Read chopi Eksodha 23 Bible Online

Eksodha 23 - chopi bible

Eksodha 23

¹ “U nga hangalase timhaka ta makuhu; u nga tshangane ni vathu vo biha, u nga mahe wufakazi wa makuhu.

² U nga londete mtxawa wa mtalo wa vale va mahako to biha. U nga emele ava votala habanza, ngako va txi jikisa mahungu a ditshuri,

³u nga emele txisiwana ka mhaka yo wekela.

⁴Ngako u txi mana homu ya mlala wako, mwendo mbongola yakwe, yi di mwalate, yi gole u txi yi heleketa ka nyamne wa yona.

⁵ Ngako u txi wona mbongola ya wule a ku vengako, yi txi wa ngu kunemelwa ngu mthwalo, u nga mleke ekha, aniko m'vhunete ku yi khukhisa.

⁶U nga jikise mhaka ya txisiwana kulamulwani ka txona, ngako yi di lulamile.

⁷Ti hambukise ka mhaka ya makuhu; u nga daye m'thu wo lulama ni wamnene, nguko ani kha ni na mbi emela txigevenga.

⁸ Kambe u nga amukele txiningo, nguko txiningo txa vhala maso avale va wonako, kambe txa jikisa timhaka ta vale va nga lulama ha banza.

⁹ U nga xuphe mluveli; anu ma kuziva kuxupheka kwakwe, nguko nanu mi ti ti valuveli ditikoni ka Egipta.”

¹⁰“Amu ka mtxhanu wa malembe ni dimwendo, u na phaya thembwe yako u txi elula silo sa kona,

¹¹ aniko ka dilembe da wutxhanu ni mambidi, u na leka mafu ma txi humulela u si dimi, ni silo sa kona u na si leka si txi va sa sisiwana sa vathu vako, se asi si salako si na dyiwa ngu sihari. U mahisa eto ngu thembwe ya mivhinya ni ya miolivha.

¹² Amu ka mtxhanu wa masiku ni dimwedo u na maha mithumo yako; se ka ditshiku da wutxhanu ni mambidi u na humula, kasiku homu yako ni mbongola yako si mana kuhumula, kasiku mwanana wa khumbi yako a txi mana ku hefu, kumweko ni mluveli wako.

¹³Londetani ngu kukhatala totshe timhaka ti ni mi gelako, kambe mi nga thukeni mi khumbuka ditina da simwani sizimu, kha kulaveki di txi pfala sisofuni kwanu.”

¹⁴U na ni mahela m'buso kuraru ngu dilembe.

¹⁵ U na vekisa M'buso wa Mapawu o mbi Tshumbelwa. Amu ka mtxhanu wa masiku ni mambidi u na dya mapawu o mbi tshumbelwa, nga ti ni nga kuleletelisa tona, ka mbimo yi yi nga emiselwa, amu ka mtxima wa Abhibhi, nguko ngu wonewo mtxima u nga huma ngu wona ditikoni ka Egipta. Ni wammweyo a nga sikote kuhumelela masoni kwangu a sa ñola txilo;

¹⁶ni M'buso wa kuelulwa ka mihando yo khata yi u nga ti thumela, yi u no va u di phayile thembweni. Ni M'buso wa kuguma ka dilembe, mbimo yile u nova u di yi elute thembweni kwako.

¹⁷Sikhati siraru ngu dilembe, votshe vavamna va na woneka masoni ka MKOMA.

¹⁸U nga ningele mnoha wa mphaxo wangu kumweko ni dipawu do tshumbelwa; kambe ku nga sale mafura a ku ni lumba amu ka m'buso, kukhukhela wusiku kala ni mixo.

¹⁹ Matiwula, mihando yo khata ya mafu, u na yi tisa Nyumbani ka MKOMA, Txizimu txako; u nga bhike txihongwana ngu masi a mame wa txona.

²⁰“Wona, na ruma ngelozi masoni kwako, ayi yi no kuxayisa hagari ka nzila, yi txi kuhokisa ka wukhalo wule ni nga kululamisela wona.

²¹Yi xoniphe masoni kwako, u txi engisa dipswi da yona, u nga yi eyise, nguko kha yi na mbi divalela sihoxo sanu, kambe yona yi na womba ngu ditina dangu.

²²Aniko ngako u txi engisa ngu kuthembeka u txi maha totshe atile ni no kugela, sekoko ni na va ni di mlala wa valala vako ni txi wukela avale va kuphikako.

²³Ngelozi yangu yi na kuthumela masoni kwako, kambe yi na kuyisa ditikoni ka Vaamori, ka Vaheti, ka Vaferezi, ka Vakanana, ka Vahevhi ni ka Vajebhusi, ani ni na va lovisa.

²⁴U nga khizame masoni ka sizimu sawe, kambe u nga si khozele, hambi kumaha mikhuwo yawe; aniko u na si khundumusela sotshe[24] sithombe sawe.

²⁵Mi na thumela MKOMA, Txizimu txanu, se ene a na katekisa sakudya sanu, mati anu kambe a na hambukisa malwati hagari kwanu.

²⁶Ditikoni kwanu kha ku na mbi vaho wamsikati wo onhekelwa ngu txirumbu, hambi awule i ku txifule, kambe ni na engetela mtengo wa masiku ako.

²⁷Ni na rumela kuthava masoni kwako, ni na hangalasa vathu votshe kotshe amu u no maneka u txi wulela kona, kambe ni na maha ati to votshe valala vako va txi kutshuralela va txi tutuma ngu kuthava.

²⁸Ni na rumela kambe mifi masoni kwako, ati to yi txi tutumisa Vahevhi, Vakanana ni Vaheti va txi thava masoni kwako.

²⁹Kha ni na mbi va tutumisa masoni kwako ngu dilembe dimwedo dwe, kasiku ditiko di si mahi txiwula, se sihari sa txitinga si txi anda si txi mi wukela.

³⁰Ni na va tutumisa kudotho-kudotho masoni kwako, kala kuza u txi anda, u txi mana mtamo wo teka ditiko di txi maha thomba yanu.

³¹Ni na komba muhingano wako, kukhukhela ka Linene lo Bhilivila kala ka Linene la Vafilista, ni kukhukhela txiwulani kala[25] mnamboni. Ni na ningela manzani kwako vaaki va ditiko donedo, ati to u na va tutumisa hafuhi kwako.

³²U nga mahe txitumelelano navo, ni sizimu sawe.

³³Vona kha va na mbi zumba ditikoni kwako, kasi ku va si mi onhisi masoni kwangu, nguko mi txi khozela sizimu sawe, mi na loviswa ngu mlawu.”