Read chopi Eksodha 17 Bible Online

Eksodha 17 - chopi bible

Eksodha 17

¹Msana keto, wotshe msengeletano wa vanana va ka Israyeli wu to khukha txiwulani ka Simi, wu txi tsimbila ngu mipfhuka yi yi londetelanako, nga ti MKOMA a nga leletisa tona, va txi ya gova Refidhime, ahawa ku nga ti si nga ni mati o sela.

²Sekoko vathu va to phikizana ni Mosi, va txi kha vona: “Hi ninge mati o sela.” Mosi a va xamute a txi khene: “Ngu kutxani mi txi phikizana ni nani kani? Ngu kutxani mi txi duka MKOMA kani?”

³Konaho vathu va manekile va txi pfa ditora, ve khata kungungurukela va txi wukela Mosi, va txi kha vona: “Ngu kutxani u nga hi humisa ditikoni ka Egipta kani? U mahile eto kasi ku ta hi daya ngu ditora athu ni vanana vathu, ni sifuyo sathu kani?”

⁴Se Mosi a to khongela ka MKOMA, a txi khene: “Ni na maha txani ngu vathu vava kani? Ko sala kudotho, va lava ku ni balisela ngu marigwi.”

⁵Sekoko MKOMA a to khene ka Mosi: “Pinda u txi ya masoni ka vathu, u txi teka madhota okari a ka Israyeli; ñola manzani kwako ndonga yi u nga peka ngu yona mnambo, u txi thangela.

⁶Ziva ti to ani ni na va masoni kwako, txitimwi ka mmango wa Horebi; u na ya peka txiwindi ngu ndonga, mati ma na huma ngu ka txona, aawa vathu va no sela.” Mosi a to maha toneto masoni ka madhota a ka Israyeli.

⁷ Se wukhalo wule a wu rayile ditina daku[21] Masa ni[22] Meribha, ngu mhaka ya ku phikiza kwawe vanana va ka Israyeli ni mhaka ya kuduka MKOMA, va txi kha vona: “Ina MKOMA waho mwendo kha nga ho hagari kwathu kani?”

⁸Sekoko Vaamaleki va to khukha va txi ya Refidhime, kasi va txi yalwa ni va ka Israyeli.

⁹Konako Mosi a wombile ka Joxuwa, a txi khene: “Sawula vavamna kasiku, mangwana u nata huma u txi yalwa ni Vaamaleki; ani ni na zumba txitimwi ka mmango ni ndonga ya MKOMA manzani.”

¹⁰Joxuwa a to maha nga ti Mosi a nga womba, a to huma kasiku yalwa ni Vaamaleki. Ti di ngeto, Mosi ni Aroni ni Huri, va to kwela txitimwi ka mmango.

¹¹Se mbimo yi Mosi a nga txi guleta manza akwe, va ka Israyeli va ti ti xula; mbimo yi a nga txi ma releta, Vaamaleki ngu vona va nga ti humelela kulwani kwawe.

¹²Kambe manza a Mosi ma manekile ma txi karala, ngu kumaha keto, va to teka dirigwi, ve di veka hahatshi kwakwe e khalahatsha txitimwi ka dona. Aroni ni Huri va to guleta manza akwe, mmweyo e maneka ka dimwani didhawa, mmwani a txi maneka ka dimwani. Se manza akwe ma to zumba ma di guletilwe kala kuswani ka ditambo.

¹³Ngu toneto, Joxuwa a xute Vaamaleki, e va hihirita ngu matxhari.

¹⁴ Sekoko MKOMA a to womba ka Mosi a txi khene: “Bhala timhaka tiya amu ka dibhuku kasi ku ti maha txialakanyiso, u gela Joxuwa tito, ni na lovisa maalakanyo a Amaleki, hahatshi ka nzuma.”

¹⁵Se Mosi a to aka txiluvelo e txi raya ditina daku “MKOMA m'jeke wangu.”

¹⁶Se a txi khene: “Nguku dianza dakwe di nga wukela MKOMA. MKOMA a na maha yimbi yo wukela Amaleki ka liveleko ni liveleko.”