Read chopi Eksodha 35 Bible Online

Eksodha 35 - chopi bible

Eksodha 35

¹Sekoko Mosi a to tshanganisa msengeletano wotshe wa vanana va ka Israyeli, a txi va gela ku khene: “Ngu tiya MKOMA a nga ruma ti to hi txi ti maha ni ku ti vekisa:

²Amu ka mtxhanu wa masiku ni dimwedo mndani ka divhiki, mi nga sikota kuthuma totshe, aniko ngu ditshiku da wutxhanu ni mambidi di na va do sawuleka, i Sabbata ya kuhumula ka MKOMA. Awule a manekako a txi thuma ka ditshiku donedo a na dawa.

³ Minga dhiveleni mndilo tinyumbani kwanu, ngu ka ditshiku da Sabbata.”

⁴Mosi a wombile kambe ka wotshe msengeletano wa vanana va ka Israyeli, a txi khene: “Mhaka yi yi nga leletwa ngu MKOMA ngu yiya!

⁵Thavisani txokari aha ka tithomba tanu, kasi kumaha mningelo ka MKOMA! M'thu wule a ti lavako ngu mbilu yakwe, a fanete kumaha mningelo ka MKOMA ngu nzalama, ni silivhela, ni koporo;

⁶tinguwo ta mkungu, ni txiwunguwungu, ni to bhilivila, ni linyu yo tshura, ni matoya a tiphongo;

⁷madhowo a tihamba, o pendwa ngu penda yo bhilivila, madhowo a matxalu, mapulango a setime;

⁸ni mtona wo thela amu ka malambu, txingema txa mafura o tota, ni txa dibaselo do bhumula,

⁹marigwi a onekisi ni marigwi a kuveketelwa ahawa ka efodhe ni ka nguwo ya hakhana.

¹⁰Votshe vavamna vo txhariha hagari kwanu va nata ve ta thuma totshe ati MKOMA a nga leleta,

¹¹Nyumba yo sawuleka, ni ditenda da kona, sitshulelo sa kona, masinda a kona, mapulango a kona, sipambiyeto sa kona, tiphande ta kona ni sihiketelo sa kona;

¹²dibhokiso ni siparako sa kona, txikhalo txa wuxinji ni m'jiyo wo vhikela;

¹³meza ni mipakato ya kona, ni sotshe simaha sa kona, ni mapawu a txikombiso.

¹⁴ni phande ya malambu ni simaha sa yona, ni malambu a kona, ni mtona wa malambu;

¹⁵txiluvelo txa dibaselo ni mipakato, ni mtona wa kutota, dibaselo do bhumula, ni m'jiyo wa txike txo wulela ngu txona nyumbani ko sawuleka;

¹⁶txiluvelo txa miphaxo yo hiswa, tximaha txo bawula ngu txona, txa koporo, siparako ni sotshe simaha sa kona, mkamba ni magalo a kona,

¹⁷m'jiyo wa diguma, tiphande ta kona, txihiketelo ni m'jiyo wa ditimba da diguma;

¹⁸sipande sa nyumba yo sawuleka, sa diguma ni tingoti ta kona;

¹⁹syambalo sa wukhongeli asile si ambalwako ka mbimo ya mthumo wa wukhongeli, syambalo sa wukhongeli sa mphaxeli Aroni, ni syambalo sa vanana vakwe sa mthumo wa wuphaxeli.”

²⁰Sekoko konako wotshe msengeletano wa vanana va ka Israyeli wu to khukha masoni ka Mosi wu txi huma.

²¹Ni votshe avale va nga ti ni kunavela ka ditshuri ni timbilu to lulama va to tsula se va txi ya teka miningelo yawe kasi ku ta ningela ka MKOMA yi txi maha miningelo ya simaha sa wuaki wa ditenda da msengeletano ka mthumo ni ka syambalo so sawuleka.

²²Vavamna ni vavasikati, votshe avale va nga txi ti lava ngu mbilu, va to kombisa, va txi heleketa masinda, singeda, tiphera, tiketani sotshe simaha sa nzalama; mmwani ni mmwani a to maha mningelo wa nzalama, awule a nga wu longisela kuva wa MKOMA.

²³Votshe vale tinyumbani kwawe va nga ti ni tinguwo ta lisima ta mkungu, nguwo yo bhilivila, ya mtatanga, linyu yo hehuka, matoya a tiphongo, madhowo a tihamba, a penda yo bhilivila, ni madhowo o hehuka, va to si teka va txi si heleketa.

²⁴Votshe vale va nga sikota kumaha mningelo ngu silivhela ni koporo, va to si yisa ka MKOMA. Votshe avale mitini kwawe va nga ti ni mapulango a setime, ma nga ti thumiswa aha ka kuaka, va to ma tisa.

²⁵Se votshe vavasikati vo txhariha va zivako kuluka tinguwo, va to luka ngu manza awe vapune, ve wuyisa tinguwo ta mkungu, ni to zirila, ni to bhilivila, ni ta linyu yo tshura.

²⁶Vavasikati votshe avale va nga ti txharihile ni timbilu to tsakela kuthuma, va to luka matoya a tiphongo.

²⁷Vathangeli va ditiko va to ningela marigwi a onekisi ni mamwani marigwi, aawa ma vekelwako amu ka efodhe ni ka nguwo ya hakhana;

²⁸singema ni mafura a malambu, ni mafura o tota, ni dibaselo do bhumula.

²⁹Votshe vanana va ka Israyeli, vavamna ni vavasikati, avale va nga ti ni kunavela kumaha mningelo wuhi ni wuhi kasi kukulisa mthumo awu MKOMA a nga ruma Mosi kasiku e wu maha, m'thu ni m'thu a to heleketa ngu kuranda ka mbilu mningelo ka MKOMA.

³⁰Msana keto, Mosi a to khene ka vanana va ka Israyeli: “Zivani taku MKOMA a dhani ngu ditina Bhezaleli, mwana Uri, mwana Huri, wa lihunzu la ka Judha.

³¹A mningile Moya wa Txizimu, a txi mninga wutxhari, ni wuzivi, ni mapimo, ka totshe tixaka ta mithumo;

³²a mningile mapimo a kutumbula mithumo, ni kumaha mithumo ya nzalama, ni ya silivhela, ni ya koporo;

³³kuganga marigwi a txi ma veka sikhweketo, kuvata mapulango ni kumaha yotshe mithumo ya tixaka ni tixaka.

³⁴A mningile kambe wutxhari wo gondisa; a va ningile votshe ni Oholiyabhe, mwana Akizamake, wa lihunzu la ka Dhani,

³⁵a va ningile wutxhari wo maha totshe tixaka ta mithumo ya kuwumba ni ya kuvata; ya kurunga ko tshurisela aha ka tinguwo ta mkungu, ni to bhilivila, ni ta mkuxe ni ta linyu, kasiku va txi ziva kumaha mithumo yotshe ni kutumbula yimwani.