Read chopi Eksodha 34 Bible Online

Eksodha 34 - chopi bible

Eksodha 34

¹Sekoko MKOMA a wombile kambe ka Mosi a txi khene: “Vata sileti simbidi sa marigwi sa kufana ni so khata, kasiku ani ni bhala kambe mapswi ale ni nga ti bhate ka sileti so khata, asile u nga faya.

²Zumba u di ti lulamisete ti to mangwana ni mixo u nata kwela mmangoni ka Sinayi, u txi ya ni verela kona, txitimwi ka mmango.

³Ni wammweyo m'thu a nga kwele ni nawe, ni wammweyo m'thu a nga woneke kotshe mmangoni, hambi tinvuta mwendo tihomu si nga dyele hafuhi ka mmango.”

⁴Sekoko Mosi a to vata sileti sa simbidi sa marigwi so fana no so khata, a to wuka ni mixo ngutu, e kwela mmangoni ka Sinayi, nga ti MKOMA a nga ti mu leletele, e teka sileti sa simbidi sa marigwi ngu manzani kwakwe.

⁵MKOMA a to relela ngu mu direfuni a txi maneka hafuhi kwakwe, se Mosi a to huwelela ditina da MKOMA.

⁶ MKOMA a to pinda koko ngu masoni ka Mosi, se Mosi e kwangula a txi khene: “Awe MKOMA Txizimu, Txizimu txa wumbilu ni kupfela, wo swela kuhenya kambe wo tala ngu wuha ni kuthembeka!

⁷Wo tala ngu lirando la hombe, kala ka magumi a mazana a tiveleko, wo divalela wubihi, kueyisa ni sionho, aniko kha fananisi muonho ni wamnene; kambe wa tsayisa vanana ni vatukulu, kala ka liveleko la wuraru ni la wumune, ngu mhaka ya sionho sa vatate vawe.”

⁸Se koneko Mosi a to kuluveta a txi ti wisa hahatshi e khozela,

⁹a txi khene: “MKOMA, ngako ani ni di mani kukateka masoni kwako, tsimbila kumweko ni nathu, hambiko vathu vava i ku va misungo yo banga, divalela wubihi wathu ni sionho sathu, u txi hi fuya, hi va thomba yako.”

¹⁰Sekoko MKOMA a xamute a txi khene: “Ni na maha txitumelelano ni nawe; masoni ka votshe vathu vako, ni na mahetela sixamaliso, sile si si ziviko kumaheka ni ka wuhi wukhalo, hambi ni ka wuhi mfumo, ni vathu vava va ku randelako se va na wona mthumo wa MKOMA, nguko simaha so thisa ni na si mahetela ngu mtamo wako.”

¹¹Xayisa ati nyamsi ni ku leletako, ni na tutumisa masoni kwako Vaamori, Vaheti, Vaferezi, Vahevhi ni Vajebhuzi.

¹²Ti wonele, u nga mahe Txitumelelano txihi ni txihi ni vaaki va ditikodo uyako ka dona; kasiku va si thuki va txi kuriyela u txi zwetwa, u txi lova.

¹³Mi na khungumula siluvelo sawe, mi txi fayetela sithombe sawe, ni ku sakata sipopo sawe, amu va khongelako kona Aseri.

¹⁴Khu na mbi khozela simwani sizimu, nguko MKOMA a dhanwa ku mbwa txiluse, i Txizimu txa txiluse.

¹⁵U nga mahe txitumelelano txokari ni vaaki va kona ditikonimo, nguko, mbimo yi va mahako wugango ni sizimu sawe, va txi si mahela miningelo ni miphaxo, va nga thuka va txi kudhana u txi ya dya timhamba tawe.

¹⁶Kambe u nga thuke u txi wuta hagari ka vanana vawe vamahorana, vasikati kasi kulowota vanana vako va vafana, va nga hambukisa vanana vako va txi maha wugango ni sizimu soneso.

¹⁷ U nga timahele sizimu so tshulwa.

¹⁸ Vekisa m'buso wa mapawu o mbi tshumbelwa; amu ka mtxhamu wa masiku ni mambidi, u na dya mapawu o mbi tshumbelwa, amu ka mtxima wa Abhibha, nguko ngu wona mtximewo u nga huma ngu wona ditikoni ka Egipta.

¹⁹Otshe matiwula ngangu, hambi otshe matiwula a vamatune a sifuyo sanu sa hombe ni sa sidotho.

²⁰U na tekisa matiwula a mbongola[40] ngu txihambana, mwendo u na yi wila thamo, u na tirula otshe matiwula a vanana vako va vafana. M'thu a nga thuke a txi humelela masoni kwangu asi nga ni txilo manzani kwakwe.

²¹ U na thuma amu ka mtxhanu wa masiku ni dinwedo aniko ngu ditshiku da wutxhanu ni mambidi u na humula, hambi i di ditshiku da mbimo ya txidimo mwendo mbimo yo elula.

²²U na vekisa kambe m'buso wa mavhiki, amu ka mbimo ya silo so khata mu kuelulani ka fulaho, ni m'buso wa kuelula ngu magwito ka dilembe.

²³Vathu votshe vavamna va ku hagari kwako va na ti wonekisa ka MKOMA Txizimu, Txizimu txa ka Israyeli;

²⁴Nguko ani ni na tutumisa mifumo masoni kwako, kambe ni na engetela ditiko dako; ni wammweyo kha na mbi navela dithepele dako nga ti u txi kwela u txi ya ti wonekisa masoni ka MKOMA, Txizimu txako, kuraru ngu dilembe.

²⁵ U nga phaxeli ha magandeloni kwangu ngu mnoha ni mapawu o tshumbelwa, mphaxo wa M'buso wa Pasika kha wu na mbi zumba wotshe wusiku kala mangwana.

²⁶ U na tisa mihando yo khata ya thembweni kwako Nyumbani ka MKOMA, Txizimu txako. Khu na mbi bhika nyama ya phongo ngu masi a mame wa yona.

²⁷MKOMA a wombile kambe ka Mosi a txi khene: “Bhala mapswi awa, nguko ni mahile ngu ona txitumelelano kumweko ni nawe ni va ka Israyeli.”

²⁸Mosi a zumbile hafuhi ka MKOMA mune wa magumi a masiku asi dyi sakudya, hambi kusela mati, wusiku ni mitshikari. Se MKOMA a bhate aha ka sileti mapswi a txitumelelano,[41] i ku sirumo sa digumi sa mlayo.

²⁹Se ku to maheka taku, Mosi e relela ngu mmangoni ka Sinayi a di ñote manzani sileti sa simbidi sa mlayo. Mosi asi ti zivi ti to khohe yakwe ya phatima, msana ka kuva a di wombawombile ni MKOMA.

³⁰Aroni ni votshe vanana va ka Israyeli mbimo yi va nga wona Mosi, va woni ti to khohe yakwe ya phatima, se kha va tsana va txi tshuketa hafuhi kwakwe.

³¹Sekoko Mosi a to dhana Aroni ni vathangeli va msengeletano, va txi ya hafuhi kwakwe, se Mosi a to womba-womba navo.

³²Ngu msana ka toneto, votshe vanana va ka Israyeli va to tshuketa hafuhi kwakwe, aha ene a nga va xawutela totshe ti MKOMA a nga ti mleletete kona mmangoni ka Sinayi.

³³Mbimo yi Mosi a nga gwita kuwombawomba navo, a to ti fenengeta khohe ngu nguwo.

³⁴Kambe mbimo yi Mosi a nga wulela a txi ya hafuhi ka MKOMA kasiku a txi ya womba-womba nayo, a to thavisa nguwo kala ka mbimo yo huma, se a manekile a txi xawutela ka vanana va ka Israyeli yotshe mithetho yi a nga yi amukela.

³⁵ Vanana va ka Israyeli va woni khohe ya Mosi yi txi phatima, se ene a to engeta a txi ti fenengeta khohe ngu nguwo, kala kuza a txi wulela kambe kasiku a txi ya womba-womba nayo MKOMA.