Read chopi Eksodha 33 Bible Online

Eksodha 33 - chopi bible

Eksodha 33

¹ MKOMA a to khene kambe ka Mosi: “Tsula, kwela ngu hawa, awe ni vathu va u nga va humisa ditikoni ka Egipta, ka ditiko dile ni nga xambanya ka Abrahamu ka Isaake ni txi khani: Ni na di ninga ka liveleko lako.

²Ni na ruma ngelozi yi txi thangela masoni kwako (ni na humisa hahanze Vakanana, Vaamori, Vaheti, Vaferezi, Vahevhi ni Vagebhuzi),

³tsula ka dona ditikodo, adile di khulungako masi ni wulombe. Aniko ani na mbi tsula ni nanu, nguko anu mi vathu vo banga misungo, ni nga thuka ni txi mi lovisa hagari ka nzila.”

⁴Se mbimo yile vathu va nga pfa mapswiyo o thisa, va to pandiseka ngu kuxaniseka, se ni wammweyo kha nga va a txi ti bombisa,

⁵Sekoko MKOMA a wombile ka Mosi a txi khene: “Womba ka vanana va ka Israyeli u txi khawe: Mi vathu va timbilu to banga. I ti ku ni ti kova hagari kwanu ngu mbimonyana, nga ni di mi lovisile. Ti di ngeto, thavisani sotshe simaha sanu sa bombo, kasi ni txi wona atile ni felako ku ti maha ngu ngamu.”

⁶Sekoko, kukhukhela mmangoni ka Horebhi, vanana va ka Israyeli va to thavisa sotshe simaha sawe sa bombo.

⁷Se Mosi a to teka ditenda a txi ya di gwimba hahanze, kule ni wugovelo, ve di ningile ditina daku ditenda da msengeletano. Ni votshe vale va nga ti lava ku wotisa mhaka ka MKOMA, ayile yi nga ti va karata, va ti ti ya ka ditenda da msengeletano, hahanze ka wugovelo.

⁸Se ku to maheka taku mbimo yile Mosi a nga ti huma eya ditendani, vathu votshe va ti ema, mmwani ni mmwani a ti maneka a di emile ha txikeni ka ditenda dakwe, va txi mlondetela ngu maso, kala Mosi e wulela ditendani.

⁹Se mbimo yile Mosi a nga ti wulela ditendani, phande ya direfu yi ti ti relela yi ta ema ha txikeni, se MKOMA e womba-womba ni Mosi.

¹⁰Se mbimo yile vathu va nga txi wona phande ya direfu yi txi ta ema ha txikeni ka ditenda, mmwani ni mmwani a txo khizama a di ha txikeni ka ditenda dakwe.

¹¹MKOMA a ti ti womba-womba ni Mosi khohe ni khohe, nga m'thu a txi womba-womba ni mngana wakwe, ngu msana Mosi a ti ti tshumela a txi ya wugoveloni. Joxuwa, mwana Nune, m'vhuneteli wakwe wa dijaha, a ti si khukhi amu ditendani.

¹²Mosi a to womba ka MKOMA a txi khene: “Awe MKOMA u ni gete u txi khawe: Humisa vathu vava; aniko khwa ni komba awule u no mruma ni nani. Kambe u ti khawe: Na kuziva ngu ditina dako, se u mani dithomo masoni kwangu.”

¹³Ngako i di ditshuri ti to ni mani dithomo masoni kwako, ni kombise tinzila tako, ni na kuziva ni txi wona ti to ni mani dithomo masoni kwako. Pimisa kambe ti to vathu vava, mbathu vako.

¹⁴MKOMA a wombile a txi khene: “Ani ngu wutumbu wangu ni na kupangalata ni na kuhumuta.”

¹⁵Sekoko Mosi a wombile a txi khene: “Ngako awe upune u si tsuli ni nathu, u nga hi kurumete kukhukha ka wuwa wukhalo.”

¹⁶Hi na ti zivisa kutxani ati to ani ni vathu vako hi ni dithomo masoni kwako kani? Ina hi nga ti to awe u na tsimbila kumweko ni nathu kani? Ngu mhaka yeto hi nava hi txi woneka, ani ni vathu vako, ti to hi hambanile ni vathu votshe va mifumo ya ha ditikoni.

¹⁷Sekoko MKOMA a to khene ka Mosi: “Ni na maha ati u ni kombelako, nguko u mani dithomo masoni kwangu, ni kambe na kuziva ngu ditina dako.”

¹⁸Sekoko Mosi a ti khene: Hi ngani pfela: “Ni kombe wudhumo wako.”

¹⁹Kambe MKOMA a to khene: “Ni na pindisa ngu masoni kwako wotshe wunene wangu, kambe ni na huwelela masoni kwako ditina dangu. Ni na mahela wunene awule ni mlavako, ni kambe ni na mahela wumbilu awule a ni tsakisako.”

²⁰A to engeta a txi khene: Khu na mbi sikota kuwona khohe yangu, nguko kha ku nga ni m'thu a ni wonako, e zumba a txi hanya.

²¹MKOMA a engetile a txi khene: “Ndiwo wukhalo wa hafuhi ni nani, u na ema txitimwi[39] ka dirigwi.

²²Ngako kuphatima kwangu ku txi pinda, ni na ku wuletisa amu phakoni ka dirigwi ni txi kufenengeta ngu dianza dangu, kala kuza ani ni pinda.

²³Ni na thavisa dianza dangu, se u na wona msana wangu, kambe khohe yangu kha yi na mbi woneka.”