Read chopi Eksodha 19 Bible Online

Eksodha 19 - chopi bible

Eksodha 19

¹Ka ditshiku do khata amu ka mtxima wa wuraru, msana ka kuva va di humile ditikoni ka Egipta, ka ditshiku donedo, vanana va ka Israyeli va to hoka txiwulani, mmangoni ka Sinayi.

²Ngako va di khukhile Refidhime, va to wulela txiwulani ka Sinayi. Aho va nga ya gova kona. Va ka Israyeli va to ya aka kona, masoni ka mmango.

³Mosi a to kwela a txi ya ka Txizimu, se MKOMA a to m'dhana a di mmangoni, a txi khene: U na ya wombisa tiya ka nyumba ya ka Jakobe, u txi huwelela ka vanana va ka Israyeli u txi khawe:

⁴“Mi ti woni ati ni nga ti maha ka Vaegipta ni ti ni nga mi gulisa tona ngu txitimwi ka mabhapi a ngungwa, ni txi mi tisa kala kona hawa kwangu.

⁵ Kukhukhela ka kuwa, ngako mi txi engisa dipswi dangu, mi txi londeta mhaka ya txitumelelano txangu, hagari ka votshe vathu, sekoko mi na va mi di thomba yangu. Nguko dotshe ditiko ndangu.

⁶ Aniko anu mi na va mi di mfumo wa wuphaxeli ni vathu vo sawuleka. Mapswi awa ngu ona u no ya va gela vanana va ka Israyeli.”

⁷Mosi a to ramba madhota otshe a vathu a txi va txhamusela kambe ona mapswi aale MKOMA a nga m'gela ona.

⁸Sekoko votshe vathu va to xamula, va txi kha vona: “Totshe ti MKOMA a nga ti womba, hi na ti maha.” Se Mosi a to ma txhamusela ka MKOMA mapswi a vathu votshe.

⁹Se MKOMA a to ni gela ku khene: “Wona taku ani ni nata kwako ngu mu ka direfu do phumela, kasi ku vathu va txi ni engisa ni txi womba-womba ni nawe, kasiku kambe va txi kholwa ngu ha ku si gwitiko.” Aha Mosi a nga txhamusela ka MKOMA mapswi a vathu votshe,

¹⁰MKOMA a to khene kambe ka Mosi: “Tsula u txi ya sawulekisa vathu nyamsi ni mangwana, va txi kuwula syambalo sawe,

¹¹va txi va va di ti longisete ka ditshiku da wuraru, nguko ka ditshiku da wuraru, MKOMA a na txhika txitimwi ka mmango wa Sinayi, masoni ka vathu votshe.

¹²U na komba ka vathu muhingano ngu kurendelekisa, u txi va gela tiya: Mi nga kweleni mmango hambi ni kugwesa makhatoni ka wona. Awule a wu gwesako, a na tsayiswa ngu kufa.

¹³Kha kulaveki kugwesa ngu dianza dakwe, aniko va na mu balisela ngu marigwi mwendo a na fuletelwa ngu tingove. Mwendo njihari mwendo i m'thu, kha na mbi hanya; ngako ku txi vetwa[23] mpundu mbimo yo lapha, sekoko mi na kwela ha mmangoni.”

¹⁴Sekoko Mosi a to txhika ngu mmangoni, a txi ya sawulekisa vathu; ene a va basisile, kambe va kuwute syambalo sawe.

¹⁵Se a to khene ka vathu: “Ka ditshiku da wuraru, manekani mi di ti lulamisete, mi nga tshuketeleni vavasikati.”

¹⁶ Kutxani ka ditshiku da wuraru, ku to maheka singwalangwanda ni tinyangafula ni direfu da mtima di to fenengeta mmango, se kudhuma ka mtamo ka mpundu ku to pfala ngutu. Dibutho da vathu di nga ti wugoveloni di to dhudhumela.

¹⁷Mosi a to ruma ati to vathu va txi huma ve hingeta Txizimu, se va to ya ema hafuhi ka mmango.

¹⁸Mmango wotshe wa Sinayi wu to tuvika, nguko MKOMA a ti relete e maneka txitimwi ka wona, ngu hagari ka mdhikila wa mndilo. Wutshi wu wu nga ti tuvika wu txi guleka, i ti ku nga wa dibivi se mmango wotshe wu to dekadeka ngu mtamo.

¹⁹Kudhuma ka mpundu ku to maneka ku txi kula ngutu. Mosi a ti ti womba-womba ni dipswi da Nyatxitimwi di ti mxamula.

²⁰MKOMA a to txhika txitimwi ka mmango wa Sinayi. Se ene MKOMA a dhani Mosi a di kona mmangoni, aha Mosi a nga kwela.

²¹Se MKOMA a to khene ka Mosi: “Relela u txi ya zivisa vathu ati to va si tshawunyeti muhingano ngu kulava kuwona MKOMA, kasi ku ku si fi vavangi.

²² Vaphaxeli va va ku ni fanelo yo tshuketa hafuhi ka MKOMA va na maneke va di basile, ati to MKOMA asi va peki ngu lifo.”

²³Sekoko Mosi a to khene ka MKOMA: Vathu kha va na mbi sikota kukwela mmango wa Sinayi, nguko awe u hi bhasopisile u txi khawe: “Tenderuka mmango u txi komba muhingano, u txi wu sawulekisa.”

²⁴Se MKOMA a to xamula a txi khene: “Tsula u relela, ngu msana u na kwela awe ni Aroni; aniko vaphaxeli ni vathu va nga tshawunyete muhingano, va txi ya ka MKOMA kasi ku asi va peki ngu lifo.”

²⁵Sekoko, Mosi a to relela a va gela vathu timhaka tiya.