kusawuleka nga awe, wo thaviseka ni wudhumo, wo maha sixamaliso kani?

¹²U nawulutile dianza dako da txinene se mafu ma mitile valala.

¹³Ngu wunene wako, u hulukisile ni kutsimbitisa ngamu yako ngu mtamo wako, u va tsimbitisile va txi ya ditikoni kwako ko sawuleka.

¹⁴Vathu va na tipfa, va na dhudhumela; Vazumbi va ditiko da Vafilista va ñolwa ngu kuthava.

¹⁵Sekoko vathangeli va Edhomi va na dhukiswa; ka vale va mtamo ngutu va Mowabhi, va na talelwa ngu kuthava votshe vazumbi Vakanana va na guma mtamo.

¹⁶Kuxamala ni kuthava ku na wa txitimwi kwawe; ngu wuhombe wa diwoko dako, va na maha siduma nga marigwi, kala vathu vako va txi txhatuka, awe MKOMA, kala va txi txhatuka vathu vale u nga va tirula.

¹⁷Awe u na va wuleta ni ku va phaya ka mmango wu i kuthomba yako, wukhalo wule awe, MKOMA, u nga ti lulamisela kuzumba kona; wukhalo wo sawuleka MKOMA, wo akwa ngu manza ako.

¹⁸MKOMA a na fuma, kala kupinduka, ngu ha ku si gwitiko!

¹⁹Nguko mbimo yile mahantxhi a Faro, ni sikotxikani sakwe, ni vagadhi va mahantxhi, va nga wulela lineneni, MKOMA a mahile ti to mati ma txi tshangana txitimwi kwawe; na kuve vanana va ka Israyeli va pindile ku di omile hagari ka linene.

²⁰Sekoko Miriyamu, mprofeti wa txisikati, ndiyakwe Aroni, a to teka txingomana manzani kwakwe, ni vavasikati votshe va to mlondeta ni singomana, va txi veta ni kusinya.

²¹Miriyamu a ti ti va embelelisa, a txi khene: “Embelelani mi dhumisa MKOMA, nguko a ti ambekile wudhumo; kambe a tshotshile lineneni dihantxhi ni m'gadhi wa dona.”

²²Msana keto, Mosi a mahile ti to va ka Israyeli va txi khukha hafuhi ka Linene lo Bhilivila, ve humela kuya txiwulani ka Suri; se va to tsimbila masiku mararu txiwulani, aniko kha va mana mati.

²³Sekoko va to ya hoka ka wukhalo wu wu dhanwako ku i Mara, kha va sikota kusela mati ale ma nga ti ti ho konaho, nguko ma txi bava. Ngu mhaka ya toneto wukhalo wonewo wu ti dhanwa ku[19] i Mara.

²⁴Se vathu va to ngungurukela ve wukela Mosi, va txi kha vona: “Se hi na sela txani kuwa kani?”

²⁵Se Mosi a to dila ka MKOMA, se MKOMA a to mkomba txipulangwana, Mosi a to txi rola e txi txi vinza matini, se mati ma to maha o lombela; konaho MKOMA a to va ninga sileleto ni sirumo, ngu kona hale a nga va xola kona.

²⁶Se a txi khene: “Ngako u txi engisisa kha kwati dipswi da MKOMA, Txizimu txako, ni kumaha ti i ku to lulama masoni kwakwe, kambe u txi dingeta nzeve yako ka sirumo sakwe, ni kuvekisa sotshe sileleto sakwe, kha ni na mbi rumela malwati ni a mamwewo txitimwi kwako, ale ni nga ma veka txitimwi ka Vaegipta; nguko ani ngani MKOMA, ni ku kalamukisako.”

²⁷Sekoko va to ta Elime, ahale ku nga ti ni digumi da milonga ni yimbidi ya mati ni mtxhanu wa magumi ni magumi mambidi a mitxhese; va to gova hafuhi ni mati.