Read chopi Eksodha 27 Bible Online

Eksodha 27 - chopi bible

Eksodha 27

¹“U na maha txiluvelo ngu mapulango a setime; aale ma ku ni mtxhanu wa mikono ya kulapha, ni mtxhanu wa mikono kuanama (txiluvelo nja mune wa makhona o dingana), ni mikono yimbidi kudemba ka kona.

²Amu ka mune wa makhona u na wumba mune wa titshulu, ati ti no ñolana ni txiluvelo, ti txi maha txiwumbeko tximwetxo, u txi bhama ngu koporo.

³U na maha kambe simbiyana so na ola ngu sona dikhuma, mafoxola, mabhaziya, tifoloko ni sikho, sotshe simaheso u na si maha ngu koporo.

⁴U na maha kambe txiselo txa koporo, txo nga sefo, u txi maha kambe mune wa masinda a simbi, ka madhawa a txona a mune.

⁵Se u na ma veka mndani ka txiluvelo ngu hahatshi ka kona, kasi ku sefo yi na mana kuhoka hagari ka txiluvelo.

⁶U na maha kambe mipakato ya txiluvelo ngu mndonga wa setime, u txi yi bhama ngu koporo.

⁷Mipakato u na yi wuletisa amu ka masinda, ati to mipakato yi maneka ka madhawa otshe a txiluvelo, ngako txiluvelo txi txi gulwa.

⁸Txiluvelo txi na va i di txa mapulango, txa diphanga ngu mndani, nga tonti ni nga ku kombisisa tona mmangoni, u na mahisa toneto.”

⁹U na maha kambe diguma da ditenda do sawuleka, ka didhawa da wulambwe diguma di na va ni m'jiyo wa nguwo yo hehuka yo rungelwa ta tinene, kulapha ku nava ka dizana da mikono, ngu didhawa dimwedo.

¹⁰Tiphande ta kona ta magumi mambidi ni siparako sa kona sa magiumi mambidi si na va sa koporo. Sihariketo sa tiphande ni madhawani ka kona si na va sa silivhela.

¹¹Ngu ka didhawa da wuphemba, mijiyo yi na va ya kulapha ka dizana da mikono, tiphande ta kona ta magumi mambidi ni siparako sa kona sa magumi mambidi, si na va sa koporo, sihariketo sa kona ni siparako sa kona si na va i di sa silivhela.

¹²Ngu didhawa da wuphemba, kuanama ka kona ku nava ka mtxhanu wa magumi a mikono, ni tiphande ta kona ta digumi ni siparako sa kona sa digumi.

¹³Kuanama ka kona ka diguma, ngu didhawa da wutxani, ku nava ka mtxhanu wa magumi a mikono;

¹⁴Ku nava ni digumi da mikono ni mtxhanu a mijiyo ka didhawa dimwedo; ni tiphande ta kona ta tiraru ti ku ni siparako sa kona sa siraru si na va sa didhawa dimwedo.

¹⁵Ka didhawa da wumbidi ngu kufana ku nava ni digumi da mikono ni mtxhanu ya mijiyo; kumweko ni tiphande tiraru ni siparako sa kona sa siraru.

¹⁶Ditimba da diguma di na va da m'jiyo: Da magumi mambidi a mikono a nguwo ya mkuxe, ya txiwunguwungu, yo bhilivila, ya linyu yo hehuka yo somborotelwa, yo rungwa ngu kutshuriselwa; ayi yi no va ni mune wa tiphande ni mune wa sipande.

¹⁷Tiphande ta kona totshe ati ti no tshanganisa diguma ti nava ti txi pataniswa ngu sihariketo sa silivhela, tiphingwi ta kona ti nava ta silivhela, ni siparako sa kona si na va sa koporo.

¹⁸Kulapha ka diguma ku nava ka dizana wa mikono, se kuanama ka didhawa dimwedo ni dimwani ku nava ka mtxhanu wa magumi, ni kudemba ka mtxhanu wa mikono, ya linyu yo hehuka yo somborotelwa; aniko siparako sa kona si na va sa koporo.

¹⁹Sotshe simaha sa mthumo wa hombe wa ditenda do sawuleka, totshe tiphande ta kona ni totshe tiphande ta diguma si na va i di sa koporo.

²⁰“U na leleta vanana va ka Israyeli ati to ve kutisela mtona wa wunene, wo wungulwa, wa mihando ya miolivha kasiku wu txi ta va wa kuwoninga, awule wu no thelwa amu ka malambu, kasiku ma si timeki.

²¹Amu ka ditenda da msengeletano, ngu hahanze ka m'jiyo, awu wu fenengetako wufakazi, Aroni ni vanana vakwe va na thela mtona wuwa amu ka malambu, kasiku me tura kukhukhela ni minova kala ditxitxa, me woninga masoni ka MKOMA. Awuwa mthetho wu na vaho ka vanana va ka Israyeli ni ka situkulwana sawe sotshe.”