Read chopi Eksodha 21 Bible Online

Eksodha 21 - chopi bible

Eksodha 21

¹Ayiya ngu yona milayo yi u no vekela va ka Israyeli:

²“Ngako u txi xava khumbi ya Muhebheru, yi na kuthumele mtxhanu wa malembe ni dimwedo; aniko dilembe da wutxhanu ni mambidi, yi na huma ngu kutxhatxheka, yi si diheli txilo.”

³Ngako awule wa khumbi a di tile ekha, a na tshumela ekha; ngako a di tile ni msikati, msikati wakwe a na tshumela nayo.

⁴Aniko ngako nyamne i di ene a nga mninga msikati, ni kungako a txi mana vanana vavafana ni vamahorana, wamsikati ni vanana i thomba ya nyamne wakwe, se ene a na huma ekha a txi tsula.

⁵Ngako awule wa khumbi a txi khene: “Nyamne wangu na m'dhunda, kumweko ni msikati wangu ni vanana vangu, kha ti lavi kutxhatxheka.”

⁶Sekoko nyamne wakwe a na mtisa masoni ka Txizimu, a na mkhigetelisa aha ka ditimba mwendo aha ka msasimo, a na mthola nzeve ngu linyonzi, se a na va i di khumbi yakwe ngu yotshe mbimo.

⁷Se ngako m'thu wokari a txi xavisa mwanana wakwe wa dihorana, ngu wukhumbi, ene kha na mbi txhatxheka ku nga khumbi ya wamwamna.

⁸Se ngako asi tsakisi masoni ka nyamne wakwe, awule a nga mxava, a na tumela to e tirulwa. Kambe asi mxavisi ka vanyamthuvo, nguko a mkanganyisile.

⁹Ngako a txi mxavela mwanana wakwe wa mfana, ene a na mxayisisa ku nga mwanana wakwe wa dihorana.

¹⁰Ti di ngeto, ngako ene a txi teka mmwani wamsikati, kha na mbi sikota kuhungula fanelo ya sakudya, syambalo ni fanelo ya wukati.

¹¹“Ni ku ngako asi mahi totshe tifanelo ta tiraru, ene wa sikota kutsula, asi hakeli txilo, hambi kutirulwa.”

¹²Ngako m'thu wokari a txi peka mmwani a txi wa efa, a na fa nene ngu kudawa;

¹³kambe ngako a ti m'date ngu phango, na Txizimu i di txona txi nga mningela manzani kwakwe, ani ni na kukomba wukhalo wu a fanelako kuthavela ka wona.

¹⁴Ngako m'thu a txi daya mmwani khakwenye, hambi nga ti a di ha digandeloni kwangu, u na mñola u txi mruruvisa u txi ya m'daya nene.

¹⁵Awule a pekako tate wakwe mwendo mame wakwe, a na dawa.

¹⁶Awule a pako m'thu a txi mxavisa, mwendo e ta manwa nayo manzani kwakwe, a na dawa.

¹⁷ Awule a ruketelako tate wakwe mwendo mame wakwe, a na dawa.

¹⁸Ngako vathu vambidi va txi phikizana va txi lwa ngu txawe, mmweyo wawe e peka mmwani ngu dirigwi mwendo txibhakela, asi fi, aniko a txi otela ha ditahoni,

¹⁹se ngako a txi khukha e tsimbila-tsimbila hahanze na a txi txheketela ngu ndonga, sekoko awule a nga mpeka a na divalelwa; aniko a na m'diha mbimo yile a nga jiyela, kambe a na mkondeta eza e kalamuka.

²⁰Ngako m'thu wokari a txi peka txithumi txakwe txa wamwamna mwendo txa wamsikati ngu ndonga, aha koza txi txi fa ngu dianza dakwe, a na tsayiswa;

²¹kambe ngako txi txi hanya amu ka ditshiku dimwedo mwendo masiku mambidi, kha na mbi tsayiswa, nguko i male yakwe.

²²Ngako vathu va txi lwa, va txi peka mrumbu wa wamsikati wule a ku ni txirumbu aha koza e holota, aniko ene asi fi; a na dihwa ngu mtengo wule mkatakwe a no wu lava, kambe a na dihela masoni ka vathethisi.

²³Aniko ngako wamsikati a txi dawa, sekoko a na dihelwa wutomi ngu wutomi,

²⁴diso ngu diso, dikwasa ngu dikwasa, mkondo ngu mkondo,

²⁵kuhiswa ngu kuhiswa, ku dayiswa ngu ku dayiswa, kuganyatwa ngu kuganyatwa.

²⁶Ngako m'thu a txi peka khumbi yakwe ya wamwamna mwendo ya wamsikati, e yi dayisa diso di za di onheka, a na yi leka yi tsula walo ngu mhaka ya diso da yona.

²⁷“Ngako a txi kunula dikwasa da khumbi yakwe ya wamwamna mwendo ya wamsikati, a na yi leka yi tsula ngu kutxhatxheka, ngu mhaka ya dikwasa da yona.”

²⁸“Ngako homu yokari yi txi dhina wamwamna mwendo wamsikati ngu titxheho ta yona eza a txi fa, homu yoneyo yi na baliselwa ngu marigwi, ni nyama ya kona kha yi na mbi dyiwa; aniko nyamne wa kona a na divalelwa mnandu.”

²⁹Aniko ngako homu yi di zivisilwe to nja tshofu, ni nyamne wa yona a di zivisilwe a sikombi kukhatala a txi yi sunga, homu yi na baliselwa ngu marigwi, ngako yi di date wamwamna mwendo wamsikati, ni nyamne wa kona a na tsayiswa ngu kudawa.

³⁰Ngako a txi dihiswa, sekoko a na dihiswa ngu mtengo wa male yi yi dinganako wutomi wakwe, nga ti va no m'gelisa tona.

³¹Ngako homu yi txi daya mfana mwendo dihorana, txithethiso txa kona txi mahiswa toneto ni txona;

³²aniko ngako homu yi txi dhina khumbi ya wamwamna mwendo ya wamsikati, nyamne wa homu a na diha ngu male ya magumi mararu a maxekele a silivhela ka nyamne wa khumbi, ni homu ya kona yi na baliselwa ngu marigwi.

³³Ngako m'thu a txi leka diphala di di asamile, mwendo wo kela diphala asi tshumeli a txi di kuletela, se ka dona ku txi hojomela homu mwendo mbongola,

³⁴nyamne wa dona diphaledo, a na diha ngu male ka nyamne wa txihari ngu mtengo wa txona, aniko txihari atxile txi nga dawa txi na va txi txi mlumba ene.

³⁵Ngako homu ya m'thu wokari yi txi dhina homu ya mmwanwe yi txi fa, sekoko va na xavisa homu yile yi hanyako va txi abana male ya kona, se ni nyama ya homu yile yi nga dawa, va na abana kambe nyama ya kona.

³⁶Aniko ngako ti di zivisilwe ati to homu yile yi ni tshofu, se nyamne wa kona a sa khatala ngu mhakeyo, nga ti ti nga txi laveka, a na tshumeta ngu yimwani homu, ngu nyama ya kona yi na lumba ene.