Read chopi Eksodha 16 Bible Online

Eksodha 16 - chopi bible

Eksodha 16

¹Va to khukha Elime, msengeletano wotshe wa vanana va ka Israyeli aha va nga ya hoka txiwulani ka Simi, ku manekako hagari ka Elime ni Sinayi, ka ditshiku da digumi ni mtxhanu ka mtxima wa wumbidi, msana ka kuva va di humile ngu Egipta.

²Msengeletano wotshe wa vanana va ka Israyeli wu to ngurangurela Mosi ni Aroni kona txiwulaniyo.

³Vanana va ka Israyeli va va gete va txi kha vona: “I ti txhuko idiku MKOMA a ti hi date ngu dianza dakwe ditikoni ka Egipta, nguko hi ti khalahatshile hafuhi ka tikhadi ta nyama, mbimo yi hi nga ti ti dya sakudya hi khura! Aniko anu mi hi tisile txiwulani muwa, kasiku dibutho diya mi txi di daya ngu nzala.”

⁴ Sekoko MKOMA a wombile ka Mosi a txi khene: “Ni na mi nisela sakudya ngu nzumani: Vathu va na huma va txi rolela mpimo wa ditshiku ni ditshiku, ni lava kuwona ti to mwendo votshe va vekisa mithetho yangu mwendo kha va vekisi.

⁵Se ku na maheka taku, ngu ditshiku da wutxhanu ni dimwedo, va na lulamisela sile va no elula; so dingana masiku mambidi, kupinda sile va rolelako ditshiku ni ditshiku.”

⁶Sekoko Mosi ni Aroni va to womba ka msengeletano wa vanana va ka Israyeli, va txi kha vona: Ni minova mi na tiziva tito, MKOMA ngene a nga mi humisa ditikoni ka Egipta.

⁷Mangwana ni mixo mi na wona wudhumo wa MKOMA, nguko ene a engisile ku m'ngungurukela kwanu. Nguko athu hi vamani aha koza mi txi hi ngungurukela kani?

⁸Mosi a to womba kambe a txi khene: “Minova yiya MKOMA a na mi ninga nyama midya, se ni mixo, a na mi ninga sakudya si mi no khura ngu sona, nguko a engisile kungungurukela kwanu ngu mhaka yakwe. Nguko athu, hi vamani kani? Kungungurukela kwanu hi ngako wukela athu, aniko ngo wukela MKOMA.”

⁹Msana keto, Mosi a to khene ka Aroni: Gela wotshe msengeletano wa vanana va ka Israyeli ku khawe: “Tshuketani hafuhi ka MKOMA, nguko a engisile kungungurukela kwanu.”

¹⁰Mbimo yi Aroni a nga ti womba-womba ka msengeletano wotshe wa vanana va ka Israyeli, va to tshembereka va txi wona didhawa da txiwulani, aha ku nga humelela mu direfuni wudhumo wa MKOMA.

¹¹MKOMA a wombile ka Mosi a txi khene:

¹²“Ani ni engisile kungungurukela ka vanana va ka Israyeli; va gele to: Ni minova mi na dya nyama, aniko mixo mi na khura ngu m'baba; se mi na tiziva ti to ani ngani MKOMA, Txizimu txanu.”

¹³Ni minova ku to huma titshukwa ti ta fenengeta wugovelo wawe; ni mixo ku ti pometwe ngu hunguva ka makhalo otshe a wugovelo.

¹⁴Mbimo yi ku nga tshatsheka hunguva yi yi nga ti wite ha mafuni ka txiwulani, ku to humelela mpupu wo songanyana, wo nga tindoho to hehuka nga hunguva txitimwi ka mafu.

¹⁵Ngako va di si woni, vanana va ka Israyeli va wombile hagari kwawe va txi kha vona:[20] “Njitxani txiya kani?” Nguko va si ti zivi ti to i nga va txani. Mosi a ti khene: Asiya nzakudya si MKOMA a mi ningako kuve idi mndiwo wanu.

¹⁶MKOMA a ruma ti to khene: “Mmwani ni mmwani a na rolele asi si enelako kudya, mpimo wa homeri ngu m'thu ni m'thu. M'thu ni m'thu a na rolela so enela mtengo wa vathu vale a ku navo mu ditendani kwakwe.”

¹⁷Va ka Israyeli va mahile toneto. Vamwani va rolete sasingi kupinda vamwani, ani vamwani va rolete sa sidotho.

¹⁸ Kambe mbimo yi va nga pima ngu homeri, hambi awule a nga rolela sasingi a ti si nga naso so pinda vamwani; mmwani ni mmwani a rolete so enela ku a txi dya.

¹⁹Se Mosi a ti khene kwawe: “Ni wammweyo a nga veke so ta dya mangwana.”

²⁰Kambe vona kha va mu engisa, vamwani vokari va to veketa sa mangwanani ka kona; ngu mhaka yeto sakudya si to humisa timbungu, ku txi nunga kubiha. Se Mosi a to henya ngu mhaka yawe.

²¹Mixo ni mixo mmwani ni mmwani a ti rolela so enela ku a txi dya, se mbimo yi ditambo di nga khata kuhisa, si ti nyivilika.

²²Ngu mhaka yeto, ka ditshiku da wutxhanu ni dimwedo va to rolela sakudya so enela masiku mambidi, mipimo yimbidi ya homeri ngu m'thu ni m'thu; se madhota a msengeletano va to ya ka Mosi va txi ya womba.

²³ Ene a va gete a txi khene: “Ngu toneto, MKOMA a nga womba ku khene: Mangwana ditshiku do humula, i Sabbata yo sawuleka ya MKOMA. Bhikani si mi si lavako kubhika, mi katinga si mi lavako kukatinga, ni si si salako, si veketeni kala mangwana.”

²⁴Va to si xayisa ve si veketa kala mangwanani ka kona, nga ti Mosi a nga va leletelisa tona; kambe kha sa fura si nunga, hambi kuhumisa timbungu.

²⁵Sekoko Mosi a ti khene: “Asiya dyanani nyamsi, nguko adiya ditshiku i Sabbata ya MKOMA, nditshiku do humula; nyamsi mi na mbi ya si mana hahanze.

²⁶Amu ka mtxhanu wa masiku ni dimwedo mi na si rolela, aniko ka ditshiku da mtxhanu ni mambidi, i ku ditshiku do humula, kha si na mbi maneka.”

²⁷Vamwanyani va ka kwawe va to huma ka ditshiku da wutxhanu ni mambidi kasiku va txi ya rolela sokari, aniko kha va nga ya si mana.

²⁸Sekoko MKOMA a to khene ka Mosi: “Mi na lamba kuvekisa sirumo sangu ni mithetho yangu kala mbimo muni kani?

²⁹Pimisani ti to MKOMA a mi ningile Sabbata, ditshiku do humula; ngu mhaka yeto, ka ditshiku da wutxhanu ni dimwedo, wa mi rumela sakudya sa masiku mambidi. Ka ditshiku da wutxhanu ni mambidi, mmwani ni mmwani a na zumbe mu ditendani kwakwe asi humi hahanze ka dona.”

³⁰Se vathu va manekile va txi humula mu ka ditshiku da wutxhanu ni mambidi.

³¹ Vathu va nyumba ya ka Israyeli va si ningile ditina daku i manna. I ti so nga nyasenge, wo basa, kutshamba ka sona i ti ku nga txibhubhutela txa wulombe.

³²Se Mosi a ti khene: “MKOMA a leletete ti to mi na tata homeri yimweyo ngu manna, mi txi yi veketa, kasiku tiveleko tanu, ti ta wona sakudya si ni nga mi wunja ngu sona txiwulani, msana ka ku ni nga mi humisa ditikoni ka Egipta.”

³³ Mosi a to khene kambe Aroni: “Teka txikadyana thela ka txona homeri yimweyo yo tala ngu manna se u txi veka masoni ka MKOMA, kasi ku yi veketa kala ka vatukulu vanu.”

³⁴Nga ti MKOMA a nga leletisa tona ka Mosi, Aroni a to veka txikadyana masoni ka dibhokiso da txixambanyo, ti to txi txi veketwa.

³⁵ Se vanana va ka Israyeli va dyite manna mndani ka mtengo wa mune wa magumi a malembe kala va txi hoka ka ditiko di di nga akwa va dyite manna kala va txi hoka mihinganoni ka ditiko da Kanana.

³⁶Mpimo wu wu dhanwako ti to i homeri ngu didhawa da wugumi da efa.