Read chopi Eksodha 31 Bible Online

Eksodha 31 - chopi bible

Eksodha 31

¹MKOMA a wombile ka Mosi, a txi khene:

²“Wona, ani ni sawute Bhezaleli, mwana Uri, mtukulu wa Huri, wa lihunzu la ka Judha,

³ni mthete Moya wa Txizimu, wa wuzivi ni wutxhari, ni mapimo ka totshe tixaka ta mithumo,

⁴kasiku e ziva makhato a mthumo amu ka nzalama, ka silivhela ni koporo;

⁵kasi kukenya marigwi a lisima, kuvata mapulango ni kumaha totshe tixaka ta mithumo.

⁶Ni mningile m'vhuneteli wakwe i ku Holiyabhi, mwana Ahizamake, wa lihunzu la ka Dhani. Ni thete wuzivi timbiluni ka totshe titxhari tanu, kasiku ve sikota kumaha totshe ati ni nga kuleleta:

⁷Ditenda da msengeletano, dibhokiso da txitumelelano, txikhalo txa wuxinji txi ku ngu txitimwi ka dona ni ka sotshe simaha sa ditenda;

⁸meza ni siya sa yona, se ni phande ya yinene ya malambu, ni sotshe siya sa yona ni txiluvelo txa dibaselo;

⁹txiluvelo txa mningelo wo hiswa ni sotshe simaha sa txona, mkamba ni txipande txa kona;

¹⁰syambalo sa wukhongeli, syambalo so sawuleka sa mphaxeli Aroni ni syambalo sa vanana vakwe sa mthumo wa wuphaxeli;

¹¹mafura o tota ni dibaselo do bhumula da wukhalo wo sawuleka. Va na maha yotshe mithetho nga tonti ni nga kuleletelisa tona.”

¹²MKOMA a wombile ka Mosi a txi khene:

¹³Womba ka vanana va ka Israyeli u txi khawe: “Mi na vekisa masabhata angu ngu ditshuri, nguko njikombiso txo mbi guma hagari kwangu ni nanu, ka totshe tiveleko tanu, kasiku mi txi ziva ati to, ani ngani MKOMA, awule a mi sawulekisako.”

¹⁴Ti di ngeto, vekisani masabhata angu, nguko kwanu i mhaka yo sawuleka. Awule a di bihisako a na khawuliswa ngu kudawa, awule ka donedo ditshiku a mahako mthumo wokari a na thaviswa hagari ka vathu va ka kwawe.

¹⁵ Amu ka mtxhanu wa masiku ni dimwedo ku na thumwa aniko ka ditshiku da wutxhanu ni mambidi, ku nava i di Sabbata ya kuhumula ko hetiseka, kasi kudhumisa MKOMA.

¹⁶Vanana va ka Israyeli, va na vekisa Sabbata, va txi yi sawulekisa ngu liveleko ni liveleko, atxiya njitumelelano txo mbi na magwito.

¹⁷Txi nava txikombiso txa kwa mbi guma, hagari kwangu ni vanana va ka Israyeli, nguko njikombiso txa kala kupinduka, mbufakazi awu wu kombako ati to MKOMA a mahile nzuma ni mafu amu ka mtxhanu wa masiku ni dimwedo, ni ti to amu ka ditshiku da wutxhanu ni mambidi a gwitile kumaha mthumo wotshe e humula.

¹⁸Se a to ningela ka Mosi (a di gwitile kuwombawomba nayo mmangoni ka Sinayi) sileti simbidi sa Wufakazi, sileti sa marigwi, so bhalwa ngu litiho la Txizimu.