Read chopi Eksodha 24 Bible Online

Eksodha 24 - chopi bible

Eksodha 24

¹Msana keto, a to khene ka Mosi: “Kwela u txi ya ka MKOMA, awe ni Aroni, ni Nadhabhi, ni Abhiyu, ni mtxhanu wa magumi ni mambidi a madhota a ka Isareli; se mi na khizama mi di kule.

²Kambe i Mosi dwe a no tshuketa ka MKOMA; aniko vona va nga tshukete, hambi vathu va nga kwelele nayo.”

³A di wuyile koko Mosi a to ta txhamusela ka vathu mapswi a MKOMA ni sotshe sileleto, sekoko vathu va to xamula ngu dipswi dimwedo. Va to kha vona: “Otshe mapswi ale MKOMA a nga ma womba, hi na ma maha.”

⁴Se Mosi a manekile a txi bhala otshe mapswi a MKOMA, se ni mixo a to khukha eya aka txiluvelo hafuhi ka mmango, ni tiphande ta digumi ni timbidi[26] ta marigwi, a txi dinganisa tihunzu ta digumi ni timbidi ta va ka Israyeli.

⁵Ngu msana a to ruma mazambi okari a vanana va ka Israyeli, kasiku va txi maha miningelo yo hiswa, va txi maha miphaxo ka MKOMA ngu kudaya marole va txi dhumisa MKOMA.

⁶Mosi a to teka mnoha wa hafu a txi wu veka amu ka mbiya, a to xwayela ngu yimwani hafu ya mnoha txitimwi ka txiluvelo.

⁷A to teka dibhuku da txitumelelano e di gonda masoni ka vathu; se vathu va to xamula, va txi kha vona: “Totshe ti MKOMA a nga ti womba athu hi na ti tumela kambe hi na ti thuma.”

⁸ Sekoko Mosi a to teka mnoha a txi wu xwayela txitimwi ka vathu, na a txi womba, a txi khene: “Awuwa mnoha wa txitumelelano txi MKOMA a nga txi maha ni nanu, ngu kulondisa otshe mapswi ale a nga ma womba.”

⁹Mosi, ni Aroni, ni Nadhabhi, ni Abhiyu, ni madhota a mtxhanu wa magumi ni magumi mambidi va to kwela va txi ya mmangoni,

¹⁰se va to wona Txizimu txa ka Israyeli, hahatshi ka mikondo ya txona ku ti ni txo nga dirigwi da safira do phatima ku nga nzuma.

¹¹Kambe MKOMA kha guleta dianza dakwe txitimwi ka vasawuleki, hagari ka vanana va ka Israyeli; kambe va txi wonile Txizimu, va dyite, ve sela.

¹²Sekoko MKOMA a to khene ka Mosi: “Kwela u txi ta zumba hawa kwangu, mmangoni; se ni na kuninga sileti sa marigwi, ni milayo, ni sirumo si ni nga si bhala, kasi ku u txi ya va gondisa.”

¹³Se Mosi a to khukha ni Joxuwa txithumi txakwe; se Mosi e kwela mmangoni ka Txizimu.

¹⁴Se a to khene ka madhota: “Hi vereleni kona hawa, kala hi txi wuya; Aroni ni Huri va na sala ni nanu. Wuhi ni wuhi a ku ni mhaka a na yi tise kwawe.”

¹⁵Mbimo yile Mosi a nga txi kwela mmangoni, direfu di to fenengeta mmango.

¹⁶Se kuphatima ka MKOMA ku to maneka txitimwi ka mmango wa Sinayi, direfu di to wu fenengeta, mtxhanu wa masiku ni dimwedo; se ngu ditshiku da wutxhanu ni mambidi, MKOMA a to dhana Mosi, a di mndani ka direfu.

¹⁷Se kuphatima ka MKOMA txitimwi ka mmango, masoni ka vanana va ka Israyeli, ku to wonekisa kufana ni mndilo wu tshokomisako.

¹⁸ Se Mosi a to wulela hagari ka direfu, e kwela mmangoni; Mosi a to zumba mmangoni mune wa magumi a masiku, ni mune wa magumi a wusiku.