Read chopi Eksodha 30 Bible Online

Eksodha 30 - chopi bible

Eksodha 30

¹“Kambe u na maha txiluvelo txo hisa ka txona dibaselo, txo mahwa ngu mapulango a setime.

²Txi nava ni mkono wumwewo wa kulapha, ni kuanama ka mkono wumwewo, txi na va ni mune wa madhawa o fana, kudemba ka kona ku nava ka mikono yimbidi. Titxheho ti nava tximaha tximwetxo ni txiluvelo.

³U na bhama ngu nzalama ya yinene ka didhawa da txitimwi, madhawa otshe ngu kurendelekisa, ni titxheho; kambe u txi mahela mkhwazi wa nzalama ngu kurendelekisa.

⁴U na txi mahela masinda mambidi a nzalama, ngu hahatshi ka mkhwazi, ka madhawa a kona a mambidi; ka ona u na khweketa mipakato kasi kukota kugula txiluvelo txi txi pakatwa.

⁵U na maha mipakato ya mapulango a mndonga wa setime, u txi yi bhama ngu nzalama.

⁶U na veka txiluvelo masoni ka m'jiyo awule wu ku ngu masoni ka dibhokiso da txitumelelano, masoni ka txikhalo txa wuxinji atxi txi ku txitimwi ka wufakazi, ahale ni nota manana kona ni nawe.

⁷Aroni a na hisela kona dibaselo do bhumula ngu txitimwi ka dona, mixo ni mixo, mbimo yile a lulamiselako malambu, ene a na hisa dibaselo di txi tuvikela.

⁸Mbimo yile Aroni a turisako malambu, ni minova a na hisa dibaselo e di tuvikisela. Ku nava dibaselo da mbimo yotshe masoni ka MKOMA, ka totshe tiveleko tanu.

⁹Mi nga thuki mi txi hisela kona dimwani dibaselo, hambi yimwani mhamba yo hiswa, hambi mningelo wumwani, ni kutheketa txitimwi ka txona so sela.

¹⁰Kumweko ngu dilembe, Aroni a na maha mhamba yo dihela sionho, txitimwi ka titxheho ta ha txiluveloni ngu mnoha wo dihela sionho, ka ditshiku da mningelo, kumweko ngu dilembe, ene a na maha mningelo ka txona, ngu tiveleko tanu; txiluvelo txiya txi na va txo sawuleka ngutu masoni ka MKOMA.”

¹¹MKOMA a wombile ka Mosi a txi khene:

¹²“Ngako u txi bala vanana va ka Israyeli ngu mitengo yawe, mmwani ni mmwani a na ningela txo tirula moya wakwe ka MKOMA, kasiku ku si maneki mtungu hagari kwawe, ka mbimo yile u va balako.

¹³ Votshe avale va no maneka va di batwe va na ningela hafu ya dixekele da mpimo wa dixekele do basa aha ka magandelo; (i ku magumi mambidi a magera ngu dixekele); hafuyo ya dixekele i mningelo wakwe ka MKOMA.

¹⁴Votshe avale va no maneka va di batwe, kukhukhela ka wule a ku ni magumi mambidi a malembe kuya masoni, a na humisa mningelo wu wu lavekako ka MKOMA.

¹⁵Nyatithombe kha na mbi ningela ngu kupindisisa, ni wule i ku txisiwana kha na mbi ningela ngu kuhungula amu ka hafu ya dixekele, ka mbimo yile a humisako msengo ka MKOMA, ngu kudihela sionho sa mimoya yanu.

¹⁶Se u na teka male ya kudivalelwa ka vanana va ka Israyeli, u yi ningela ka mthumo wa ditenda da msengeletano; kambe txi na va txialakanyiso txa vanana va ka Israyeli masoni ka MKOMA, kasi kuhulukisa wutomi wanu.”

¹⁷Se MKOMA a to womba ka Mosi a txi khene:

¹⁸“U na maha mkamba wa koporo, makhatoni ka wona ku nava ka koporo kambe, wo sambela ka wona. U na wu veka ngu hagari ka ditenda da msengeletano ni txiluvelo, u txi wu tata ngu mati.

¹⁹Aroni ni vanana vakwe va na samba manza ni mikondo, ka wona.

²⁰Mbimo yi va no wulela ditendani ka msengeletano, va na samba ngu ona mati awa kasiku va si fi; ni kungako va txi tshuketa ha txiluveloni va txi ya maha mthumo wa kumaha mningelo wa MKOMA.

²¹Va na samba manza ni mikondo kasi va si fi. Awuwa wu na va mthetho wo mbi gwita, kwakwe Aroni ni ka situkulwana sakwe, ni ka liveleko ni liveleko.”

²²MKOMA a womba kambe ka Mosi a txi khene:

²³“Teka mafura a maphya amanene ngutu; u na teka mtxhanu wa makilu ni dimwedo ya mira ya yiphya; ni makilu mararu a mafura a kinamomo; ni makilu mararu a kanela;

²⁴ni mtxhanu wa makilu ni dimwedo a kasiya, ngu mpimo wa kunemela ka dixekele dimwedo da mu ditendani ko sawuleka, ni hini yimweyo ya mtona wa olivha.

²⁵Ngu sotsheso u na maha mafura o tola ka kusawuleka, txingema txo bhumula, i ku mthumo wa nyasingeme. Ma nava mafura o tola ko sawuleka.

²⁶U na tota ngu ona ditenda da msengeletano ni dibhokiso da txixambanyo,

²⁷meza ni sotshe simaha sa kona, meza ya malambu ni sotshe simaha sa kona, txiluvelo txa singema,

²⁸Txiluvelo ni mhamba yo hiswa, ni sotshe siya sa kona, ni mkamba, ni txipande txa kona.

²⁹U na si basisa simaheso kambe si na va so sawuleka; sotshe asile si no si gwesa si na va si txi sawuleka.

³⁰Ngu ona u na tota Aroni ni vanana vakwe, u txi va sawulekisa kasiku va txi thuma wuphaxeli, va txi ni dhumisa.

³¹Sekoko, u na womba ka vanana va ka Israyeli u txi khawe: Aawa i mafura o sawuleka o tola, ma nava angu ka liveleko ni liveleko.

³²Kha ma na mbi thelwa ha mmidi ka wuhi ni wuhi m'thu, ni kambe mi nga maheni mamwani o fana nawo, nguko aawa ma katekisilwe, mi fanete mi txi ma veka aha ka wukhalo wo sawuleka.

³³Awule a no maha mamwani o fana nawo, mwendo kutota ngu ona m'thu wo mbi sawuleka, a na tutumiswa aha ka lixaka la ka kwawe.”

³⁴MKOMA a wombile kambe ka Mosi a txi khene: “Teka mafura o bhumula ni estakita ni onika ni galbhano; sotshe siya so bhumula u na si pata ni dibaselo ngu mpimo wumwewo.

³⁵Ngu sona siya u na maha ngu sona dibaselo ni mafura o bhumula o pataniselwa, nga ti nyasingeme a mahako. Mafura o lungwa, o basa ni kusawuleka;

³⁶u na kuya di txi maha lifenyenye u txi di veka masoni ka ditenda da msengeletano, ahale ni no ya manana kona ni nawe. Txingema txiya, kwanu, txi na va i di txingema txo sawuleka ngutu.

³⁷Kambe mi nga thuke mi ti mahela tximwani txingema txo pataniselwa. Mi na txi veka ka wukhalo wo katekiswa, atxile txi nga vekelwa MKOMA.

³⁸Awule a no maha tximaha txo fana kasiku e ti mahela dibaselo do bhumula, a na tutumiswa aha ka lihunzu la ka kwawe.”